3 నిమిషాల్లో 15 వేల అడుగుల కిందకు దిగిపోయిన విమానం

గాల్లో ఎగురుతున్న విమానం ఒక్కసారిగా 15 వేల అడుగుల కిందకు దిగిపోయింది. ఊహించని ఈ పరిణామంతో అందులోని ప్రయాణికులు షాక్ తిన్నారు. ఈ భయానక అనుభవం అమెరికన్ ఎయిర్‌లైన్స్ విమానంలోని ప్రయాణికులకు ఎదురయ్యింది. కేవలం 3 నిమిషాల వ్యవధిలో ఏకంగా 15 వేల అడుగులు కిందకు దిగడంతో ప్రయాణికులు భయాందోళనలకు గురయ్యారు. ఇటీవల అమెరికన్‌ ఎయిర్‌లైన్స్‌‌కు చెందిన 5916 విమానంలో ఈ ఘటన చోటుచేసుకుంది. ఉత్తర కరోలినాలోని షార్లెట్‌ విమానాశ్రయం నుంచి ఫ్లోరిడాలోని గెయిన్జ్‌విల్‌కు 5916 విమానం బయలుదేరింది.

మార్గమధ్యలో 29వేల అడుగుల ఎత్తులో ఉండగా విమానంలో సాంకేతిక సమస్య తలెత్తింది. వాయు పీడనం తగ్గిపోయినట్టు గుర్తించిన పైలట్లు.. వెంటనే మాస్కుల ద్వారా ప్రయాణికులకు ఆక్సిజన్‌ అందజేశారు. ఈ క్రమంలోనే విమానాన్ని వీలైనంత త్వరగా కిందకు దించి, తక్కువ ఎత్తులో నడపాలని నిర్ణయించారు. దీంతో విమానాన్ని 20,000 అడుగుల కిందకు దింపారు. ఫ్లైట్అవేర్ వెబ్‌సైట్ ప్రకారం.. మొత్తం 11 నిమిషాల్లో 20 వేల అడుగుల కిందకు దింపగా.. కేవలం ఆరు నిమిషాల్లోనే విమానాన్ని 18,600 అడుగులకు దింపిపట్టు పేర్కొంది.

అనంతరం విమానం సురక్షితంగా ల్యాండ్‌ అవడంతో అందరూ ఊపిరి పీల్చుకున్నారు. ఈ విమానంలో ప్రయాణించిన ఫ్లోరిడా యూనివర్సిటీకి చెందిన ప్రొఫెసర్‌ హారిసన్‌ హోవ్‌ తన అనుభవాన్ని ట్విట్టర్‌లో పంచుకున్నారు. ‘‘చాలాసార్లు నేను విమానంలో ప్రయాణించాను. కానీ, ఇది భయానక అనుభవం ఎప్పుడూ చూడలేదు.. ’’ అని తెలిపారు. మండుతున్న వాసన, చెవులు భరించలేని శబ్దం రావడంతో భయకంపితులయ్యామని చెప్పారు. ఫోటోలను కూడా తీసే సయమం లేదని అన్నారు. ఆయన షేర్ చేసిన ఫోటోల్లో హోవ్ సహా ప్రయాణికులందరూ ఆక్సిజన్ మాస్క్‌ల సహాయంతో ఊపిరి పీల్చుకోవడానికి ప్రయత్నిస్తున్నారు.

‘విమానం మార్గమధ్యలో ఏదో విఫలమైంది.. క్యాబిన్ ఒత్తిడిని తగ్గించింది. ఆక్సిజన్ క్యాన్‌లు ఉపయోగించడం వల్ల మండే వాసన స్పష్టంగా వచ్చింది.. ఎత్తును తక్షణమే తగ్గించడానికి రెక్కల విచ్చుకున్నాయి.. కాబట్టి ఎక్కువ ఆక్సిజన్ వచ్చింది.. ఇది భయానక అనుభవం’ అని తెలిపారు. మరోవైపు, ఈ ఘటనపై ఎయిర్‌లైన్స్ స్పందిస్తూ.. విమానంలో పీడనానికి సంబంధించిన సమస్య తలెత్తినందునే కిందకు దించినట్లు తెలిపింది. ప్రయాణికులకు కలిగిన అసౌకర్యానికి క్షమాపణలు తెలిపింది.