శరద్ పవార్‌కు కేంద్రమంత్రి పదవి,,,,చక్కర్లు కొడుతున్న ప్రచారం

మహారాష్ట్ర రాజకీయాలు ప్రస్తుతం దేశ రాజకీయాల్లో తీవ్ర చర్చనీయాంశంగా మారాయి. ఇటీవల ఎన్సీపీలో చీలిక తెచ్చిన శరద్ పవార్ అన్న కొడుకు అజిత్ పవార్.. బీజేపీ, షిండే వర్గం శివసేన కూటమి ప్రభుత్వంలో చేరిపోయారు. ఆ తర్వాత శరద్ పవార్‌ను కూడా ఎన్డీఏ కూటమిలోకి రావాలని ఆహ్వానించినట్లు వార్తలు వెలువడ్డాయి. ఈ నేపథ్యంలోనే శరద్ పవార్ ఎన్డీఏలో చేరితే ఆయనకు కేంద్రమంత్రి పదవి ఆఫర్ ఇవ్వనున్నట్లు కూడా పుకార్లు షికార్లు చేశాయి. అయితే ఈ క్రమంలోనే తాజాగా శరద్ పవార్‌తో అజిత్ పవార్ మరోసారి భేటీ కావడం ఈ వార్తలకు బలం చేకూర్చింది. ఈ నేపథ్యంలోనే మరోసారి మరాఠా రాజకీయాల్లో ఏం జరుగుతుందోనని దేశం మొత్తం ఉత్కంఠగా ఎదురుచూస్తోంది. ఈ వార్తలపై తాజాగా ఎన్సీపీ అధినేత శరద్ పవార్ స్పందించారు.

శరద్ పవార్ ఎన్డీఏ కూటమిలో చేరి మద్దతు ప్రకటిస్తే ఆయనకు గానీ లేదా ఆయన కుమార్తె సుప్రియా సూలేకు గానీ కేంద్ర మంత్రి పదవి ఆఫర్ చేసినట్లు మహారాష్ట్ర మాజీ సీఎం, కాంగ్రెస్ సీనియర్ నేత పృథ్వీరాజ్ చవాన్ ఇటీవల సంచలన వ్యాఖ్యలు చేశారు. అందులో భాగంగానే ఇటీవల శరద్ పవార్‌తో అజిత్ పవార్ భేటీ అయ్యారని అన్నారు. ఈ వ్యాఖ్యలపై స్పందించిన శరద్ పవార్.. అవన్నీ పుకార్లేనని కొట్టిపారేశారు. కొంతమంది శ్రేయోభిలాషులు తనను ఎన్డీఏ కూటమిలో చేరాలని ఒప్పించేందుకు ప్రయత్నిస్తున్నారని.. అయితే తాను మాత్రం అలాంటి ప్రణాళికలేవీ వేయలేదని శరద్ పవార్ ఇంతకుముందే చెప్పిన విషయాన్ని మరోసారి గుర్తు చేశారు. ఈ సందర్భంగా పృథ్వీరాజ్ చవాన్ ఏం చెప్పారో తనకు తెలియదని.. అయితే కేంద్రమంత్రి ఆఫర్ లాంటిదేమీ లేదని స్పష్టం చేశారు. కుటుంబ పెద్దగా తాను తన కుటుంబ సభ్యులందరితో మాట్లాడుతానని.. ఇవి కేవలం పుకార్లు మాత్రమేనని కొట్టిపారేశారు.

అయితే కేంద్రంలో అధికారంలో ఉన్న ఎన్డీఏ కూటమికి వ్యతిరేకంగా కాంగ్రెస్ సహా దేశంలోని చాలా పార్టీలు ఇండియా కూటమిని ఏర్పాటు చేశాయి. అందులో ఎన్సీపీ అధినేత శరద్ పవార్ కూడా కీలకంగా ఉన్నారు. ఈ నేపథ్యంలోనే ఆయన ఎన్డీఏ వైపు వెళ్తున్నారనే వార్తలు ఇండియా కూటమిలోని పార్టీలను తీవ్ర అయోమయానికి గురిచేస్తున్నాయి. ఇప్పటికే రెండుసార్లు భేటీ అయిన ఇండియా పార్టీ నేతలు.. తదుపరి సమావేశాన్ని ఈనెల 31 వ తేదీన మహారాష్ట్రలో నిర్వహించనున్నాయి. ఈ క్రమంలోనే మరాఠా రాజకీయాల్లో చోటు చేసుకుంటున్న పరిణామాలు.. ఇండియా కూటమికి మింగుడు పడటం లేదు.

ఈ సందర్భంగా బీజేపీని టార్గెట్ చేస్తూ.. తీవ్ర విమర్శలు చేసిన శరద్ పవార్.. దేశ ప్రజలను విభజించేందుకు కమలం పార్టీ ప్రయత్నిస్తోందని ఆరోపించారు. దేశంలోని చాలా రాష్ట్రాల్లో ఎన్నికైన ప్రభుత్వాలను అస్థిరపరిచేందుకు బీజేపీ ప్రయత్నాలు చేస్తోందని ఆరోపించారు. ఇందులో భాగంగానే గోవా, మధ్యప్రదేశ్‌, మహారాష్ట్ర ప్రభుత్వాలను కూల్చి అధికారంలోకి బీజేపీ రావడం వీటికి ఉదాహరణ అని పేర్కొన్నారు.