చికెన్ కర్రీలో దర్శనమిచ్చిన ఎలుక,,,పోలీసులకు ఫిర్యాదు చేసిన కస్టమర్

రెస్టారెంట్లలో ప్రమాదవశాత్తు లేక చెఫ్‌లు, సిబ్బంది అజాగ్రత్త వల్ల ఆహార పదార్థాల్లో ఏవైనా పడటం మనం సాధారణంగా చూస్తూనే ఉన్నాం. అయితే వాటిని తినేటపుడు కస్టమర్ గుర్తుపట్టి ఫిర్యాదు చేస్తేనే తెలుస్తుంది. చాలా సార్లు అది గుర్తించక తిన్న తర్వాత ఫుడ్ పాయిజన్ అయిన సంఘటనలు కూడా చూశాం. అయితే తాజాగా జరిగిన ఓ ఘటన గురించి వింటే ఒళ్లు జలదరిస్తుంది. ఎందుకంటే కస్టమర్ ఆర్డర్ చేసిన చికెన్ కర్రీలో ఏకంగా ఎలుక అవశేషాలు కనిపించడం తీవ్ర చర్చనీయాంశంగా మారింది. దీంతో వారు దాన్ని చూసి అవాక్కయ్యారు. ఈ ఘటన మహారాష్ట్ర రాజధాని ముంబైలో చోటు చేసుకుంది.

ఇద్దరు యువకులు ఆకలిగా ఉండటంతో ముంబైలోని బాద్రాలో ఉన్న ఓ ఫేమస్ హోటల్‌కు ఆదివారం రాత్రి వెళ్లారు. అక్కడ చికెన్ కర్రీ, మటన్ థాలీ ఆర్డర్ చేశారు. కొద్దిసేపటి తర్వాత హోటల్ సిబ్బంది ఆ ఫుడ్‌ను తీసుకువచ్చి ఇద్దరు వ్యక్తులకు ప్లేట్లలో వడ్డించారు. దీంతో వారిద్దరూ తినడం ప్రారంభించారు. అయితే అందులో ఒక వ్యక్తికి తింటుండగా.. ఏదో తేడాగా అనిపించింది. వెంటనే అది ఏంటని పరిశీలించాడు. అయితే అది ఎలుకకు సంబంధించిన మాంసం ముక్క అని గుర్తించాడు. దీంతో వెంటనే హోటల్ సిబ్బందిని పిలిచి వారిద్దరు ప్రశ్నించారు. దానికి సిబ్బంది నిర్లక్ష్యంగా సమాధానం ఇవ్వడంతో వారికి మరింత కోపం వచ్చింది. దీంతో వెంటనే బాంద్రా పోలీస్ స్టేషన్‌కు వెళ్లి పోలీసులకు ఫిర్యాదు చేశారు.

ఈ క్రమంలో ఘటనపై కేసు నమోదు చేసి రంగంలోకి దిగిన పోలీసులు.. హోటల్‌కు వెళ్లి ఆహార పదార్థాలను పరిశీలించారు. ఆ ఇద్దరు వ్యక్తులకు వడ్డించిన చికెన్ కర్రీని కూడా స్వాధీనం చేసుకుని పరీక్షలు చేయడానికి ఫుడ్ అండ్ డ్రగ్ అడ్మినిస్ట్రేషన్ విభాగానికి పంపించారు. అనంతరం ఆ హోటల్ మేనేజర్, చెఫ్‌ను అరెస్ట్ చేసినట్లు బాంద్రా పోలీస్ స్టేషన్ ఇన్‌స్పెక్టర్ వివరించారు. అయితే చికెన్ కర్రీలో ఎలుక అవశేషాలు వచ్చాయని ఆ ఇద్దరు వ్యక్తులు చేస్తున్న ఆరోపణలను హోటల్ యాజమాన్యం తీవ్రంగా ఖండించింది. తాము 22 ఏళ్లుగా హోటల్‌ను నడిపిస్తున్నామని.. ఇలాంటి సంఘటన ఎప్పుడూ చోటు చేసుకోలేదని వెల్లడించారు. అయితే ఆ ఇద్దరు వ్యక్తులకు చికెన్ కర్రీ వడ్డించిన సమయంలో తాను హోటల్‌లో లేనని.. ఈ విషయం తమ సిబ్బంది తెలియజేయడంతో వెంటనే అక్కడికి వెళ్లినట్లు పోలీసుల విచారణలో హోటల్ మేనేజర్ చెప్పారు.

హోటల్‌కు వచ్చిన సమయంలో ఇద్దరు యువకులు బాగా తాగి ఉన్నారని.. వారి చేతుల్లో లిక్కర్ బాటిళ్లు ఉన్నాయని తము సిబ్బంది చెప్పినట్లు పోలీసులకు తెలిపారు. తమ హోటల్‌లో మద్యం విక్రయించమని.. బయటి నుంచి తీసుకురావడానికి కూడా తమ సిబ్బంది అనుమతించరని పేర్కొన్నారు. ఇలా ఫుడ్‌లో ఎలుక వచ్చిందని ఆరోపణలు చేసి.. డబ్బులు గుంజాలని ప్రయత్నిస్తున్నారని హోటల్ మేనేజర్ ఆరోపించారు. తమ హోటల్‌కు వచ్చే కస్టమర్లకు మంచి భోజనాన్ని అందిస్తామని.. అందుకోసం ఆహారాన్ని ఎప్పటికప్పుడు తనిఖీ చేస్తామని సమాధానమిచ్చారు. అయితే మేనేజర్, చెఫ్‌ అరెస్ట్ కాగా.. బెయిల్‌పై బయటకు వచ్చారు.