భారీ ఛేజింగ్‌ల నడుమ.. నూహ్ అల్లర్ల నిందితుడు బజరంగీ అరెస్ట్

హరియాణాలోని నూహ్‌ మత ఘర్షణలకు సంబంధించిన కేసులో గో రక్షకుడు బిట్టూ బజరంగీని పోలీసులు మంగళవారం అరెస్టు చేశారు. తావడూ పట్టణంలో భారీ చేజింగ్‌ల నడుమ అతడ్ని పోలీసులు అదుపులోకి తీసుకున్నారు. ఈ అరెస్ట్‌కు సంబంధించిన సీసీటీవీ ఫుటేజ్ ప్రస్తుతం వైరల్ అవుతోంది. సీసీటీవీ ఫుటేజీలో సాధారణ దుస్తులు ధరించిన పోలీసులు, కర్రలు, తుపాకుల వంటి ఆయుధాలతో చాలాసేపు వెంబడించిన తర్వాత అతడిని పట్టుకోవడం కనిపిస్తోంది. అల్లర్లు, హింస, బెదిరింపులు, ప్రభుత్వ పనులను అడ్డుకోవడం, ప్రభుత్వ అధికారిని విధుల నుంచి తప్పించడం, మారణాయుధంతో హాని కలిగించడం వంటి అభియోగాలు బిట్టూపై ఉన్నాయి.

అల్లర్లకు విషయంలో బజరంగీపై నమోదుచేసిన ఎఫ్‌ఐఆర్‌ సహా, సాదర్‌ పోలీస్‌స్టేషన్‌లో ఏసీపీ ఉషా కుందు ఫిర్యాదు ఆధారంగా దాఖలైన 15 నుంచి 20 కేసుల్లోనూ బజరంగీ అలియాస్‌ రాజ్‌కుమార్‌ను ప్రశ్నిస్తున్నట్లు పోలీసులు వెల్లడించారు. గో రక్షణ బజరంగ్‌ ఫోర్స్‌ అధ్యక్షుడైన బజరంగీని తావడూ పట్టణంలోని నేర దర్యాప్తు విభాగం అదుపులోకి తీసుకుందని, ఫరీదాబాద్‌కు తరలించామని తెలిపారు. అలాగే, అందుబాటులో ఉన్న వీడియోలు ఆధారంగా అతడి అనుచరులను గుర్తించే పనిలో ఉన్నట్టు చెప్పారు. వారిని కూడా త్వరలో అరెస్ట్ చేస్తామని ప్రకటించారు.

మరోవైపు, నూహ్‌ పోలీస్ అధికార ప్రతినిధి మాట్లాడుతూ.. బిట్టూని ప్రశ్నించిన అనంతరం అరెస్టు చేశామని, బుధవారం అతడ్ని కోర్టులో ప్రవేశ పెడతామని చెప్పారు. ‘పోలీసుల విధులకు ఆటంకం కలిగించేవారిని ఉపేక్షించం.. సోషల్ మీడియాపై కూడా నిఘా ఉంచాం.. రెచ్చగొట్టేలా విద్వేష ప్రసంగాలు, తప్పుడు వార్తలను ప్రచారం చేసేవారిపై కఠిన చర్యలు తీసుకుంటాం’ అని స్పష్టం చేశారు. నూహ్‌లో వీహెచ్‌పీ ఊరేగింపుపై దాడి జరిగిన సమయంలో బజరంగీ, అతని అనుచరులు అక్రమ ఆయుధాలను ఉపయోగించారని ఓ సీనియర్‌ పోలీసు అధికారి తెలిపారు.

బిట్టూ బజరంగీ అలియాస్ రాజ్‌కుమార్ కూరగాయల వ్యాపారం చేస్తుంటాడు. తగ మూడేళ్లుగా గో సంరక్షణ సంస్థను నడుపుతున్నాడు. ‘మోను మానేసర్, బిట్టు బజరంగీ ప్రకటనలతో ప్రజలు అప్పటికే ఆగ్రహంతో ఉన్నారు.. మోను మానేసర్‌కు వచ్చాడని పుకార్లు వ్యాపించాయి... దాంతో హింస మొదలైంది.’ అని నూహ్ ఎమ్మెల్యే చౌధరీ అఫ్తాబ్ అన్నారు. హరియాణా అల్లర్లలో ఓ హోం గార్డు సహా ఆరుగురు ప్రాణాలు కోల్పోగా.. మరో 70 మందికిపైగా గాయపడ్డారు. వాహనాలకు నిప్పంటించిన ఆందోళనకారులు.. ప్రజా ఆస్తులకు నష్టం కలిగించారు. ఈ ఘటనలతో నూహ్‌లో రెండు వారాల పాటు ఇంటర్నెట్ సేవలను నిలిపివేయగా.. సోమవారం పునరుద్దరించారు.