25 ఏళ్ల తర్వాత మణిపూర్‌లో బాలీవుడ్ సినిమా ప్రదర్శన

గిరిజనులు, మైతీల మధ్య జాతుల మధ్య వైరంతో మూడు నెలలు పాటు అట్టుడికిన ఈశాన్య రాష్ట్రం మణిపూర్‌‌లో దాదాపు 25 ఏళ్ల తర్వాత హిందీ సినిమాను బహిరంగంగా ప్రదర్శించారు. మణిపూర్‌లో హింసాకాండలో తీవ్రంగా ప్రభావితమైన చురాచందాపూర్‌లో జిల్లాలో సినిమాను ప్రదర్శించడం గమనార్హం. ఇంఫాల్‌కు 63 కి.మీ.దూరంలోని రెంగ్‌కైలోని ఓపెన్‌ ఎయిర్‌ థియేటర్‌ మంగళవారం విక్కీ కౌశల్‌ నటించిన ‘ఉరి: ద సర్జికల్‌ స్ట్రైక్‌’ చిత్రాన్ని ప్రదర్శించగా.. పెద్ద సంఖ్యలో ప్రేక్షకులు వచ్చి తిలకించారు.

మైతీ వేర్పాటువాద సంస్థ ‘పీపుల్స్‌ లిబరేషన్‌ ఆర్మీ’కి చెందిన పొలిటికల్ వింగ్ రివల్యూషనరీ పీపుల్స్‌ ఫ్రంట్‌ 2000 సెప్టెంబరులో హిందీ చిత్రాలను మణిపూర్‌లో ప్రదర్శించ వద్దని హెచ్చరించింది. దీంతో అప్పటి నుంచి నిలిచిపోయిన బాలీవుడ్ చిత్రాల ప్రదర్శన మంగళవారం ‘హమర్‌ స్టూడెంట్స్‌ అసోసియేషన్‌’(హెచ్‌ఎస్‌ఏ) చొరవతో తిరిగి ప్రారంభమైంది. ఇండోజెనస్ ట్రైబల్ లీడర్స్ ఫోరమ్ అధికార ప్రతినిధి గింజా వల్జాంగ్ మాట్లాడుతూ.. ‘మా ఊరిలో ఓ సినిమా ప్రదర్శించి రెండు దశాబ్దాలు దాటింది. మైతీలు చాలా కాలంగా హిందీ సినిమాలను నిషేధించారు. ఆ గ్రూపు దేశవ్యతిరేక విధానాలను ధిక్కరించి, భారతదేశంపై మన ప్రేమను చాటుకోవడమే నేటి ప్రయత్నం’ అని అన్నారు.

ఈ సంస్థ తమను తాము కుకీ తెగల గొంతుగా అభివర్ణించుకుంది. అంతకుముందు ‘దశాబ్దాలుగా ఆదివాసీలను లొంగదీసుకున్న ఉగ్రవాద గ్రూపులకు మా ధిక్కరణ, వ్యతిరేకత బయటపెట్టడమే బాలీవుడ్ సినిమా ప్రదర్శన అని చెప్పింది. ‘స్వేచ్ఛ, న్యాయం కోసం మా పోరాటాన్ని కొనసాగించడానికి ప్రతిజ్ఞ చేయడంలో మాతో చేరండి’ అని ట్రైబల్ లీడర్స్ ఫోరమ్ సోమవారం విజ్ఞప్తి చేసింది. ఈ సంస్థ ప్రకారం చివరిసారిగా మణిపూర్‌లో షారుక్ ఖాన్ నటించిన కుచ్ కుచ్ హోతా హై చిత్రాన్ని 1998లో ప్రదర్శించారు.

బాలీవుడ్ సినిమాలను ప్రదర్శించొద్దని మైతీ రివల్యూషనరీ పీపుల్స్ ఫ్రంట్ 2000 సెప్టెంబరులో హెచ్చరించిన వారం రోజుల్లోనే.. హిందీ సినిమాలకు చెందిన దాదాపు 8 వేల వరకూ వీడియో, ఆడియో క్యాసెట్లు, సీడీలను రెబల్స్ తగులబెట్టారు. అయితే, ఈ ఉగ్రవాద సంస్థ ఎటువంటి కారణాలు లేకుండానే బాలీవుడ్ సినిమాలను నిషేధించింది. రాష్ట్ర సంస్కృతి, భాషలపై బాలీవుడ్ చిత్రాలను ప్రతికూల ప్రభావం చూపుతాయని ఉగ్రవాద సంస్థ నమ్ముతున్నట్టు స్థానిక కేబుల్ ఆపరేటర్లు తెలిపారు.