ఐఎస్‌ఎస్ నుంచి స్టన్నింగ్‌ ఫోటోతో భారతీయులకు శుభాకాంక్షలు చెప్పిన యూఏఈ వ్యోమగామి

దేశవ్యాప్తంగా 77వ స్వాతంత్య్ర దినోత్సవ వేడుకలు మంగళవారం ఘనంగా జరిగాయి. ప్రపంచ వ్యాప్తంగా ఉన్న భారతీయులు స్వాతంత్య్ర దినోత్సవ వేడుకల్లో ఉత్సాహంగా పాల్గొన్నారు. ఈ సందర్భంగా యునైటెడ్‌ అరబ్‌ ఎమిరేట్స్‌ (UAE)కు చెందిన వ్యోమగామి భారత పౌరులకు వినూత్నంగా స్వాతంత్య్ర దినోత్సవ శుభాకాంక్షలు తెలిపారు. ఏకంగా హిందీ, ఇంగ్లీష్, మళయాలం, తెలుగు, ఉర్దూ, తమిళ్, బంగ్లా, కన్నడ, ఒడియా, పంజాబీ, అస్సామీ సహా 11 భారతీయ భాషల్లో నమస్కారం చెబుతూ అంతర్జాతీయ అంతరిక్ష కేంద్రం (ISS) నుంచి తీసిన అద్భుతమైన ఫోటోను వ్యోమగామి అల్ నెయదీ ట్విట్టర్‌లో షేర్ చేశారు.

ప్రపంచ వ్యాప్తంగా ఉన్న భారతీయులకు అంతర్జాతీయ అంతరిక్ష కేంద్రం నుంచి ‘స్వాతంత్య్ర దినోత్సవ శుభాకాంక్షలు’ అంటూ ట్వీట్‌ చేసి.. ఢిల్లీ నగరం ఫోటోను ఆయన పంచుకున్నారు. కాంతులీనుతున్న ఢిల్లీ మహానగరాన్ని ఐఎస్ఎస్ నుంచి కెమెరాల్లో బంధించి, భారతీయులకు శుభాకాంక్షలు చెప్పిన అల్‌నెయదీకి నెటిజన్లు కృతజ్ఞతలు చెబుతున్నారు. అందమైన ఫోటో షేర్ చేసినందుకు సంతోషం వ్యక్తం చేస్తున్నారు.

‘వావ్... అద్భుతమైన ఫోటోను షేర్ చేసినందుకు.. మమ్మల్ని గుర్తుపెట్టుకుని శుభాకాంక్షలు చెప్పినందుకు ధన్యవాదాలు. అంతరిక్షంలో ఉన్నందుకు మీరు ఈరోజు చాలా గర్వపడాలి... ఇది చాలా కష్టం, వ్యక్తిగత త్యాగాలతో వస్తుంది. విష్ యు ఆల్ ద బెస్ట్’ అని ఓ నెటిజన్ కామెంట్ చేశాడు. ‘నేను మిమ్మల్ని ఫోలో అవుతున్నప్పటి నుంచి నా భారతదేశం గురించి ఒక పోస్ట్ చూడాలని ఆశించాను.. మాకు ఎంతో ప్రత్యేక ఈ రోజున శుభాంక్షాలు చెప్పి అందమైన ఫోటోలను షేర్ చేసినందుకు ధన్యవాదాలు. భారతీయుడిగా ఎప్పుడూ గర్వపడతాను.. వైవిధ్యం కలిగిన మా దేశాన్ని ఇష్టపడే అత్యంత విలువైన అంశాన్ని మీరు చూపించారు’ అని మరొకరు వ్యాఖ్యానించారు.

యూఏఈకి చెందిన అల్‌నెయదీ ఆరునెలల స్పేస్‌ మిషన్‌ కార్యక్రమంలో భాగంగా ఈ ఏడాది ఏప్రిల్‌లో అంతర్జాతీయ అంతరిక్ష కేంద్రానికి వెళ్లారు. ఆరు నెలల కాలం ఆగస్టు 31తో పూర్తికానుండగా.. ఆయన భూమిపైకి చేరుకోనున్నారు. అరబ్‌ దేశం నుంచి అంతరిక్ష కేంద్రానికి వెళ్లిన తొలి వ్యోమగామిగా అల్‌నెయదీ రికార్డు సృష్టించారు. ఇంటర్నేషనల్ స్పేస్‌ స్టేషన్‌ భూమి నుంచి 400 కి.మీలో ఎత్తులో ఉన్న విషయం తెలిసిందే. కాగా, ప్రపంచంలోనే అతిఎత్తైన భవనం దుబాయ్‌లోని బుర్జ్‌ ఖలిఫాపై భారత త్రివర్ణ పతాకం ప్రదర్శితమైంది. ఈ సందర్భంగా భారత ప్రజలకు స్వాతంత్య్ర దినోత్సవ శుభాకాంక్షలు చెబుతూ బుర్జ్‌ ఖలీఫా ట్వీట్‌ చేసింది.