వీడిన మిస్టరీ,,,డాక్టర్ ఇంట్లో మహిళ డె‌డ్‌బాడీ.., ఆవిడే ఈ హత్య చేసింది

శ్రీకాకుళంలో సంచలనంరేపిన డాక్టర్ ఇంట్లో మర్డర్ మిస్టరీ వీడింది. శ్రీకాకుళం పెద్దపాడు రోడ్డులోని ఓ విశ్రాంత వైద్యుడి ఇంట్లో 15 ఏళ్ల నుంచి రాజు అనే మహిళ పని చేస్తోంది. అదే ఇంట్లో దాదాపు 10 ఏళ్ల నుంచి మరో పని మనిషి జిల్లేడువలసకు చెందిన చిట్టెమ్మ కూడా ఉంటోంది. చిట్టెమ్మ తన భర్తతో విడిపోయిన నాటి నుంచి అక్కడే ఉంటున్నారు. ఇంటి యజమాని విశాఖపట్నంలోని కుమారుడి దగ్గర ఉండటంతో ఇంటిని పని మనుషులిద్దరికీ అప్పగించారు. ఆయన అప్పుడప్పుడు వచ్చి వెళ్తుండేవారు.

చిట్టెమ్మకు పాత నేరస్థుడితో వివాహేతర సంబంధం ఉంది. వీరిద్దరు డాక్టర్ నివాసంలోనే కలిసేవారు. రాజు ఆదివారం తన మేనత్త వంజరాపు అచ్చెమ్మ ఇంటికి వెళ్లి సోమవారం సాయంత్రం 4 గంటలకి తిరిగి వచ్చింది. ఆరోజు ఇంటికి ఓవ్యక్తి వచ్చాడని చూసిన వారు రాజుకు చెప్పడంతో ఆమె చిట్టెమ్మను ప్రశ్నించింది. ఈ విషయాన్ని డాక్టర్‌కు చెబుతానని హెచ్చరించడంతో చిట్టెమ్మ భయపడింది.

ఈ విషయమై ఆగస్టు 14న రాత్రి ఇద్దరి మధ్య గొడవ జరిగింది. రాజు ఎంతో కాలం నుంచి పని చేస్తుండటం, వివాహేతర సంబంధం గురించి రాజు చెబితే యాజమాని నమ్ముతారని అంతమొందించాలని చిట్టెమ్మ భావించింది. కిచెన్‌లో చెక్క పీటతో తలపై బలంగా కొట్టి హతమార్చింది. డాక్టర్ ఇంట్లో రాజు హత్య కలకలంరేపగా.. పోలీసులు రంగంలోకి దిగారు. హత్య జరిగిన రోజున చిట్టెమ్మ కోసం వచ్చిన వ్యక్తిని కూడా ప్రశ్నించగా.. అదే సమయంలో అతను సినిమాకు వెళ్లినట్లు పోలీసులు గుర్తించారు.

ఘటనా స్థలంలో లభ్యమైన ఆధారాలను పరిశీలించిన తర్వాత పోలీసులకు చిట్టెమ్మపై అనుమానం రావడంతో ఆ కోణంలో దర్యాప్తు చేశారు. ఆమె కొత్తరోడ్డు కూడలి వద్ద నరసన్నపేట వైపు వెళ్తుండగా పట్టుకుని విచారించగా ఆమె నిజం అంగీకరించడంతో అరెస్ట్ చేశారు. వివాహేతర సంబంధం ఎక్కడ బయటపడుతుందనే భయంతనే ఆమెను హత్యచేసినట్లు పోలీసులు తేల్చారు.