పాంగాంగ్ సరస్సు వద్ద రాజీవ్ జయంతి,,,,చైనా సరిహద్దుల్లోని పాంగాంగ్ సరస్సుకు రాహుల్ గాంధీ బైక్ రైడ్

లడఖ్‌ లో పర్యటిస్తున్న కాంగ్రెస్‌ ఎంపీ రాహుల్‌ గాంధీ శనివారం పాంగాంగ్ సరస్సుకు బైక్ నడుపుకుంటూ వెళ్లారు. త్వరలో లడఖ్ స్వయం ప్రతిపత్తి అభివృద్ధి మండలికి ఎన్నికలు జరగనున్న వేళ.. రాహుల్ పర్యటన ప్రాధాన్యత సంతరించుకుంది. భారత్‌-చైనా సరిహద్దుల్లోని పాంగాంగ్‌ సరస్సుకు ప్రయాణానికి ముందు రాహుల్‌ మాట్లాడుతూ.. ‘ప్రపంచంలోనే అత్యంత అందమైన ప్రదేశాల్లో పాంగాంగ్‌ సరస్సు ఒకటి అని మా నాన్న (రాజీవ్‌ గాంధీ) చెప్పేవారు’ అని అన్నారు. ఇందుకు సంబంధించిన ఫొటోలను రాహుల్ గాంధీ తన ఇన్‌స్టాగ్రామ్ పేజ్‌లో పంచుకున్నారు. అటు, కాంగ్రెస్ పార్టీ కూడా తన అధికారిక ఎక్స్ (ట్విట్టర్)‌లో ఈ ఫోటోలను షేర్ చేసింది.

ఈ రాత్రికి పాంగాంగ్‌ సరస్సు వద్ద ఉన్న టూరిస్ట్‌ క్యాంప్‌లో రాహుల్ గాంధీ బస చేయనున్నట్లు కాంగ్రెస్‌ వర్గాలు వెల్లడించాయి. మాజీ ప్రధాని రాజీవ్ గాంధీ జయంతిని (ఆగస్టు 20న) రాహుల్‌ ఈ సరస్సు వద్దే చేసుకోనున్నట్లు పేర్కొన్నారు. రెండు రోజుల పర్యటన కోసం గత గురువారం లడఖ్‌కు వెళ్లిన రాహుల్.. తన పర్యటను ఆగస్టు 25 వరకు పొడిగించుకున్నారు. అంతేకాదు, 2019 ఆగస్టు 5న జమ్మూ కశ్మీర్‌కు ప్రత్యేక హోదా కల్పించే రాజ్యాంగంలోని ఆర్టికల్ 370ను రద్దు చేసి.. లడఖ్, జమ్మూ కశ్మీర్ కేంద్ర పాలిత ప్రాంతాలుగా విభజించిన తర్వాత అక్కడ రాహుల్ గాంధీ పర్యటించడం ఇదే తొలిసారి.

సెప్టెంబరు 10న లడఖ్‌ అటానమస్‌ హిల్‌ డెవలప్‌మెంట్‌ కౌన్సిల్‌, కార్గిల్‌ ప్రాంతంలో కౌన్సిల్‌ ఎన్నికలు జరగనున్నాయి. ఈ ఎన్నికల్లో నేషనల్‌ కాన్ఫరెన్స్‌తో కాంగ్రెస్ కలిసి పోటీచేస్తోంది. ఈ క్రమంలో రాహుల్‌ అక్కడ పర్యటించడ ప్రాధాన్యత సంతరించుకుంది. ఇందులో భాగంగా ఆయన స్థానిక కాంగ్రెస్‌ నేతలతో సమావేశాలు నిర్వహించనున్నట్లు తెలుస్తోంది. లేహ్‌‌లో రాహుల్ గాంధీ మాట్లాడుతూ.. ‘భారతదేశానికి 1947లో స్వాతంత్ర్యం వచ్చింది.. దేశంలో స్వేచ్ఛను ఏకీకృతం చేయడం రాజ్యాంగబద్ధమైంది.. రాజ్యాంగం ఒక ఎత్తుగడ... రాజ్యాంగాన్ని అమలులోకి తెచ్చే విధానం రాజ్యాంగం దృక్పథానికి మద్దతు ఇచ్చే సంస్థలను ఏర్పాటు చేయడం. లోక్‌సభ, రాజ్యసభ ఈ అంశాలన్నింటినీ నిర్వహిస్తాయి.. కానీ, ఇప్పుడు ఆర్‌ఎస్‌ఎస్ చేస్తున్నది సంస్థాగత నిర్మాణంలో తన స్వంత వ్యక్తులను ఉంచడం’ అని పరోక్షంగా కేంద్ర ప్రభుత్వంపై విమర్శలు గుప్పించారు. జోడో యాత్ర ముగిసిన తర్వాత చండీగఢ్‌కు రాహుల్ గాంధీ ట్రక్కులో ప్రయాణించి.. డ్రైవర్ల సమస్యలను తెలుసుకున్నారు. ఢిల్లీలోని మెకానిక్‌లను కలుసుకున్నారు.