జేసీ ప్రభాకర్ రెడ్డితో టీడీపీ కార్యకర్తలు జాగ్రత్తగా ఉండాలి

తాడిపత్రి మున్సిపల్ ఛైర్మన్, టీడీపీ నేత జేసీ ప్రభాకర్ రెడ్డికి స్థానిక ఎమ్మెల్యే కేతిరెడ్డి పెద్దారెడ్డి సవాల్ చేశారు. జేసీ ఇంటి దగ్గర 120 అడుగుల రోడ్డు విస్తరణకు తాను సిద్ధమని.. జేసీ ప్రభాకర్ రెడ్డి తన ఇల్లు తొలగించుకుంటారా అని ప్రశ్నించారు. జేసీ ఇంటి దగ్గర రోడ్ల విస్తరణ జరిగితే ప్రజలకు సౌకర్యవంతంగా ఉంటుందన్నారు. ప్రభుత్వ పాఠశాల వైపున మాత్రమే సర్వే చేయాలంటే ఎలా అని.. ఉద్దేశపూర్వకంగానే జేసీ నాడు -నేడు పనులను అడ్డుకున్నారన్నారు. స్కూల్ కాంపౌండ్ వాల్ కూలుస్తానంటున్న జేసీ ప్రభాకర్ రెడ్డి పై కఠిన చర్యలు తీసుకోవాలన్నారు. కొడుకు అస్మిత్ రెడ్డిని హైదరాబాద్‌లో ఉంచి.. గొడవలకు కార్యకర్తలను పంపుతున్నారన్నారు. జేసీ ప్రభాకర్ రెడ్డి తీరుపై టీడీపీ శ్రేణులు అప్రమత్తంగా ఉండాలి హెచ్చరించారు పెద్దారెడ్డి.

మరోవైపు ఈ వివాదంపై తాడిపత్రి మున్సిపల్ చైర్మన్ జేసీ ప్రభాకర్ రెడ్డి స్పందించారు. తాను పనులు ఆపాలని ఎక్కడా అనడం లేదని.. తాడిపత్రి మున్సిపాలిటీకి సంబంధించి మాస్టర్ ప్లాన్ ఉందని.. దాని మేరకు మాత్రమే నిర్మాణం చేపట్టాలన్నారు. ప్రహరీ గోడకు సంబంధించి అధికారులకు ఎన్నిసార్లు వినతి పత్రం ఇచ్చినా కనీస స్పందన లేదన్నారు. మున్సిపల్ ఉద్యోగుల కోసం 1983లో లే అవుట్‌లోనే 50 అడుగుల రోడ్డు ఉందని.. తాడిపత్రి మున్సిపల్ ప్లానింగ్‌కు సంబంధించి సర్వే చేసి గోడ నిర్మాణం చేయాలని కోరుతున్నాను అన్నారు.

ఎమ్మెల్యే అన్నీ సగం సగం పనులు చేసి ఊరును పాడు చేస్తున్నారని ఆగ్రహం వ్యక్తం చేశారు. 60 అడుగులతో 2022లో రోడ్డు అప్రూవల్ అయినట్లు గుర్తుచేశారు జేసీ. మాస్టర్ ప్లాన్‌ను పట్టించుకోకుండా పనిగట్టుకుని ప్రహరీ గోడను నిర్మాణం చేస్తున్నారన్నారు. ఆర్‌అండ్‌బీ అధికారులకు ఆర్జీలు పెట్టుకున్నానని.. పెద్ద ఎత్తున పోలీసులు బందోబస్తు పెట్టుకుని గోడ కడుతున్నారని మండిపడ్డారు. ప్రజావేదికను కూల్చడానికి 10 నిమిషాలు పట్టలేదని.. అదే విధంగా ప్రహరీ గోడ ఎన్ని రోజులు కడితే అన్ని నిమిషాలలో కూల్చి వేయొచ్చన్నారు. ఐఏఎస్ అండ్ ఐపీఎస్‌కు సెల్యూట్ చేస్తున్నానని.. తప్పులు మీద తప్పులు చేస్తున్నారన్నారు. దయచేసి తప్పులు చేయొద్దన్నారు.