క్యూ ఆర్ కోడ్ పేరుతో కొత్త మోసాలు,,,,ఆన్‌లైన్ మోసాలపై పోలీసుల అలర్ట్

ఆన్‌లైన్‌లోక్రయవిక్రయాలు వంటి సైట్స్‌‌లో జరిగే సైబర్ మోసాల పట్ల జాగ్రత్తగా ఉండాలంటున్నారు ప్రకాశం జిల్లా ఎస్పీ మలిక గర్గ్. క్రయవిక్రయాలు సైట్లలో వస్తువులు అమ్మేటప్పుడు కొనుగోలుదారుడు పంపే క్యూఆర్‌ కోడ్‌ను స్కాన్‌ చేస్తే ఖాతాలో నగదు ఖతం అవుతాయంటున్నారు. గుర్తు తెలియని వ్యక్తులు క్రయవిక్రయాలు ప్రకటనలకు సంబంధించి పంపే లింకులు క్లిక్ చేయొద్దని సూచించారు. క్రయ విక్రయాలు లాంటి సెకండ్‌ హ్యాండ్‌ సెల్లింగ్‌ సైట్స్‌ పేరిట సైబర్ నేరగాళ్లు చేసే మోసాల ప‌ట్ల ప్ర‌జ‌లు అప్ర‌మ‌త్తంగా ఉండాల‌ని సూచించారు.

ఆన్‌లైన్‌ పోర్టల్స్‌‌లో కొంతమంది కేటుగాళ్లు తమ దగ్గర కొత్త వస్తువులు ఉన్నాయి.. వాటిని ఎక్కువ వాడలేదని చెబుతుంటారన్నారు. కానీ డబ్బు అవసరం పడి సగం రేటుకే ఇచ్చేస్తున్నామని.. కొంతమంది తాము ప్రభుత్వోద్యోగులమంటూ.. ఇతర అధికారులమంటూ ప్రచారం చేసుకుంటూ.. తక్కువ ధరకే విలువైన కార్లు, కెమెరాలు అమ్ముతామని నమ్మించి సైబర్ మోసాలకు పాల్పడుతున్నార‌ని తెలిపారు. అలాగే క్రయవిక్రయాలు సైట్లలో ఏవైనా పాత వస్తువులు అమ్మదలచినప్పుడు.. కేటుగాళ్లు కాల్‌ చేసి ఆ వస్తువు నచ్చిందని చెబుతారన్నారు. 'దానిని ఎంతైనా సరే కొంటామని నమ్మించి డబ్బులు చెల్లిస్తామని ఓ క్యూఆర్‌ కోడ్‌ను పంపించి.. మేము క్రెడిట్‌ కార్డ్‌ నుంచి పేమెంట్‌ చేయాలి దాని కోసం మీరు ఆ క్యూఆర్‌ కోడ్ స్కాన్‌ చేసి.. వస్తువు ప్రైజ్‌ ఎంతో అంత అమౌంట్‌ పంపిస్తే వెంటనే క్రెడిట్‌ కార్డ్‌ నుంచి మొత్తం అమౌంట్ మీ అకౌంట్ కి క్రెడిట్‌ అవుతుందంటారు. అమౌంట్ కోసం ఒక లింక్ పంపి సదరు లింకును క్లిక్ చెయ్యమని చెప్పి ఆ లింక్ క్లిక్ చేసిన తర్వాత ఎనీ డెస్క్, టీం వీవర్ వంటి యాప్స్ డౌన్లోడ్ అయ్యాక.. మీ బ్యాంకు వివరాలు ఎంటర్ చేయమని చెప్పి మీ బ్యాంకు పిన్ వంటి వివరాలు తెలుసుకుని విడతలవారీగా మీ అకౌంట్ నుంచి నగదును కాజేయడం జరుగుతుందని' తెలిపారు.

క్రయవిక్రయాలు లాంటి సైట్స్‌ లో సైబర్ మోసాలకు గురికాకుండా పాటించాల్సిన జాగ్రత్తలు తీసుకొవాలన్నారు. వ‌స్తువును ప్రత్యక్షంగా చూడకుండా వెబ్‌సైట్‌ల‌‌లోని ప్రకటనల‌ను చూసి నమ్మొద్దన్నారు. ఆన్‌లైన్‌లో వస్తువులను కొనుగోలు చేయాలన్నా, విక్రయించాలన్నా చాలా నమ్మకమైన సైట్ల నుంచి కొనడమే మంచిది అంటున్నారు. తక్కువ ధరకు వస్తుంది కదా అని ఏ సైట్‌లో పడితే ఆ సైట్‌లో కొనకుండ ఉండడమే ఉత్తమమని సూచించారు. క్రయ విక్రయాలు వంటి సైట్లలో వస్తువులు అమ్మదలచినప్పుడు కొనే వ్యక్తి నుంచి డబ్బులు రావడానికిబ్యాంక్ యూపీఐ పిన్ టైప్ చేయాల్సిన అవసరం లేదన్నారు.

గుర్తు తెలియని వ్యక్తులు క్రయవిక్రయాలు సైట్ లలో ప్రకటనలకు సంబంధించి క్యూఆర్‌ కోడ్‌లు పంపిస్తే వాటిని స్కాన్ చేయొద్దని సూచించారు. క్యూఆర్‌ కోడ్‌ ద్వారా డబ్బులు చెల్లించమంటే అది మోసమని గ్రహించాలన్నారు. అనుమానితంగా ఎవరైనా ఏదైనా లింక్ పంపితే వాటిని క్లిక్ చేస్తే యాప్‌లు డౌన్లోడ్ అవుతుందేమో జాగ్రత్త పడాలి అన్నారు. ఒకవేళ అనుమానం వస్తే.. వెంటనే మొబైల్ డేటాను ఆఫ్ చేయాలని.. లేని పక్షంలో ఫ్లైట్ మోడ్‌లో పెట్టాలని సూచించారు. కేవలం ఫొటోల ద్వారానే వ‌స్తువుల‌ను అమ్ముతామ‌ని చెబితే అది ముమ్మాటికీ మోస‌మేన‌ని గ్ర‌హించాలన్నారు.

ఒకవేళ ఎవరైనా తాము విక్రయించాలని భావించిన వస్తువుని పార్సిల్ చేసి పంపమంటే పంపవద్దని.. అలా పంపితే మోసపోతారని హెచ్చరించారు. ఒకవేళ కొనుగోలు చేయాలనుకుంటే.. ఆ వస్తువు డెలివరీ కాకముందే నగదు ఇవ్వొద్దన్నారు. వస్తువుల క్రయ విక్రయాల ప్రకటనల‌లో ఉన్న వివరాలను సరి చూసుకోవాలని.. ప్రత్యక్షంగా కలిసి బిల్స్, పత్రాలన్నింటిని స్వయంగా పరిశీలించి, ఆ త‌రువాతే వ‌స్తువుల‌ను, వాహ‌నాల‌ను కొనాలన్నారు. ఎవరైనా ఈ విధంగా మోసపోయినట్లయితే వెంటనే పోలీసులకు సమాచారం అందించాలని.. సైబర్ హెల్ప్ లైన్ నెంబర్ 1930 కు కాల్ చేయాలన్నారు. అంతేకాదు నేషనల్ సైబర్ క్రైమ్ రిపోర్టింగ్ పోర్టల్ www.cybercrime.gov.in లో ఫిర్యాదు చేయాలని సూచించారు.