తెలంగాణలో బాలుడ్ని కిడ్నాప్ కలకలం,,,, ఏపీలో నిందితుల అరెస్ట్

తెలంగాణలో బాలుడి కిడ్నాప్ కథ ఏపీకి చేరింది. రెండు రాష్ట్రాల పోలీసుల సమన్వయంతో ఈ కథకు ఎండ్ కార్డ్ పడింది. తెలంగాణలోని రంగారెడ్డి జిల్లా కడ్తాల్‌ ప్రాంతంలో నర్సరీ యజమాని లోకేష్, లక్ష్మీ దంపతులకు 17 ఏళ్ల కుమారుడు నిరంజన్‌. తండ్రి లోకేష్ చనిపోవడంతో తల్లితో కలిసి నిరంజన్‌ నర్సరీని చూసుకుంటున్నాడు. ఆదివారం ఉదయం అనంతపురం జిల్లా కణేకల్లుకు చెందిన బసవరాజు అనే వ్యక్తి తమకు నారు కావాలని ఫోన్‌చేసి నర్సరీకి వస్తున్నట్లు చెప్పారు.

ఆదివారం తెల్లవారు జామున నర్సరీ దగ్గరికి వచ్చారు. అప్పటికే బసవరాజుతో పాటు సాయి, భుజంగం, కుమార్‌ కలిసి బాలుడిని కారులోకి లాక్కొని కిడ్నాప్‌ చేశారు. ఉదయమే నర్సరీకి వెళ్తున్నానని చెప్పి వెళ్లిన కుమారుడు కనిపించకపోవడంతో తల్లి లక్ష్మి ఆందోళన వ్యక్తం చేశారు. కుమారుడి మొబైల్‌కు ఫోన్‌ చేయగా.. దుండగులు తీసుకుని మాట్లాడారు. నిరంజన్‌ను కిడ్నాప్‌ చేశామని.. తమకు రూ.2 కోట్లు ఇస్తే వదిలి పెడతామన్నారు. వెంటనే బాలుడి తల్లి పోలీసులకు సమాచారం ఇచ్చారు. ఫిర్యాదు స్వీకరించిన పోలీసులు మొబైల్ సిగ్నల్స్ ఆధారంగా వాహనం ఎక్కడికి వెళ్తుందో తెలుసుకున్నారు.

వెంటనే తెలంగాణ పోలీసులు కర్నూలు జిల్లా ఆలూరు పోలీసులకు సమాచారం ఇచ్చారు. వెంటనే ఆలూరు ఎస్సై నాయక్‌, సిబ్బందితో కలిసి వాహనాల నాకాబందీ నిర్వహించారు. ఇంతలో కారు అటు వైపుగా రాగా.. వాహనాన్ని, అందులో ఉన్న నలుగురు కిడ్నాపర్లను, బాలుడిని అదుపులోకి తీసుకున్నారు. బసవరాజు గతంలో బళ్లారిలో నిరంజన్‌ తండ్రి లోకేష్ నర్సరీ నిర్వహిస్తున్న సమయంలో వారి దగ్గర పనిచేశారని చెప్పారు పోలీసులు. అప్పుల్లో కూరుకుపోయిన అతడికి నిరంజన్‌ తల్లిదండ్రులు కొంతసాయం చేసినట్లు సమాచారం. ఇప్పుడు నిరంజన్‌ను కిడ్నాప్ చేయడం చర్చనీయాంశమైంది. డబ్బుల కోసం ఇలా చేసినట్లు తెలుస్తోది. నిందితులను, తెలంగాణ పోలీసులకు అప్పగిస్తామని ఆలూరు పోలీసులు తెలిపారు.