గుడివాడలో చిరు బర్త్ డే సెలబ్రేషన్స్,,,,హాజరైన మాజీ మంత్రి కొడాలి నాని

గుడివాడలో జరిగిన మెగాస్టార్ చిరంజీవి పుట్టినరోజు వేడుకల్లో మాజీ మంత్రి కొడాలి నాని పాల్గొన్నారు. కేక్ కట్ చేసి, చిరంజీవి అభిమానులకు తినిపించారు. తాను చిరంజీవిని విమర్శించినట్లు నిరూపించాలని నాని ఛాలెంజ్ చేశారు. తాను శ్రీరామ అన్నా సరే టీడీపీ, జనసేన పార్టీలకు బూతు మాటలుగా వినపడతాయన్నారు. తానేం మాట్లాడానో చిరంజీవికి, ఆయన అభిమానులకు తెలుసని.. తామంతా క్లారిటీగానే ఉన్నామన్నారు. రాజకీయంగా చిరంజీవి విమర్శిస్తే ఏం జరుగుతుందో తనకు తెలుసన్నారు. సీఎం జగన్ గురించి, తమ గురించి మాట్లాడితే ఎంతటి వారినైనా చీల్చి చెండాడతాను అన్నారు.

ఎవరి జోలికి వెళ్ళని పెద్దాయన చిరంజీవిని విమర్శించేంత సంస్కారహీనుడిని కాదన్నారు. చిరంజీవి అభిమానుల ముసుగులో టీడీపీ, జనసేన పార్టీ శ్రేణులు గుడివాడ రోడ్ల మీద దొర్లారన్నారు. చిరంజీవికి, తమకు మధ్య గ్యాప్ సృష్టించాలని టీడీపీ, జనసేనలు కుట్ర చేశాయన్నారు. ప్రజారాజ్యం తరపున తన కార్యాలయం మీదుగా ర్యాలీగా వెళ్లిన చిరంజీవికి చేతులెత్తి నమస్కారం పెట్టానన్నారు. ఆయనను అనేక సందర్భాల్లో తాను కలిశానన్నారు.

పెద్దాయనగా చిరంజీవి చెప్పే సూచనలు పాటిస్తామని.. తమకు ఇచ్చినట్లే.. డ్యాన్సులు, నటన చేతకాని ఇండస్ట్రీలోని పకోడీ గాళ్ళకు చిరంజీవి సలహాలు ఇవ్వాలనే తాను చెప్పానన్నారు. ఇండస్ట్రీలో శిఖరాగ్రాన ఉన్న చిరంజీవికి డాన్సులు, యాక్షన్ రాదా.. తాను ఆయన గురించి మాట్లాడినట్లు ఎట్లా అవుతుందన్నారు. తన వెంట ఉన్న వారిలో 60 శాతం చిరంజీవి అభిమానులే ఉన్నారన్నారు. ఇటీవల వాల్తేరు వీరయ్య మూవీ 200 రోజులు సక్సెస్ మీట్‌లో చిరంజీవి చేసిన కామెంట్స్ హీట్ పెంచాయి. సినిమా ఇండస్ట్రీ గురించి కాకుండా.. రాష్ట్రంలోని సమస్యలపై ఆలోచిస్తే మంచిదని వ్యాఖ్యానించారు. అలాగే పిచ్చుక మీద బ్రహ్మాస్త్రంలా సినిమా ఇండస్ట్రీ మీద ఎందుకు పడతారంటూ వ్యాఖ్యలు చేశారు.

చిరు వ్యాఖ్యలపై కొడాలి నాని స్పందించిన సంగతి తెలిసిందే. పకోడిగాళ్లు అంటూ కొడాలి నాని పరోక్షంగా చిరంజీవిని టార్గెట్ చేశారనే చర్చ జరిగింది. ప్రభుత్వం ఎలా ఉండాలో సినిమా ఇండస్ట్రీలో చాలామంది పకోడీగాళ్లు సలహాలిస్తున్నారని వ్యాఖ్యలు చేశారు. ఈ వ్యాఖ్యలపై చిరంజీవి అభిమాన సంఘాలు గుడివాడలో ఆందోళనకు దిగాయి. పట్టణంలో ర్యాలీ నిర్వహించి.. కొడాలి నాని క్షమాపణలు చెప్పాలంటూ నినాదాలు చేశారు. అయితే నాని మాత్రం చిరంజీవి అభిమాన ముసుగులో టీడీపీ, జనసేన పార్టీ వాళ్లు ఇలా రాద్దాంతం చేశారని ఆరోపిస్తున్నారు.