చిరంజీవి వ్యాఖ్యల్లో తప్పేమీ లేదు,,,,,సుమన్ ఆసక్తికర వ్యాఖ్యలు

ఆంధ్రప్రదేశ్ రాజకీయాలపై నటుడు సుమన్ ఆసక్తికర వ్యాఖ్యలు చేశారు. సినిమాలతో పాటూ హీరోలు, నటుల పారితోషికాలపై మాట్లాడడం మానుకోవాలని హితవు పలికారు. సినీ ప్రముఖుల పారితోషికాలకు, రాజకీయాలకు ఏంటి సంబంధం ఏంటని ప్రశ్నించారు.. సినీ పరిశ్రమ వాళ్లు పకోడీగాళ్లు కాదు, అలా విమర్శించిన వాళ్లే బజ్జీగాళ్లు అంటూ ఘాటు వ్యాఖ్యలు చేశారు. రాజకీయాల్లో వ్యక్తిగత విమర్శలు సరైనవి కాదన్నారు. ఇటీవల మెగాస్టార్‌ చిరంజీవి చేసిన వ్యాఖ్యల్లో తప్పేముందని సుమన్‌ ప్రశ్నించారు.

సూపర్‌స్టార్‌ రజనీకాంత్‌ను టార్గెట్‌ చేసి మాట్లాడడం బాధ కలిగించిందన్నారు సుమన్. రాజకీయాలతో సంబంధం లేని రజనీకాంత్‌పై ఎందుకు బురద చల్లుతున్నారన్నారు. పవన్ కళ్యాణ్ వివాహాలపై చేస్తున్న విమర్శలపైనా స్పందించారు. రాజకీయ నాయకులకే రెండు, మూడు కుటుంబాలు ఉన్నాయని.. ఆ పేర్లు చెప్పను అన్నారు. ఎక్కువ పెళ్లిళ్లు చేసుకున్న వారు రాజకీయం చేయకూడదన్న చట్టం ఉందా అని ప్రశ్నించారు. కొన్ని కారణాల వల్ల ఇంకో వివాహం చేసుకోవాల్సి వస్తుందని.. దాన్ని తప్పుబట్టి పవన్‌ కళ్యాణ్‌పై బురద చల్లడం సరికాదు అన్నారు.

పవన్ కళ్యాణ్ మూడు పెళ్లిళ్లు చేసుకుంటే వారికి వచ్చిన బాధ ఏంటన్నారు. పవన్‌ మాజీ భార్యలు తమకు న్యాయం చేయాలని వాళ్లను ఏమైనా కోరారా అని ప్రశ్నించారు. పలు పెళ్లిళ్లు చేసుకున్నవారు చాలా మంది ఉన్నారని.. దమ్ముంటే వారిపై కామెంట్‌ చేయాలి అన్నారు. రాజకీయంగా పవన్‌ను ఎదుర్కోవాలే గాని.. వ్యక్తిగతంగా దూషించడం సరికాదన్నారు. చంద్రబాబు విజన్‌ ఉన్న వ్యక్తి, ఏపీని అన్ని విధాలుగా ఆయనే అభివృద్ధి చేశారని గుర్తు పెట్టుకోవాలి అన్నారు.