నేటి నుంచి శ్రీవారి పవిత్రోత్సవాలు.. మూడు రోజుల పాటు ఈ సేవలు రద్దు

ఆదివారం నుంచి ఈ నెల 29 వరకు మూడు రోజుల పాటు తిరుమల శ్రీవారికి పవిత్రోత్సవాలు నిర్వహించనున్నారు. శ్రీవారి పవిత్రోత్సవాలకు శనివారం శాస్త్రోక్తంగా అంకురార్పణ జరిగింది. ఇందులో భాగంగా సేనాధిపతి విష్వక్సేనులను ఆలయ మాడవీధుల మీదుగా ఊరేగింపుగా వసంత మండపానికి వేంచేపు చేసి, మృత్సంగ్రహణం, ఆస్థానం నిర్వహించారు. అనంతరం ఆలయంలోని పవిత్ర మండపంలో అంకురార్పణ కార్యక్రమం సాగింది. అంతకు ముందు శనివారం ఉదయం శ్రీవారి మూలవిరాట్‌ ఎదురుగా ఆచార్య రుత్విక్‌వరణం నిర్వహించారు.

భగవంతుని ఆజ్ఞ మేరకు అర్చకులకు బాధ్యతలు కేటాయించారు. ఆగస్టు 27 పవిత్ర ప్రతిష్ఠ, ఆగస్టు 28న పవిత్ర సమర్పణ, ఆగస్టు 29న పూర్ణాహుతితో ఉత్సవాలు ముగియనున్నాయి. పవిత్రోత్సవాలు నేపథ్యంలో కళ్యాణోత్సవం, ఆర్జిజ బ్రహ్మోత్సవం, ఊంజల్ సేవ, సహస్ర దీపాలంకరణ వంటి ఆర్జిత సేవలను టీటీడీ మూడు రోజుల పాటు రద్దుచేసింది. తెలుగు క్యాలెండర్ ప్రకారం.. ఏటా శ్రావణ మాసం శుక్ల పక్షంలో వచ్చే ఏకాదశి, ద్వాదశి, త్రయోదశి రోజున మూడు రోజుల పాటు శ్రీవారి పవిత్రోత్సవాలను నిర్వహిస్తారు. ఏడాది పొడువునా రోజూ శ్రీవారి దేవాలయంలో జరిగే పూజలు, అర్చనలు, ప్రత్యేక ఆరాధన సమయంలో భక్తుల నుంచి గానీ, తిరుమల తిరుపతి దేవస్థానం సిబ్బంది గానీ కొన్ని పొరపాట్లు జరిగే అవకాశం ఉంటుంది. దీని వల్ల శ్రీవారి ఆలయానికి ఉన్న పవిత్రతకు ఏదైనా లోపం జరిగే అవకాశం ఉంది. అందుకే ఇలాంటి దోషాలన్నీ తొలగిపోవాలని.. ఆగమ శాస్త్రంలోని నియమాలను అనుసరించి ఏటా పవిత్రోత్సవాలను నిర్వహిస్తారు.

ఈ ఉత్సవాలను మొదటిసారిగా 1463లో సాల్వ మల్లయ్య దేవరాజా ఆధ్వర్యంలో నిర్వహించారు. 15-16వ శతాబ్దాల్లో ఈ ఉత్సవాలు జరిగినట్టు కొన్ని ఆధారాలున్నాయి. అయితే తిరిగి 1962 నుంచి టీటీడీ ఈ ఉత్సవాలను పునరుద్ధరించింది. పవిత్రోత్సవాలు జరిగే మూడు రోజులు శ్రీవారికి స్నపన తిరుమంజనం.. హోమం నిర్వహిస్తారు. సాయంకాలం సంధ్యా వేళలో స్వామివారి ఉత్సవ విగ్రహాలకు ప్రత్యేక ఆభరణాలతో అలంకరిస్తారు. అదే సమయంలో శ్రీదేవి, భూదేవి సమేత మలయప్ప స్వామి వారు తిరుమల మాఢ వీధుల్లో విహరించి భక్తులందరికీ దర్శనమిస్తారు.