బ్రాండింగ్ కోసం ఏపీలోని ఎయిర్‌పోర్టుల్లో ప్రత్యేకంగా స్పెషల్ స్టాల్స్ ఏర్పాట్లు

ఏపీ ప్రభుత్వం కీలక నిర్ణయం తీసుకుంది. రాష్ట్రంలో చేనేత వస్త్రాలకు జాతీయ, అంతర్జాతీయ స్థాయి బ్రాండింగ్‌ చేసేందుకు ప్రభుత్వం సరికొత్త ఆలోచన చేసింది. ఇప్పటికే ఆర్టీసీ బస్‌స్టాండ్‌లు, రైల్వే స్టేషన్‌లు, ప్రముఖ పర్యాటక, పుణ్యక్షేత్రాలు, ప్రభుత్వ కార్యాలయాల్లో ఆప్కో స్టాల్స్‌ ఏర్పాటు చేసింది. తాజాగా విమానాశ్రయాల్లోనూ ప్రత్యేకంగా స్టాల్స్‌ను ఏర్పాటు చేశారు. రాష్ట్రంలోని విజయవాడ (గన్నవరం), తిరుపతి (రేణిగుంట) ఎయిర్‌పోర్టుల్లో కూడా స్టాల్స్ ఏర్పాటు చేసిన సంగతి తెలిసిందే. ఈ స్టాల్స్‌కు ఆదరణ పెరుగుతోంది. ఇటీవల విశాఖ విమానాశ్రయంతో పాటు హైదరాబాద్‌, మృగనాయని(భోపాల్‌), కర్నూలు జిల్లా లేపాక్షి, మంగళగిరిలోనూ ఆప్కో నూతన షోరూమ్‌లను ప్రారంభించారు. ప్రైవేటు వస్త్ర వ్యాపార సంస్థలకు దీటుగా అధునాతన వసతులతో ఆప్కో షోరూమ్‌లను ప్రారంభిస్తున్నారు.

చేనేతను ప్రజల్లోకి మరింత తీసుకెళ్లేందుకు ఒకవైపు దేశవ్యాప్తంగా ఆప్కో స్టాల్స్, షోరూమ్‌లను పెంచుతున్నారు. స్థానికంగా డిస్కౌంట్‌ సేల్, చేనేత సంఘాల ఎగ్జిబిషన్‌లు, ఫ్యాషన్‌ షో వంటి కార్యక్రమాలను నిర్వహిస్తున్నారు. అలాగే సరికొత్త డిజైన్లతోను, వినూత్నమైన, నాణ్యమైన చేనేత వస్త్రాల తయారీని ప్రోత్సహిస్తున్నారు. ఉద్యోగులు, ప్రజలు వారానికి ఒక్కరోజైనా చేనేత వ్రస్తాలు ధరించేలా కార్యక్రమాలను నిర్వహిస్తున్నారు. చేనేత రంగానికి ఊతమిచ్చేలా చేనేత కార్మికులకు ప్రభుత్వం అండగా నిలుస్తోందన్నారు. చేనేత వస్త్రాల విక్రయాలను ప్రోత్సహించి ఆ రంగంపై ప్రత్యక్షంగా, పరోక్షంగా ఆధారపడిన సుమారు 1.75లక్షల కుటుంబాలకు అండగా నిలిచేలా ఆప్కో ద్వారా పలు చర్యలు చేపట్టామన్నారు. రాష్ట్రంలోని చేనేత సొసైటీల దగ్గర ఉన్న వ్రస్తాల నిల్వలను క్లియర్‌ చేసి సొసైటీలను ఆదుకునేలా విక్రయాలు పెంచేందుకు చర్యలు తీసుకున్నామన్నారు. ఆప్కో షోరూంల ద్వారా ఈ ఏడాది రూ.50కోట్ల విక్రయాలు జరపాలని నిర్ణయించామన్నారు.