చెరువులో పడిపోయిన ఏడాదిన్నర బాలుడు,,,అంబులెన్స్ లేక ద్విచక్రవాహనంపై తరలించిన తండ్రి

అంబులెన్స్ లేక కొడుకు మృతదేహంతో ఓ వ్యక్తి 70 కిలోమీటర్లు బైక్‌పై ప్రయాణించాడు. ఏడాదిన్నర బాలుడి మృతదేహాన్ని తండ్రి పాలిథిన్ కవర్‌లో చుట్టి.. తన స్నేహితుడి సాయంతో పోస్ట్‌మార్టం కోసం బైక్‌పై తరలించిన హృదయ విదారక ఘటన చత్తీస్గఢ్లో చోటుచేసుకుంది. ఈ ఘటన వెలుగులోకి రావడంతో అధికారులు స్పందించారు. విచారణ జరిపి బాధ్యులపై కఠిన చర్యలు తీసుకుంటామని చెప్పారు. కోర్బా జిల్లా వికాస్ఖండ్ మండలం అడ్సేనా గ్రామానికి చెందిన దారస్ రామ్ యాదవ్‌కు భార్య, ఏడాదిన్నర కుమారుడు.

రెండు రోజుల కిందట రామ్ యాదవ్ భార్య తన బిడ్డను తీసుకుని పొలానికి వెళ్లింది. కొడుకును ఓ చోట ఉంచి ఆమె వ్యవసాయ పనుల్లో నిమగ్నమైంది. ఆ బాలుడు ఆడుకుంటూ వెళ్లి.. దగ్గరలో ఉన్న చెరువులో ప్రమాదవశాత్తు పడి మునిగిపోయాడు. కొద్దిసేపటి తర్వాత బాలుడు కనిపించకపోవడంతో తల్లి సహా అక్కడున్న వారు.. చిన్నారి కోసం వెతకడం ప్రారంభించారు. ఈ క్రమంలో చెరువులో బాలుడి పడిపోయినట్టు గ్రహించి.. అపస్మారక స్థితిలో ఉన్న ఆ చిన్నారిని బయటకు తీశారు. హూటాహుటిన చికిత్స కోసం సమీపంలోని ప్రాథమిక ఆరోగ్య కేంద్రానికి తరలించారు.

బాలుడ్ని పరీక్షించిన వైద్యులు.. మృతి చెందినట్లు నిర్దారించారు. అయితే, చిన్నారికి పోస్టుమార్టం నిర్వహించాల్సి ఉందని, జిల్లా ఆస్పత్రికి తీసుకెళ్లాలని సూచించారు. దీంతో 70 కిలోమీటర్ల దూరంలో ఉన్న జిల్లా ఆస్పత్రికి మృదేహాన్ని తరలించేందుకు అంబులెన్సు ఏర్పాటు చేయాలని రామ్ యాదవ్ కోరాడు. అయితే తమ వద్ద అంబులెన్స్ లేదని చెప్పిన వైద్యులు.. సొంతంగా ఏర్పాట్లు చేసుకుని ఆస్పత్రికి వెళ్లాలని చెప్పారు. నిస్సాహాయ స్థితిలో ఉన్న ఆ తండ్రి.. పుట్టెడు దుఃఖాన్ని దిగమింగుకుని బైక్‌పై వెళ్లాలని నిర్ణయించుకున్నాడు. పాలిథిన్ కవర్‌లో కుమారుడి మృదేహాన్ని చుట్టి.. స్నేహితుడి సాయంతో బైక్‌పై ఆస్పత్రికి తీసుకెళ్లాడు. ఈ విషయం జిల్లా వైద్యాధికారి దృష్టికి వెళ్లడంతో ఆయన స్పందించారు. విచారణ జరిపి నిర్లక్ష్యంగా వ్యవహరించిన వారిపై కఠిన చర్యలు తీసుకుంటామని చెప్పారు.