భారత్‌కు బాసటగా నిలిచిన ఆ నాలుగు దేశాలు

సరిహద్దుల్లో తరచూ కవ్వింపులకు పాల్పడుతూ.. కయ్యానికి కాలుదువ్వుతోన్న చైనా మ్యాప్‌తో మరో వివాదానికి తెర లేపిన విషయం తెలిసిందే. ఇటీవల విడుదల చేసిన మ్యాప్‌లో మన ఈశాన్య రాష్ట్రం అరుణాచల్ ప్రదేశ్, అక్సాయ్‌ చిన్ ప్రాంతాలను కూడా కలుపుకుంది. అయితే ఈ మ్యాప్‌పై తీవ్ర అసంతృప్తి వ్యక్తం చేసిన భారత విదేశాంగ శాఖ.. చైనా తీరును ఎండగట్టింది. అయితే భారత్ స్పందన తర్వాత కూడా డ్రాగన్ తన వక్రబుద్ధిని మార్చుకోకపోవడం మరింత వివాదాస్పదంగా మారింది.

భారత భూభాగాలైన అరుణాచల్ ప్రదేశ్, అక్సాయి చిన్‌లను తమవిగా చూపుతూ పొరుగు దేశం చైనా మ్యాప్ విడుదల చేయడంతో మరోసారి ఇరు దేశాల మధ్య ఉద్రిక్తతలు తారాస్థాయికి చేరాయి. ఈ నేపథ్యంలో చైనా చర్యలను వియత్నాం సహా నాలుగు ఆసియా దేశాలు తీవ్రంగా ఖండించాయి. ఈ వారం విడుదల చేసిన చైనా అధికారిక మ్యాప్ స్ప్రాట్లీ, పారాసెల్ దీవులపై తమ సార్వభౌమాధికారాన్ని, జలాల అధికార పరిధిని ఉల్లంఘిస్తోందని వియత్నాం ప్రభుత్వం ఓ ప్రకటనలో పేర్కొంది. ఈ మేరకు అధికారక వెబ్‌సైట్‌లోని దీనిని పొందుపరిచింది.

మ్యాప్‌లోని తొమ్మిది చుక్కల రేఖ ఆధారంగా పేర్కొన్న చైనా సార్వభౌమాధికారం, సముద్ర జలాలపై వాదనలు చట్టవిరుద్దమైనని అని వియత్నాం విదేశాంగ మంత్రిత్వ శాఖ ప్రతినిధి ఫామ్ థు హాంగ్ అన్నారు. చెల్లుబాటుకాని మ్యాప్ ఆధారంగా దక్షిణ చైనా సముద్రంలో చైనా చేస్తున్న అన్ని వాదనలను వియత్నాం తీవ్రంగా వ్యతిరేకిస్తుంది అని హాంగ్ తన ప్రకటనలో తెలిపారు. ఇతర దేశాలు కూడా ఈ మ్యాప్‌ను తిరస్కరించాయి. అరుణాచల్ ప్రదేశ్‌లోని కొన్ని ప్రాంతాలను తమేనంటూ చైనా రూపొందించిన మ్యాప్‌ను భారత్ తప్పుబట్టింది. దక్షిణ చైనా సముద్రంలో చైనా సామ్రాజ్యవాద కాంక్షను తాము గుర్తించడం లేదని ఫిలిప్పీన్స్ పేర్కొంది. మలేషియా, తైవాన్ ప్రభుత్వాలు కూడా ఘాటుగా స్పందిస్తూ.. చైనా తీరును ఎండగట్టాయి.

కాగా, బీజింగ్‌లో బుధవారం జరిగిన మీడియా సమావేశంలో మ్యాప్ గురించి విలేకర్లు అడిగి ప్రశ్నకు చైనా విదేశాంగ మంత్రిత్వ శాఖ ప్రతినిధి వాంగ్ వెన్బిన్ సమాధానం ఇచ్చారు. ‘సంబంధిత పక్షాలు లక్ష్యం ప్రశాంతంగా, అతిగా మాట్లాడకుండా ఉండలేవు’ అని తమ ప్రభుత్వం భావిస్తున్నట్లు చెప్పారు. మ్యాప్‌ను విడుదల చేశాం కాబట్టి ప్రచురణకర్తలు, కంపెనీలు, ఇతరులు ప్రభుత్వం సూచించిన అధికారిక సంస్కరణలను అనుసరిస్తాయన్నారు. మ్యాప్‌ల వినియోగించే విషయంలో చైనా ప్రభుత్వంతో కొన్నిసార్లు విదేశీ సంస్థలు ఇబ్బందులను ఎదుర్కొంటాయి. దక్షిణ చైనా సముద్రంలో 80% కంటే ఎక్కువ భాగాన్ని చైనా తమదని వాదిస్తోందది. హైనాన్ ద్వీపానికి దక్షిణంగా 1,100 మైళ్ల (1,800 కిలోమీటర్లు) దూరంలో ఉన్న అస్పష్టమైన తొమ్మిది-డ్యాష్ లైన్‌ను చూపే 1947 మ్యాప్‌ను ఇందుకు ఉదాహరణగా చూపుతోంది. వియత్నాం, ఫిలిప్పీన్స్, బ్రూనై, మలేషియా, తైవాన్‌లు ఈ విషయంలో చైనాతో విబేధించాయి.