తుపాను ఎఫెక్ట్ .. ఈ జిల్లాల్లో భారీ నుంచి అతి భారీ వర్షాలు.. వాతావరణ హెచ్చరిక

ఏపీవాసులకు అలర్ట్. ఆంధ్రప్రదేశ్‌లో వచ్చే నాలుగు రోజుల పాటు వర్షాలు కురవనున్నాయి. నైరుతి బంగాళాఖాతంలో ఏర్పడిన వాయుగుండం.. తీవ్ర వాయుగుండంగా మారినట్లు ఏపీ విపత్తుల నిర్వహణ సంస్థ తెలిపింది. ఈ తీవ్ర వాయుగుండం ఉత్తర వాయువ్య దిశగా కదులుతూ బుధవారం నాటికి తుపానుగా బలపడే అవకాశం ఉందని ఏపీ విపత్తుల నిర్వహణ సంస్థ ఎండీ రోణంకి కూర్మనాథ్ తెలిపారు. తుపానుగా మారిన తర్వాత ఉత్తర వాయువ్య దిశగా కదులుతూ శ్రీలంక తీరాన్ని దాటి తమిళనాడు తీరం వైపు వెళ్ళే అవకాశం ఉందన్నారు.

తీవ్ర వాయుగుండం, తుపాను ప్రభావంతో బుధవారం కోస్తాంధ్ర, రాయలసీమలోని కొన్నిచోట్ల భారీ వర్షాలు కురుస్తాయని ఏపీ విపత్తుల నిర్వహణ సంస్థ వెల్లడించింది. గురు,శుక్ర, శని వారాల్లో కోస్తాంధ్ర, రాయలసీమలోని కొన్ని ప్రాంతాల్లో భారీ నుంచి అతి భారీ వర్షాలు కురిసే అవకాశం ఉందని హెచ్చరించింది. మిగతా చోట్ల తేలికపాటి నుంచి మోస్తరు వర్షాలు కురుస్తాయని.. ప్రజలు అప్రమత్తంగా ఉండాలని సూచించింది. భారీ నుంచి అతి భారీవర్షాలు, తుపాను నేపథ్యంలో మత్స్యకారులు సముద్రంలోకి చేపల వేటకు వెళ్లవద్దని సూచించింది.

 అలాగే ఇప్పటికే చేపలవేటకు వెళ్లిన మత్స్యకారులను వెనక్కి పిలిపించాలని ఏపీ విపత్తుల నిర్వహణ సంస్థ ఎండీ రోణంకి కూర్మనాథ్.. ప్రభుత్వ అధికారులకు సూచించారు. తుపాను ప్రభావంతో బుధవారం సాయంత్రం నుంచి దక్షిణ కోస్తా తీరం వెంబడి గంటకు 50 నుంచి 70 కిలోమీటర్ల వేగంతో ఈదురుగాలులు వీస్తాయని తెలిపారు. భారీ వర్షసూచన నేపథ్యంలో రైతులు వ్యవసాయపనుల్లో జాగ్రత్తలు తీసుకోవాలని.. పంటపొలాల్లో నుంచి వర్షపు నీరు బయటకు వెళ్లేలా ఏర్పాట్లు చేసుకోవాలని సూచించారు.

ఏపీలో వచ్చే నాలుగురోజులు భారీ వర్షాలు

మరోవైపు తీవ్ర వాయుగుండం, తుపాను ప్రభావంతో బుధవారం నెల్లూరు, సత్యసాయి, వైఎస్ఆర్, అన్నమయ్య, చిత్తూరు, తిరుపతి జిల్లాలలో కొన్నిచోట్ల మోస్తరు నుంచి భారీ వర్షాలు కురిసే అవకాశం ఉంది. అలాగే గురువారం (నవంబర్ 28) కాకినాడ, కోనసీమ, కృష్ణా, నెల్లూరు, సత్యసాయి, వైఎస్ఆర్, అన్నమయ్య, చిత్తూరు, తిరుపతి జిల్లాలలో కొన్ని చోట్ల భారీ నుంచి అతి భారీవర్షాలు కురుస్తాయని ఏపీ విపత్తుల నిర్వహణ సంస్థ అంచనా వేసింది. శ్రీకాకుళం, విజయనగరం, మన్యం, అల్లూరి, అనకాపల్లి, ఉభయగోదావరి జిల్లాలు, ఏలూరు, గుంటూరు, బాపట్ల, ప్రకాశం జిల్లాలలో తేలికపాటి నుంచి మోస్తరు వర్షాలు కురవనున్నాయి.

శుక్రవారం (నవంబర్ 29) నెల్లూరు, శ్రీసత్యసాయి, వైఎస్ఆర్, అన్నమయ్య, చిత్తూరు, తిరుపతి జిల్లాల్లోని కొన్ని ప్రాంతాల్లో భారీ నుంచి అతి భారీ వానలు కురుస్తాయని.. విశాఖ, అనకాపల్లి, కాకినాడ, కోనసీమ, ఉభయగోదావరి జిల్లాలు, ఏలూరు, కృష్ణా, ఎన్టీఆర్, గుంటూరు, బాపట్ల, పల్నాడు, ప్రకాశం జిల్లాలలో అక్కడక్కడా మోస్తరు నుంచి భారీ వర్షాలు కురుస్తాయని తెలిపింది. మిగతాచోట్ల తేలికపాటి నుంచి మోస్తరు వానలు కురవనున్నాయి.

ఇక నవంబర్ 30వ తేదీన నెల్లూరు, శ్రీసత్యసాయి, వైఎస్ఆర్, అన్నమయ్య, చిత్తూరు, తిరుపతి జిల్లాలలో అక్కడక్కడా భారీ వర్షాలు కురవనున్నట్లు ఏపీ విపత్తుల నిర్వహణ సంస్థ వెల్లడించింది. విజయనగరం, విశాఖ, కాకినాడ, అనకాపల్లి, కోనసీమ, ఉభయగోదావరి జిల్లాలు, ఏలూరు, కృష్ణా, గుంటూరు, బాపట్ల, పల్నాడు, ప్రకాశం జిల్లాలో మోస్తరు నుంచి భారీ వర్షాలు కురుస్తాయని అంచనా వేసింది. మిగతా చోట్ల తేలికపాటి నుంచి మోస్తరు వర్షాలు కురవనున్నాయి.