ఏ ఎన్నికలు జరిగినా.. ఓడిపోయిన పార్టీలు, అభ్యర్థులు.. ఎలక్ట్రానికి ఓటింగ్ మెషీన్(ఈవీఎం)లపై ఆరోపణలు చేయడం సర్వసాధారణం అయిపోయింది. తాజాగా వెలువడిన మహారాష్ట్ర అసెంబ్లీ ఎన్నికల్లోనూ ఈవీఎంలు ట్యాంపర్ అయ్యాయని.. ఏకంగా ఎంపీ సంజయ్ రౌత్ చేసిన ఆరోపణలు తీవ్ర విమర్శలకు తావిచ్చాయి. అంతేకాకుండా కాంగ్రెస్ పార్టీ కూడా అనేక సార్లు ఈవీఎంలు ట్యాంపర్ అయ్యాయని ఆరోపణలు గుప్పించింది. ఈ నేపథ్యంలోనే కోర్టుల్లో కేసులు కూడా నమోదయ్యాయి. అయితే ఎన్నికల్లో ఈవీఎంలు కాకుండా.. అంతకుముందు ఉపయోగించిన పేపర్ బ్యాలెట్ పద్దతిని తీసుకురావాలని దాఖలైన పిటిషన్లపై విచారణ జరిపిన సుప్రీంకోర్టు.. తీర్పు సందర్భంగా కీలక వ్యాఖ్యలు చేసింది.
ఎన్నికల్లో తిరిగి బ్యాలెట్ పేపర్ ఓటింగ్ తీసుకురావాలంటూ ప్రజాశాంతి పార్టీ అధ్యక్షుడు కేఏ పాల్ సహా పలువురు వేసిన ప్రజా ప్రయోజన వ్యాజ్యాలపై జస్టిస్ విక్రమ్ నాథ్, జస్టిస్ పీబీ వరాలేలతో కూడిన సుప్రీంకోర్టు ధర్మాసనం విచారణ జరిపింది. విదేశాల్లో ప్రస్తుతం కూడా బ్యాలెట్ పేపర్ విధానం అమలు చేస్తున్నారని.. అందుకే భారత్లో కూడా అదే విధానాన్ని తీసుకువస్తే బాగుంటుందని కేఏ పాల్ పేర్కొన్నారు. అంతేకాకుండా ఎన్నికల సందర్భంగా దేశంలో రూ.వేల కోట్లలో అవినీతి జరుగుతోందని ఆయన తీవ్ర ఆరోపణలు చేశారు. ఈ నేపథ్యంలోనే ఈవీఎం విధానాన్ని రద్దు చేసి తిరిగి పేపర్ బ్యాలెట్ పద్ధతిలో ఎన్నికల నిర్వహించేలా ఆదేశాలివ్వాలని తన పిటిషన్లో కేఏ పాల్ కోరారు. ఈ పిటిషన్పై విచారణ జరిపిన అత్యున్నత న్యాయస్థానం.. ఆయనపై తీవ్ర ఆగ్రహం వ్యక్తం చేసింది.
అంతేకాకుండా కేఏ పాల్ దాఖలు చేసిన పిటిషన్పై సుప్రీంకోర్టు అసహనం వ్యక్తం చేసింది. ఒకవేళ మీరు గెలిస్తే ఈవీఎంలను ట్యాంపరింగ్ చేయలేదు అంటారు.. కానీ ఓడిపోతే మాత్రం ఎలక్ట్రానిక్ ఓటింగ్ మెషీన్లు ట్యాంపర్ అయ్యాయి అంటారు. అసలు ఇక్కడ ఏం జరుగుతోంది. బ్యాలెట్ పేపర్ విధానాన్ని అనుసరించిన మాత్రాన అవినీతి ఆగిపోతుందని మీరు చెప్పగలరా అని పిటిషనర్ కేఏ పాల్ను సుప్రీంకోర్టు ప్రశ్నించింది. ఆ తర్వాత ఆయన వేసిన పిటిషన్ను అత్యున్నత న్యాయస్థానం కొట్టివేసింది.
ఇటీవల జరిగిన మహారాష్ట్ర అసెంబ్లీ ఎన్నికల్లోనూ కాంగ్రెస్ నేతృత్వంలోని మహా వికాస్ ఆఘాడీ కూటమి ఘోర పరాజయం పాలైంది. అయితే శివసేన ఉద్ధవ్ ఠాక్రే వర్గానికి చెందిన రాజ్యసభ ఎంపీ సంజయ్ రౌత్ ఈవీఎంలపై సంచలన ఆరోపణలు చేశారు. మహారాష్ట్ర ఎన్నికల్లో ఈవీఎంలు ట్యాంపరింగ్ అయ్యాయని.. ఇది ప్రజా తీర్పు కాదని తీవ్ర వివాదాస్పద వ్యాఖ్యలు చేశారు. ఈ ఎన్నికల్లోనే కాకుండా లోక్సభ, అసెంబ్లీ ఎన్నికలు జరిగిన ప్రతీసారి.. ఈవీఎంలు ట్యాంపరింగ్ అయ్యాయనే ఆరోపణలు వెల్లువెత్తుతూనే ఉన్నాయి.