ఐపీఎల్ చరిత్రలోనే ఫస్ట్‌టైమ్.. ఆంధ్రప్రదేశ్ నయా రికార్డు.. లోకేష్ ట్వీట్ మాత్రం

క్రికెట్ అభిమానులు అందరూ ఎప్పుడెప్పుడా అని ఎదురు చూసిన ఐపీఎల్ మెగా వేలం పూర్తైంది. జట్లన్నీ తమకు కావాల్సిన, అవసరమైన ఆటగాళ్లను వేలంలో ఎంచుకున్నాయి. ఇక మార్చి 14 నుంచి అసలు సంబరం ఆరంభం కానుంది. అయితే ఈసారి ఐపీఎల్ మామూలుగా ఉండదు. కొత్త ఆటగాళ్ల రాకతో ఐపీఎల్‌ టీమ్‌ల రూపురేఖలు మొత్తం మారిపోయాయి. సూపర్ స్టార్లు అనుకున్న ఆటగాళ్లు వేలంలో అన్‌సోల్డ్‌గా మిగిలితే.. సూర్యవంశీ వంటి ఆటగాళ్లు హిస్టరీ క్రియేట్ చేశారు. అయితే ఈసారి ఐపీఎల్‌లో ఆంధ్రప్రదేశ్ నుంచి ప్రాతినిధ్యం పెరిగింది. ఐపీఎల్ చరిత్రలోనే ఎప్పుడూ లేనంతగా ఈసారి ఏపీకి చెందిన ఐదుగురు క్రికెటర్లు ఐపీఎల్ ఆడనున్నారు.

ఆంధ్రప్రదేశ్ నుంచి ఐదుగురు క్రికెటర్లకు ఐపీఎల్‌ ఆడే అవకాశం రావటం ఇదే తొలిసారి. ఇక ఇప్పటికే విశాఖపట్నానికి చెందిన నితీష్ కుమార్ రెడ్డి ఐపీఎల్‌లో అదరగొడుతున్నాడు. నితీష్ కుమార్ రెడ్డి సన్‌రైజర్స్ హైదరాబాద్ తరుఫున ఐపీఎల్‌లో మెరుపులు మెరిపించి.. ఇప్పుడు టీమిండియాకు కూడా ప్రాతినిధ్యం వహిస్తున్న సంగతి తెలిసిందే. సన్‌రైజర్స్ యాజమాన్యం రిటైన్ చేసుకోవటంతో ఐపీఎల్ 2025లోనూ నితీష్ కుమార్ రెడ్డి ఎస్ఆర్‌హెచ్ తరుఫున ఆడనున్నాడు. తాజాగా ముగిసిన ఐపీఎల్ మెగా వేలంలో గుంటూరుకు చెందిన ఎస్.కె. రషీద్‌ను చెన్నై సూపర్ కింగ్స్ తిరిగి ఎంపిక చేసుకుంది. గత సీజన్‌లోనూ రషీద్‌ను సీఎస్కే ఎంపిక చేసుకుంది.

అలాగే శ్రీకాకుళం జిల్లాకు చెందిన త్రిపూర్ణ విజయ్‌ను ఢిల్లీ కేపిటల్స్, కాకినాడకు చెందిన పెన్మత్స వెంకట సత్యనారాయణ రాజును ముంబై ఇండియన్స్, విశాఖపట్నానికి చెందిన పైలా అవినాష్‌ను పంజాబ్ కింగ్స్ రూ.30 లక్షల బేస్ ప్రైజ్‌కు సొంతం చేసుకున్నాయి. ఈ నేపథ్యంలో ఏపీ యువ ప్లేయర్లకు ఐపీఎల్‌లో చోటు దక్కడంపై మంత్రి నారా లోకేష్ ట్వీట్ చేశారు.

ఐపీఎల్ జట్లకు ఎంపికైన నితీష్ కుమార్ రెడ్డి, షేక్ రషీద్, పైలా అవినాష్, త్రిపురాానా విజయ్, పెన్మత్స వెంకట సత్యనారాయణ రాజులకు అభినందనలు తెలియజేస్తూ.. వారంతా ఆంధ్రప్రదేశ్‌కు గర్వకారణంగా నిలుస్తారని ప్రశంసించారు. ప్రపంచ క్రికెట్ వేదికపై సత్తాచాటాలని ఆకాంక్షించారు. అయితే వెంకట సత్యనారాయణ రాజును ముంబై ఇండియన్స్ ఎంచుకోగా.. నారా లోకేష్ ట్వీట్‌లో తప్పుగా సన్‌రైజర్స్ హైదరాబాద్ పేరు పేర్కొన్నారు.