ట్రంప్ బాధ్యతలు చేపట్టిన వెంటనే అదానీపై అభియోగాలు ఎత్తివేత

అదానీ గ్రూప్ ఛైర్మన్ గౌతమ్ అదానీపై అమెరికాలో లంచం, మోసం అభియోగాలు నమోదైన వ్యవహారం సంచలనంగా మారింది. భారత్‌లో ప్రాజెక్ట్‌లను దక్కించుకోడానికి లంచాలు ఇచ్చేందుకు అమెరికాలో వారు నిధులు సేకరించారనేది ప్రధాన ఆరోపణ. కాగా, అమెరికా అధ్యక్ష ఎన్నికల్లో విజయం సాధించిన డొనాల్డ్ ట్రంప్ అధికారం చేపట్టిన తర్వాత అదానీపై అభియోగాలను ఎత్తివేసే అవకాశం ఉందని భారతీయ అమెరికన్ అటార్నీ రవి బాత్రా అన్నారు. ప్రతి కొత్త అధ్యక్షుడికి ఓ ప్రత్యేక టీమ్ ఉంటుందని, అమెరికా 47వ అధ్యక్షుడిగా ఎన్నికైన ప్రెసిడెంట్ ట్రంప్ తన క్యాబినెట్ కోసం ఎఫ్‌బిఐ దర్యాప్తులను పక్కనబెడతారని అన్నారు. ‘విశ్వసనీయ ఆధారాలు లేని ఏదైనా ప్రాసిక్యూషన్‌ను అధ్యక్షుడు రద్దు చేస్తాడు.’ అని వ్యాఖ్యానించారు.

 ‘ముఖ్యంగా ప్రత్యర్థులను లక్ష్యంగా చేసుకోవడానికి చట్టం అనుమతించదు.. ఇది రాజ్యాంగం కల్పించిన సమానత్వం లక్ష్యానికి విరుద్దం’ అని రవి బాత్రా పేర్కొన్నారు. ‘ఈ అంశాన్ని భారత ప్రభుత్వం దృష్టికి గౌతమ్ అదానీ తీసుకొచ్చి, త్వరలోనే ఏర్పడబోయే ట్రంప్ అడ్మినిస్ట్రేషన్‌తో ద్వైపాక్షికంగా లేవనెత్తమని అభ్యర్థించవచ్చు’ అని ఆయన అభిప్రాయపడ్డారు.

‘క్రిమినల్ లేదా సివిల్ అభియోగాలు లోపభూయిష్టంగా ఉన్నట్టు భావించిస్తే... కొత్త అధ్యక్షుడి యంత్రాంగంలోని న్యాయ విభాగం, సెక్యూరిటీస్ అండ్ ఎక్స్ఛేంజ్ కమిషన్ ఆ కేసులను ఉపసంహరించుకోవచ్చు’ బాత్రా అన్నారు, ‘చట్టం చాలా అద్భుతమైంది.. ఉదాత్తమైన న్యాయవ్యవస్థ, చట్ట పాలనపై ప్రజల విశ్వాసాన్ని నిలుపుకోవడానికి వాటిని సరిదిద్దుకోవచ్చు.. రద్దు చేయవచ్చు.. ఈ సూత్రం ప్రాసిక్యూటర్ విచక్షణతో కూడిన దేశాలలో కూడా వర్తిస్తుంది. నిజానికి, దేశాల మధ్య ఖైదీల మార్పిడి ఇలా జరుగుతుంది. సమాఖ్య ప్రభుత్వాధినేత హోదాలో అధ్యక్షుడు రాజ్యాంగబద్ధంగా విదేశాంగ విధానాన్ని అమలు చేయడం, విచారణ నిలపివేసే అధికారం ఉంది’ అని చెప్పారు.

‘అదానీపై లంచం ఆరోపణలు కూడా అమెరికా చట్టాల వర్తింపు సమస్యను లేవనెత్తుతుంది.. ఎందుకంటే ఈ కేసులో అభియోగాలు ఎదుర్కొంటున్న వారు అమెరికాలో నివాసం లేరు.... స్థానిక చట్టాలు ఉన్నప్పటికీ వేరే దేశానికి చెందిన వ్యక్తులకు వీటిని వర్తింపజేయలేం’ అని బాత్రా వివరించారు. మరోవైపు, గౌతమ్‌ అదానీపై అమెరికాలో నమోదైన ఆరోపణల కేసు తేలేవరకు ఆనీ గ్రూప్‌ సంస్థల్లో కొత్త పెట్టుబడులు పెట్టబోమని ఫ్రాన్స్‌ ఇంధన దిగ్గజం టోటల్‌ఎనర్జీస్‌ సోమవారం స్పష్టం చేసింది. అంతేకాదు, ఈ ఆరోపణల గురించి తమకు ముందుగా అవగాహన లేదని అది పేర్కొంది. అలాగే, ప్రవాస భారతీయ ఇన్వెస్టర్‌ రాజీవ్‌ జైన్‌కు చెందిన ప్రైవేట్‌ ఈక్విటీ కంపెనీ జీక్యూజీ పార్ట్‌నర్స్‌.. అదానీ గ్రూప్‌ సంస్థల భవిష్యత్‌పై తనకున్న విశ్వాసాన్ని ఉద్ఘాటించింది.