రాహుల్ గాంధీ బ్రిటన్ పౌరసత్వ వివాదం.. కేంద్ర ప్రభుత్వం కీలక వ్యాఖ్యలు

కాంగ్రెస్ అగ్రనేత, లోక్‌సభలో ప్రతిపక్ష నేతగా ఉన్న రాహుల్ గాంధీకి ద్వంద్వ పౌరసత్వం ఉందని.. కొందరు బీజేపీ నేతలు ఎప్పటి నుంచో ఆరోపిస్తున్నారు. అంతేకాకుండా రాహుల్‌ గాంధీకి భారత పౌరసత్వంతోపాటు.. బ్రిటన్ పౌరసత్వం కూడా ఉందని పేర్కొంటున్నారు. భారత ప్రభుత్వ నిబంధనల ప్రకారం.. ఒక వ్యక్తికి ఒకే దేశ పౌరసత్వం ఉండాలి. అయితే రాహుల్ గాంధీకి ఇటు భారత్‌తోపాటు, బ్రిటన్ పౌరసత్వం ఉందనే ఆరోపణలు పదే పదే వినిపిస్తున్నాయి. ఈ క్రమంలోనే తాజాగా కేంద్ర ప్రభుత్వం కీలక వ్యాఖ్యలు చేసింది. రాహుల్ గాంధీ సిటిజన్‌షిప్ విషయంలో దాఖలైన పిటిషన్‌పై కోర్టు స్పందన కోరగా.. కేంద్రం ఆ అంశం పరిశీలనలో ఉందని తెలిపింది.

రాహుల్ గాంధీ పౌరసత్వం అంశాన్ని పరిశీలిస్తున్నామని కేంద్ర ప్రభుత్వం తాజాగా వెల్లడించింది. రాహుల్‌ గాంధీ బ్రిటన్‌ పౌరుడు అని.. ఈ నేపథ్యంలోనే ఆయనకు ఉన్న భారత పౌరసత్వాన్ని రద్దు చేయాలంటూ లాయర్, బీజేపీ నేత విఘ్నేశ్‌ శిశిర్ అలహాబాద్ హైకోర్టులో ఈ పిటిషన్ దాఖలు చేశారు. అంతేకాకుండా రాహుల్ గాంధీ పౌరసత్వం అంశంపై సీబీఐ విచారణ కూడా జరిపించాలని ఆయన కోరారు. ఈ పిటిషన్‌పై స్పందన తెలియజేయాలంటూ అలహాబాద్‌ హైకోర్టు కేంద్ర ప్రభుత్వాన్ని ఆదేశించగా.. తాజాగా కేంద్రం స్పందనను తెలిపింది.

ఇక రాహుల్‌ గాంధీ బ్రిటన్‌ పౌరుడని బీజేపీ సీనియర్‌ నేత సుబ్రహ్మణ్య స్వామి చాలా కాలం నుంచి తీవ్ర ఆరోపణలు చేస్తునే ఉన్నారు. బ్రిటన్‌లో నమోదైన ఓ కంపెనీకి డైరెక్టర్, సెక్రటరీగా రాహుల్‌ గాంధీ ఉన్నారని చెబుతున్నారు. అంతేకాకుండా ఆ కంపెనీ వార్షిక రిపోర్ట్‌లో రాహుల్ గాంధీ తాను బ్రిటిష్‌ పౌరుడిని అని పేర్కొన్నట్లు సుబ్రహ్మణ్య స్వామి ఆరోపించారు. ఇదే విషయంపై 2019లో కేంద్ర హోం మంత్రిత్వ శాఖకు ఆయన లేఖ రాశారు. ఇతర దేశాల్లో పౌరుడిగా ఉన్న వ్యక్తి.. భారతదేశ పౌరసత్వాన్ని స్వచ్ఛందంగా వదులుకోవాల్సి ఉంటుందని ఆ లేఖలో సుబ్రహ్మణ్య స్వామి ప్రస్తావించారు. భారత పౌరసత్వం కలిగి ఉన్న వ్యక్తి.. మరో దేశ పౌరసత్వం కలిగి ఉంటే రాజ్యాంగంలోని ఆర్టికల్‌ 9.. భారతీయ పౌరసత్వ చట్టం 1955ని ఉల్లంఘించడమే అవుతుందని పేర్కొన్నారు. ఈ నేపథ్యంలోనే రాహుల్ గాంధీ పౌరసత్వం వ్యవహారంలో తర్వాతి విచారణ డిసెంబర్ 19వ తేదీన జరగనుంది.