ఎన్నికల హామీల అమలుకు నిధుల్లేవు, ఆ పథకాలు వద్దు.. సీఎంకు కాంగ్రెస్ ఎమ్మెల్యే సూచన

 దేశవ్యాప్తంగా జరిగిన వివిధ రాష్ట్రాల అసెంబ్లీ ఎన్నికల్లో కాంగ్రెస్ పార్టీ గ్యారంటీల పేరుతో ఇచ్చిన హామీల గురించి తీవ్ర చర్చ జరుగుతోంది. హిమాచల్ ప్రదేశ్, కర్ణాటక, తెలంగాణ రాష్ట్రాల్లో కాంగ్రెస్ పార్టీ అధికారాన్ని దక్కించుకుందంటే.. అందుకు కారణం ఎన్నికల హమీలే. ఎన్నికలకు ముందు ఇష్టం వచ్చినట్లు వాగ్దానాలు ఇచ్చిన హస్తం పార్టీ.. అధికారంలోకి వచ్చిన తర్వాత ఆ హామీలను అమలు చేసేందుకు సరిపడా నిధులు లేక తీవ్ర అవస్థలు పడుతోంది. ఈ 3 రాష్ట్రాల్లో పరిస్థితి కాస్తా అటూ ఇటూగా అలాగే ఉంది. ఈ నేపథ్యంలోనే ఎన్నికల్లో ఇచ్చిన హామీలపై సొంత పార్టీకి చెందిన నేతలు, ఎమ్మెల్యేలు విమర్శలు గుప్పించడం ఇప్పుడు కర్ణాటకలో అంతర్గత కలహాలకు దారి తీస్తోంది.

రాష్ట్ర ప్రభుత్వం వద్ద.. ఎన్నికల హామీలను అమలు చేసేందుకు కావాల్సిన నిధులు లేకపోవడంతో.. తీవ్ర సతమతం అవుతున్న వేళ.. కర్ణాటక ప్రభుత్వానికి సొంత పార్టీ ఎమ్మెల్యే కీలక సూచనలు చేశారు. ఎన్నికల గ్యారంటీలు అమలు చేసేందుకు తగిన నిధులు లేని కారణంగా.. ప్రజలకు ఇస్తున్న కొన్ని పథకాలను వెనక్కి తీసుకోవాలని విజయనగర ఎమ్మెల్యే హెచ్ఆర్ గవియప్ప.. ముఖ్యమంత్రి సిద్ధరామయ్యను కోరారు. అయితే హెచ్ఆర్ గవియప్ప చేసిన వ్యాఖ్యలపై కర్ణాటక డిప్యూటీ సీఎం డీకే శివకుమార్.. తీవ్ర ఆగ్రహం వ్యక్తం చేశారు.

తాజాగా విజయనగర నియోజకవర్గంలో నిర్వహించిన ఓ కార్యక్రమంలో పాల్గొన్న ఎమ్మెల్యే హెచ్‌ఆర్‌ గవియప్ప.. తన ప్రసంగంలో భాగంగా తీవ్ర వివాదాస్పద వ్యాఖ్యలు చేశారు. కర్ణాటక అసెంబ్లీ ఎన్నికల సమయంలో ఇచ్చిన హమీల కారణంగా రాష్ట్రంలోని పేద ప్రజలకు ఇళ్లు నిర్మించి ఇవ్వడం కష్టంగా మారిందని పేర్కొన్నారు. అందుకే అవసరం లేని 2, 3 పథకాలను వెనక్కి తీసుకోవాలని సీఎం సిద్ధరామయ్యను కోరుతున్నట్లు చెప్పారు. దీనిపై ముఖ్యమంత్రి ఏం చెప్తారో చూద్దాం అంటూ కాంగ్రెస్ పార్టీ ఇచ్చిన హామీల గురించి తెలిపారు. అయితే ఈ విషయంలో సీఎం సిద్ధరామయ్య తీసుకునే నిర్ణయానికి తాము అందరం కట్టుబడి ఉంటామని తేల్చి చెప్పారు.

అయితే హెచ్ఆర్ గవియప్ప చేసిన ఈ వ్యాఖ్యలు ప్రస్తుతం కన్నడ రాజకీయాల్లో తీవ్ర చర్చకు దారితీశాయి. ఇక ఆ వ్యాఖ్యలు కర్ణాటక ఉపముఖ్యమంత్రి డీకే శివకుమార్‌కు తీవ్ర ఆగ్రహాన్ని తెప్పించాయి. ఇది కాంగ్రెస్ పార్టీ అని.. సొంత పార్టీ ఎమ్మెల్యే అలా మాట్లాడి ఉండాల్సింది కాదని పేర్కొన్నారు. అంతేకాకుండా ఇలాంటి వ్యాఖ్యలు చేసిన హెచ్ఆర్ గవియప్పకు షోకాజ్ నోటీసులు జారీ చేస్తామని తెలిపారు. అంతేకాకుండా కర్ణాటకలో కాంగ్రెస్ పార్టీ ప్రకటించిన ఏ పథకాన్ని నిలిపివేసే ప్రసక్తే లేదని డీకే శివకుమార్ తేల్చి చెప్పారు. ఇక కేంద్ర ప్రభుత్వ నిబంధనల ప్రకారం.. దారిద్ర్య రేఖకు దిగువన ఉన్న బీపీఎల్ కార్డుల జాబితా నుంచి ప్రభుత్వ ఉద్యోగులు, పన్ను చెల్లింపుదారులను తొలగించాలని కర్ణాటక ప్రభుత్వం నిర్ణయం తీసుకుంది.