అగ్నికి గాలి కలవడంతో బీభత్సం,,,భయంకరమైన ఫైర్నాడోతో వణికిపోయిన గ్రామస్థులు

అగ్నికి వాయువు తోడైతే ఆ ప్రాంతాన్నే దహించి వేస్తుంది. ఈ డైలాగ్ చాలాసార్లు విని ఉంటాం. కానీ అదే రియల్‌గా జరిగితే మాత్రం.. ఊహించుకోవడానికే భయంకరంగా ఉంది కదూ. ఇలాంటి సంఘటనే ఒకటి జరిగింది. అమెరికాలోని లూసియానా ప్రాంతంలో భయంకరమైన అగ్ని, భీకర గాలి కలిసి పెద్ద విధ్వంసాన్నే సృష్టించాయి. ఇలా అగ్ని, గాలి కలిసి బీభత్సం సృష్టించడాన్నే ఫైర్నాడో అంటారు. సుడులు తిరుగుతూ ఆ ప్రాంతమంతా కప్పేసిన ఫైర్నాడో స్థానికుల్ని ఒక్కసారిగా వణికించింది. దీనికి సంబంధించిన భయంకరమైన దృశ్యాలను అక్కడే ఉన్న వారు తమ సెల్‌ఫోన్లలో చిత్రీకరించి సోషల్ మీడియాలో పెట్టడంతో వైరల్‌గా మారాయి. అయితే ఆ ఫైర్నడో కొద్దిసేపు ఆ ప్రాంతంలో భీకర దృశ్యాన్ని చూపించి.. ఆ తర్వాత క్రమంగా తగ్గిపోయింది. దీంతో స్థానికులు ఊపిరి పీల్చుకున్నారు.

అసలే దహించి వేసే కార్చిచ్చు.. దానికి సుడి గాలి కూడా తోడై అగ్ని గుండం వలె ఏర్పడిన ఫైర్నాడో లూసియానా వాసులను భయకంపితుల్ని చేసింది. భగభగలాడే అగ్నిగోళం వలే ఆ ప్రాంతం అంతా చుట్టేసిన దృశ్యమే లూసియానాలోని సబినే పారిష్‌ అనే ప్రదేశంలో ఆవిష్కృతం అయింది. కార్చిచ్చుతో టోర్నడో కలవడంతో అత్యంత అరుదుగా కనిపించే ఫైర్నాడోగా మారింది. ఆ ఫైర్నాడో.. అంతే వేగంతో చుట్టుపక్కల ప్రాంతాలకు కదులుతుండటంతో స్థానికులు భయంతో ఉరుకులు పరుగులు తీశారు. అయితే అది కొద్దిసేపు అక్కడ ఉన్న వారిని వణికించిన తర్వాత మెల్లగా బలహీనపడింది.

ఈ ఫైర్నాడోపై లూసియానా డిపార్ట్‌మెంట్‌ ఆఫ్‌ అగ్రికల్చర్‌ అండ్‌ ఫిషరీస్‌ కమిషనర్‌ మైక్‌ స్ట్రైన్‌ స్పందించారు. లూసియానాలో ఇటీవల వ్యాపిస్తున్న కార్చిచ్చులపై ఆయన తీవ్ర ఆందోళన వ్యక్తం చేశారు. ఈ కార్చిచ్చులు, వాటికి తోడవుతున్న టోర్నడోలు స్థానికులకు పెను ముప్పుగా మారాయని ఆవేదన వ్యక్తం చేశారు. అయితే ఇలా టోర్నడోలు, కార్చిచ్చులు చెలరేగినపుడు.. కొంత మంది వాటిని చూసేందుకు దగ్గరికి వెళ్లడం గానీ.. వాటి వద్దకు డ్రోన్లను పంపించడం వంటివి చేస్తున్నారని తెలిపారు. అయితే ఇలాంటి చర్యలు చాలా ప్రమాదకరమని.. ప్రాణాలకే ముప్పు ఉంటుందని మైక్ స్ట్రైన్ వెల్లడించారు. కార్చిచ్చులను ఆర్పేందుకు ఫైర్ డిపార్ట్‌మెంట్‌కు చెందిన విమానాలు సహాయక చర్యల్లో నిమగ్నమై ఉంటాయని.. అదే సమయంలో అక్కడికి ప్రజలు వెళ్లడం, డ్రోన్లను పంపించడం కరెక్ట్ కాదని పేర్కొన్నారు. మరోవైపు.. అమెరికాలోని టెక్సాస్‌ రాష్ట్రంలో హంట్స్‌వెల్లీ కార్చిచ్చు శరవేగంగా వ్యాపించడం మరో ఆందోళనను కలిగిస్తోంది. ఇప్పటికే అక్కడ 3 వేల ఎకరాలు కాలి బూడిదయ్యాయి. టెక్సాస్‌లో రోజుకు దాదాపు 100 ఎకరాల అడవి దగ్ధం అవుతోందని అధికారులు చెబుతున్నారు. దీంతో అక్కడ నివసించే స్థానికులను ఖాళీ చేయించి సురక్షిత ప్రాంతాలకు తరలిస్తున్నట్లు తెలిపారు.