విశ్వకర్మ యోజన పధకం ప్రారంభించనున్న కేంద్ర ప్రభుత్వం

కేంద్ర ప్రభుత్వం ప్రధానమంత్రి విశ్వకర్మ యోజన పథకాన్ని చేతివృత్తిదారుల అభ్యున్నతికి ఈనెల 17న ప్రారంభిస్తోందని, దీనిపై అవగాహన కల్పించి వృత్తి పనివాళ్లకు మరింత తోడ్పాటును అందించాలని అధికారులను ఎన్టీఆర్‌ జిల్లా కలెక్టర్‌ ఎస్‌.దిల్లీ రావు ఆదేశించారు. సోమవారం నగరంలోని కలెక్టర్‌ క్యాంప్‌ కార్యాలయంలో జిల్లా పరిశ్రమల శాఖ ఆధ్వర్యంలో పథకం అమలు జిల్లా స్థాయి కమిటీ సమావేశాన్ని కలెక్టర్‌ దిల్లీరావు ఆధ్వర్యంలో నిర్వహించారు. పథకంపై విస్తృత ప్రచారం కల్పించి, అర్హులను గుర్తించాలని కలెక్టర్‌ సూచించారు. వడ్రంగి, స్వర్ణకారులు, కమ్మరి, పడవల తయారీదారులు, కుమ్మరి, శిల్ప కారులు, చెప్పులు కుట్టేవారు, తాపీ పనిచేసేవారు, బుట్టలు, చాపలు అల్లే వారు, క్షురకులు, రజకులు, బొమ్మల తయారీదారులు, దుస్తులుకుట్టేవారు (దర్జీలు), చర్మకారులు వంటి 16 రకాల చేతివృత్తిదారుకు శిక్షణనిచ్చి అవసరమైన సామగ్రి కొనుగోలు చేసుకునేందుకు తొలి దశగా రూ.లక్ష బ్యాంకుల రుణాలను మంజూరు చేస్తారని తెలిపారు. రుణాలను సక్రమంగా తిరిగి చెల్లిస్లే వ్యాపారాభివృద్ధికి రూ.2 నుంచి రూ.3 లక్షల రుణాలు మంజూరు చేస్తారని తెలిపారు. దీర్ఘకాలంగా వృత్తిలో ఉన్న వారిని అర్హులుగా గుర్తించాలన్నారు. గ్రామ, వార్డు సచివాలయాల ద్వారా లబ్ధిదా రుల గుర్తింపు, రిజిస్ర్టేషన్‌ ప్రక్రియను నిర్వహించాలన్నారు. రిజిస్ర్టేషన్‌ ప్రక్రి యకు ఆధార్‌, రేషన్‌కార్డు, బ్యాంకు పాస్‌బుక్‌, ఆధార్‌తో లింక్‌ చేసిన మొబైల్‌ నెంబర్‌ అవసరమని, 18 ఏళ్లు నిండిన వారు, పూర్వీకుల నుంచి కుటుంబ వృత్తిగా ఉన్నవారు, అర్హులన్నారు. కుటుంబంలో ప్రభుత్వ ఉద్యోగి ఉంటే అర్హులు కారన్నారు.