వినాయకచవితి 18, 19 తేదీల్లో పండుగ ఎప్పుడు జరుపుకోవాలి,,,కాణిపాకం, టీటీడీ ఆగమ పండితుడి ప్రకటన

తెలుగు రాష్ట్రాల్లో వినాయకచవితిని ఎప్పుడు చేసుకోవాలనే గందరగోళం నడుస్తోంది. ఈ నెల 18, 19 తేదీల్లో ఏ జరుపుకోవాలనే సందిగ్థత ఉంది. ఈ క్రమంలో తిరుపతిలోని జాతీయ సంస్కృత విశ్వవిద్యాలయం ఆచార్యుడు, ఆగమ పండితుడు వేదాంతం విష్ణుభట్టాచార్యులు క్లారిటీ ఇచ్చారు.వినాయకచవితి పండుగను ఈ నెల 18న (సోమవారం) రోజునే జరుపుకోవాలని వినాయక చవితిపై ఆయన ఒక ప్రకటన విడుదల చేశారు. సోమవారం ఉదయం 10.15 గంటల వరకు తదియ ఉంటుందని.. మధ్యాహ్నం నుంచి చతుర్ధి మొదలై మంగళవారం ఉదయం 10.43గంటల దాకా ఉంటుందన్నారు. ఇటువంటి సందర్భంలో చతుర్ధి మొదలైన రోజునే వినాయకచతుర్ధి జరుపుకోవాలని ధర్మశాస్త్ర గ్రంథాలు చెబుతున్నాయన్నారు వేదాంతం విష్ణుభట్టాచార్యులు. 2000, 2009, 2010, 2019 సంవత్సరాల్లో కూడా ఇటువంటి సందిగ్ధ పరిస్థితే వచ్చినపుడు తదియతో కూడిన చతుర్ధినే పర్వదినంగా జరుపుకోవాలని నిర్ణయించారని గుర్తు చేశారు.

మరోవైపు వెయ్యేళ్ళ చరిత్ర ఉన్న స్వయంభు కాణిపాకం వరసిద్ధి వినాయకుడి దేవస్థానం కూడా క్లారిటీ ఇచ్చింది. చవితి తిథి ఈ నెల 18నే అంటోంది.. అందుకే ఆ రోజే కాణిపాకం దేవస్థానం వినాయక చవితి జరుపుతోంది. ఈ‌ సంవత్సరం భాద్రపద శుద్ధ చవితి తేదీ 18-9-2023 సోమవారం నాడు ఉదయం 10-15 నిమిషాలు నుంచి మరుసటి రోజు ఉదయం 10-43 నిమిషాలు వరుకూ ఉంటుంది అంటున్నారు. అంటే 18-9-2023 రోజు రాత్రి మాత్రమే చవితి తిథి ఉంది.. ఆ తిథి ప్రాకారం కాణిపాకంలో బ్రహ్మోత్సవాలు ఈనెల 18వ తేదీ నుంచి ప్రారంభం అవుతాయి. ఈ నెల 18వ తేదీ నుంచి 21 రోజుల పాటు కాణిపాకంలో బ్రహ్మోత్సవాలు నిర్వహిస్తామని ప్రకటించారు కాణిపాకం వరసిద్ధి వినాయక ఆలయం ప్రధాన వేద పండితులు సుబ్బారావు శర్మ.

ఏపీలోని ప్రముఖ పుణ్యక్షేత్రాల్లో కూడా వినాయక చవితి వేడుకలను సెప్టెంబర్ 18నే జరపడానికి ఆలయ అధికారులు ఏర్పాట్లు చేస్తున్నారు. అంతేకాదు హైదరాబాద్‌లో కూడా 18న పండుగ జరుపుకోవాలని భాగ్యనగర్ గణేష్ ఉత్సవ సమితి నిర్ణయం తీసుకున్నట్లు తెలుస్తోంది. దీంతో అందరూ దాదాపుగా ఈ నెల 18న పండుగ జరుపుకోవాలని భావిస్తున్నట్లు తెలుస్తోంది. పండుగను 18న జరుపుకోవాలా.. 19న జరుపుకోవాలా అన్న కన్ఫ్యూజన్‌కు పుల్‌స్టాప్ పెట్టినట్లే అంటున్నారు. మరోవైపు తెలుగు రాష్ట్రాల్లో ఈ ఏడాది కూడా వినాయచవితికి ఏర్పాట్లు ఘనంగా జరుగుతున్నాయి. ఇప్పటికే విగ్రహాలు సిద్ధంకాగా.. మండపాల నిర్మాణాలను ఒకటి రెండు రోజుల్లో ప్రారంభించనున్నారు.