సీనియర్ల వేధింపులతో విద్యార్ధి మృతి.. జాదవ్‌పుర్‌ యూనివర్సిటీకి ఇస్రో బృందం

పశ్చిమ్‌ బెంగాల్‌లోని జాదవ్‌పుర్‌ యూనివర్సిటీ విద్యార్థి మృతిచెందిన ఘటన దేశవ్యాప్తంగా సంచలనం సృష్టించిన విషయం తెలిసిందే. డిగ్రీ మొదటి ఏడాది విద్యార్థి మరణానికి సీనియర్ల ర్యాంగింగ్, లైంగిక వేధింపులే కారణమని దర్యాప్తులో తేలింది. సరైన భద్రతా చర్యలు తీసుకోకపోవడం వల్లే ఇలా జరిగిందని నివేదిక పేర్కొంది. ఈ నేపథ్యంలో భారత అంతరిక్ష పరిశోధన సంస్థ బృందం.. గురువారం విశ్వవిద్యాలయాన్ని సందర్శించి క్యాంపస్‌లోని భద్రతా చర్యలను పరిశీలించింది. ర్యాంగింగ్ భూతానికి విద్యార్థి బలయ్యాడని, భద్రతా చర్యలను సూచించాలని ఇస్రోకు యూనివర్సిటీ ఛాన్సలర్‌ సీవీ ఆనంద్‌ బోస్‌ లేఖ రాశారు. ఈ లేఖపై స్పందించిన ఇస్రో.. తన బృందాన్ని బుధవారం పంపింది. ఈ బృందం క్యాంపస్‌‌లోని వివిధ ప్రాంతాలు, భవనాలను సందర్శించింది. అనంతరం వర్సిటీ అధికారులతో సమావేశమై.. భద్రత సమస్యలపై చర్చించింది.

ఈ సందర్భంగా జాదవ్‌పూర్ యూనివర్సిటీ వీసీ బుద్దదేబ్‌ సౌ మీడియాతో మాట్లాడుతూ.. ‘హాస్టల్‌లో ర్యాగింగ్‌ను నివారించే మార్గాలపై కూడా ఇస్రో బృందం చర్చించింది.. ఇది డేటా ఆధారిత ప్రాజెక్ట్‌ కావడంతో ఇస్రో, యూనివర్సిటీ నిపుణులు పాల్గొన్నారు.. వారి పరిశీలనల అనంతరం వర్సిటీ అందుకు అనుగుణంగా తదుపరి చర్యలు తీసుకుంటుంది.. యూనివర్సిటీలో భద్రతా వ్యవస్థను అభివృద్ధి చేయడానికి చర్చలు జరుగుతున్నాయి ’ అని ఆయన పేర్కొన్నారు. ‘రిమోట్ సెన్సింగ్ టెక్నాలజీని ఉపయోగించి భద్రతను పెంచడంపై వారు చర్చించారు. క్యాంపస్‌లోకి బయటి వ్యక్తుల ప్రవేశాన్ని నిరోధించడం, మాదక ద్రవ్యాలు వినియోగించకుండా విద్యార్ధుల కదలికలను నిఘా ఉంచడం వంటి మార్గాలపై కూడా వారు చర్చించారు.. వారు మా భద్రతా బృందానికి సూచనలు ఇస్తారు’ అని చెప్పారు. విద్యార్ధుల వ్యక్తిగత స్వేచ్ఛకు ఇబ్బంది లేకుండా నిఘా ద్వారా హాస్టళ్లలో ర్యాగింగ్‌ను అరికట్టేందుకు ఇస్రో బృందం చర్చించిందని అన్నారు. సాంకేతిక పరిజ్ఞానం సాయంతో ర్యాగింగ్‌ను అడ్డుకోడానికి ఆగస్టు 24న ఇస్రోను వైస్ ఛాన్సలర్ సంప్రదించిన విషయం తెలిసిందే.