జీ 20 సదస్సు డిన్నర్‌కు అంబానీ, అదానీ

ప్రతిష్ఠాత్మకమైన జీ 20 దేశాధినేతల సదస్సుకు ఈ నెల 9, 10 తేదీల్లో దేశ రాజధాని ఢిల్లీ ఈసారి వేదిక అయ్యింది. ఈ క్రమంలోనే స‌ద‌స్సుకు హాజ‌రయ్యే ప్రపంచ దేశాధినేత‌లు, ప్రతినిధుల కోసం కేంద్ర ప్రభుత్వం అన్ని ఏర్పాట్లు చేస్తోంది. మరోవైపు.. దేశ రాజధానిలో ఈనెల 8 నుంచి 10 వరకు పలు ఆంక్షలు కూడా విధించారు. భారీ బందోబస్తు ఏర్పాటు చేసిన ప్రభుత్వం.. సీసీటీవీలు, డ్రోన్లతోపాటు బాంబు స్క్వాడ్, డాగ్‌ స్క్వాడ్ సహా అన్ని రకాల భద్రతా ఏర్పాట్లను పూర్తి చేసింది. ఈ క్రమంలోనే ఈ జీ 20 సమావేశాల డిన్నర్‌ కూడా ఏర్పాటు చేయనుంది. ఈ విందులో జీ 20 దేశాల అధినేతలు, ప్రతినిధులతోపాటు దేశంలోని ప్రముఖులను కూడా ఆహ్వానించింది. ఇందులో ప్రముఖ బిజినెస్‌మెన్లు, అపర కుబేరులు గౌతం అదానీ, ముఖేశ్ అంబానీలకు ఆహ్వానాలు అందాయి.

ఢిల్లీలోని రాష్ట్రపతి భవన్‌లో జరిగే ఈ విందుకు దేశంలోని 500 మంది వ్యాపార వేత్తలకు ఆహ్వానం పంపించింది. ఇందులో అదానీ, అంబానీ లతో పాటు టాటా సన్స్ ఛైర్మన్ ఎన్ చంద్రశేఖరన్, బిలియనీర్ కుమార్ మంగళం బిర్లా, భారతీ ఎయిర్‌టెల్ వ్యవస్థాపకుడు, ఛైర్మన్ సునీల్ మిట్టల్ సహా 500 మంది హాజరు కానున్నారు. సెప్టెంబర్ 9, 10 వ తేదీల్లో జీ 20 శిఖరాగ్ర సమావేశం జరగనుండగా.. సెప్టెంబర్ 9 రోజు జరిగే చర్చల తర్వాత రాత్రి ఈ విందును కేంద్ర ప్రభుత్వం ఏర్పాటు చేసింది. ఈ డిన్నర్‌లో ప్రత్యేక వంటకాలు అతిథులకు రుచి చూపించనున్నారు. భారత్ ఇచ్చిన ఆతిథ్యాన్ని స్వీకరించిన వారు ఎప్పటికీ మరచిపోలేని విధంగా ఏర్పాట్లు చేస్తున్నారు. డిన్నర్ సెట్‌లో వెండి వస్తువులు, బంగారు పూత పూసిన గిన్నెలు ఉన్నాయి. సాల్ట్ స్టాండ్, స్పూన్, గిన్నె, గ్లాస్, ప్లేట్‌లకు రాయల్‌గా తయారు చేశారు. ఆహారాన్ని వడ్డించే విధానంలో భారత సంస్కృతి, వారసత్వం, సంప్రదాయాలను ప్రపంచానికి చాటి చెప్పేలా ఏర్పాట్లు చేసింది. అతిథుల కోసం ఏర్పాట్లను సిద్ధం చేయడంపై 200 మంది ప్రత్యేక కళాకారులు ప్రత్యేక శ్రద్ధ పెట్టారు. ఒక్కో డిజైన్ వెనుక ఒక్కో ఆలోచన ఉండేలా అందులో భారతీయత కనిపించేలా రూపొందించారు. విందులోని పాత్రల తయారీలో కర్ణాటక, పశ్చిమ బెంగాల్, ఉత్తరప్రదేశ్, జైపూర్, ఉత్తరాఖండ్ సహా వివిధ రాష్ట్రాలకు చెందిన కళాకారులు పాల్గొన్నారు. ఇక ఉప్పు ట్రేలో అశోక చక్రం ఉండడం మరో ప్రత్యేకత. ఇక మెనూలో భారత ప్రత్యేక వంటకాలు, ఇతర మిల్లెట్‌ వంటకాలు ఉంచనున్నారు.