పెళ్లి వేడుకలో అందంగా మెరిసిపోవాలని,,,వధువుకు వరుడి బహుమతి

రోజు రోజుకూ మారిపోతున్న కాలానికి అనుగుణంగా కొత్త కొత్త పోకడలు వెలుగు చూస్తున్నాయి. పెళ్లిళ్లు చేసుకునేవారు ప్రీ వెడ్డింగ్ షూట్, పోస్ట్ వెడ్డింగ్ షూట్, డెస్టినేషన్ వెడ్డింగ్ ఇలా రకరకాల కార్యక్రమాలు చేస్తూ ఉన్నారు. ఇక పెళ్లి వేడుకలో వధూ వరులు అందంగా, స్పెషల్‌గా కనిపించాలని రకరకాల ప్రయత్నాలు చేస్తూనే ఉన్నారు. అలాగే ఇక్కడ కూడా అదే జరిగింది. తాను పెళ్లి చేసుకోబోయే అమ్మాయి.. మెహందీ వేడుకలో అందరికంటే డిఫరెంట్‌గా కనిపించాలని ఓ వ్యక్తి వినూత్న ఆలోచన చేశాడు. అందులో భాగంగానే ఆమెకు పెళ్లికి స్పెషల్ లెహంగాను కుట్టించాడు. ఇంతకీ ఆ లెహంగా ప్రత్యేకత ఏంటో తెలుసా. వెలుగులను విరజిమ్మే లెహంగా. దీంతో పెళ్లికి సంబంధించి వధూవరులకు చెందిన వీడియో సోషల్ మీడియాలో తెగ వైరల్ అవుతోంది.

మెహందీ వేడుకల్లో తన భార్య కోసం ప్రత్యేకంగా వరుడు స్పెషల్‌గా ఒక డ్రెస్‌ను తయారు చేయించాడు. పాకిస్థాన్‌కు చెందిన ఒక వరుడు తనకు వధువుపై అమితమైన ప్రేమను మెహందీ ఫంక్షన్‌లో చూపించాడు. ఈ క్రమంలో ఓ వినూత్న ఆలోచనతో ఆమె ధరించే దుస్తులను ప్రత్యేకంగా డిజైన్‌ చేయించాడు. అయితే ఎల్‌ఈడీ లైట్లతో తయారు చేసిన లెహంగాను ఆమెకు అందించాడు. దీంతో ఆ ఎల్ఈడీ లైట్లు కలిగి ఉన్న లెహంగాను ధరించిన వధువు ఆ మెహందీ వేడుకలో పాల్గొంది. దీనికి సంబంధించిన వీడియోను ఆ వధువు ఇన్‌స్టాగ్రామ్‌లో షేర్‌ చేస్తూ.. తనపై తన భర్త చూపిన ప్రేమను వివరిస్తూ మురిసిపోయింది. ఏ వరుడు కూడా తనకు కాబోయే భార్యకు ఇలాంటి గిఫ్ట్ ఇవ్వరని పేర్కొంటూ సంతోషం వ్యక్తం చేసింది.

తమ జీవితంలోనే అతి ముఖ్యమైన రోజైన పెళ్లి వేడుక సందర్భంగా తన భర్త ప్రత్యేకంగా తన కోసం స్వయంగా ఈ ఎల్ఈడీ లెహంగాను డిజైన్‌ చేశారు. ఎల్‌ఈడీ లైట్లతో కూడిన ఈ దుస్తులను ధరిస్తే అందరూ నవ్వుకుంటారని తనకు చెప్పాడని.. కానీ తాను మాత్రం ఎలాంటి మొహమాటం లేకుండా వాటిని ధరిస్తానని చెప్పినట్లు వివరించింది. ఎందుకంటే ఏ వరుడు కూడా తనకు కాబోయే భార్య కోసం ఇలాంటి ప్రయత్నాలు చేయరు కదా అని తెలిపింది. ఇక ఆ మెహందీ ఫంక్షన్‌లో వధువు వేసుకున్న దుస్తులు చూసిన అతిథులు ఆశ్చర్యంలో మునిగిపోయారు. తన భార్య కోసం ఇష్టంగా లెహంగా తయారు చేసిన వరుడిని పొగడ్తలు, ప్రశంసలతో ముంచెత్తారు. ఈ వీడియో కాస్త సోషల్ మీడియాలో వైరల్ కావడంతో నెటిజన్లు ఫన్నీ కామెంట్లు చేస్తున్నారు.