పోలీస్‌ స్టేషన్‌నే తాకట్టు పెట్టి లోన్,,,రంగంలోకి దిగి పత్రాలు సేకరించిన పోలీసులు

తీసుకున్న అప్పు తిరిగి చెల్లించలేదనే కారణంతో పోలీస్ స్టేషన్‌ భూమిని జప్తు చేయాలని కోర్టు ఇచ్చిన ఆదేశాలతో పోలీసులు అవాక్కయ్యారు. ఎందుకంటే ఆ పోలీస్‌ స్టేషన్ తాకట్టు పెట్టిన విషయం వారికి తెలియదు కాబట్టి. పోలీస్ స్టేషన్‌ ఉన్న భూమిని రికవరీ చేయాలని కోర్టు ఆదేశాలు జారీ చేసింది. ఈ విచిత్రమైన ఘటన కేరళలో జరిగింది. భూ లావాదేవీల విషయంలో వెల్లతూవల్ పోలీస్ స్టేషన్‌కు సంబంధించిన భూమిని జప్తు చేసుకోవాలని కోర్టు ఇచ్చిన ఆదేశాలతో పోలీసులు షాక్ అయ్యారు. ఈ ఘటనకు సంబంధించి పూర్వాపరాలు వెలికి తీయడంతో సంచలన విషయాలు వెలుగులోకి వచ్చాయి.

నకిలీ పత్రాలతో బ్యాంకు లోన్లు తీసుకుని ఎగ్గొట్టిన వారు తాకట్టు పెట్టిన వాటిని బ్యాంకులు జప్తు చేయడం మనం చూస్తూనే ఉంటాం. అయితే ఆ తర్వాత ఆ భూమిని కోర్టు అనుమతితో బ్యాంకులు వేలం వేసి.. అప్పుగా ఇచ్చిన డబ్బును రికవరీ చేసుకుంటాయి. ఈ వేలంలో ఆ భూమిని ఎవరు దక్కించుకుంటారో.. వారికి చట్ట రీత్యా అన్ని రకాల హక్కులు ఆ భూమిపై కల్పిస్తారు. అయితే ఇలాగే బ్యాంకు వేలంలో భూమిని కొనుగోలు చేసిన ఓ వ్యక్తి కొంత కాలం తర్వాత దాన్ని మరొకరికి అమ్మేశాడు. అయితే కొన్న వ్యక్తికి అనుమానం వచ్చింది. పత్రాలపై ఉన్న భూమికి వాస్తవంగా ఉన్న భూమికి ఏ మాత్రం పొంతన లేదని గుర్తించాడు. ఆ భూమిని తాకట్టు పెట్టి లోన్ కూడా తీసుకున్నాడు. కానీ లోన్ కట్టకపోవడంతో ఆ భూమిని రికవరీ చేసుకోవాలని కోర్టు ఆదేశాలు ఇచ్చింది.

అయితే ఇక్కడి వరకు బాగానే ఉన్నా అసలు ట్విస్ట్ ఇక్కడే ఉంది. ఎందుకంటే ఆ భూమిలో ప్రస్తుతం పోలీస్ స్టేషన్, పోలీసు హెడ్ క్వార్టర్స్ ఉన్నాయి. కోర్టు నుంచి నోటీసులు రావడంతో కేరళలోని ఇడుక్కి జిల్లా వెల్లతూవల్ పోలీసులు షాక్ అయ్యారు. డెట్ రికవరీ ట్రిబ్యునల్ నుంచి ఓ నోటీసు వచ్చింది. వెల్లతూవల్ పోలీసు స్టేషన్.. దాని హెడ్ క్వార్టర్స్ ఉన్న భూమిని అటాచ్ చేసినట్టు అందులో ఉండటంతో ఇడుక్కి జిల్లా పోలీసు సూపరింటెండెంట్ వెంటనే రంగంలోకి దిగారు. 1989 లో జిల్లా కలెక్టర్ ఆ భూమిని పోలీసు స్టేషన్ అవసరాల కోసం కేటాయిస్తూ ఇచ్చిన ప్రకటనకు సంబంధించిన పత్రాలను ఆ డెట్ రికవరీ ట్రిబ్యునల్‌కు అందించారు.

దీంతో ఆ వివరాల ఆధారంగా హెడ్ సర్వేయర్ మరోసారి సర్వే చేశారు. అయితే అటాచ్ చేయాల్సిన ఆస్తుల నుంచి పోలీసు స్టేషన్ మినహాయిస్తూ ఆ సర్వే రిపోర్టును స్థానిక తహశీల్దార్‌కు అందించారు. బ్యాంకుకు గ్యారంటీగా ఇచ్చిన భూమి సరిహద్దులు తేల్చాలని ట్రిబ్యునల్‌ను ఆశ్రయించిన వ్యక్తి వాదనలకు భిన్నంగా వాస్తవ పరిస్థితులు ఉన్నట్లు వివరించారు. ఎట్టకేలకు పోలీస్ స్టేషన్‌కు సంబంధించిన భూమిని స్వాధీనం చేసుకోవాల్సిన భూమి నుంచి తీసేయడంతో పోలీసులు ఊపిరి పీల్చుకున్నారు.

2012 వేలంలో కొనుగోలు చేసిన భూమి గురించి కొనుగోలుదారు చెప్పినట్టుగా అది అంత విస్తీర్ణం లేదని సర్వేయర్ తెలిపారు. ఆ భూమిని కొనుగోలు దారు వేరే వ్యక్తికి విక్రయించినట్లు చెప్పారు. అందులో నుంచి రోడ్డు, డ్యాం నుంచి నీరు బయటికి వెళ్లే చిన్న కాల్వకు మధ్య ఉన్న భూమిని బ్యాంకుకు గ్యారంటీగా ఇచ్చారని స్పష్టంగా ఉందని వెల్లడించారు. అయితే ఈ వెల్లతూవల్ పోలీస్ స్టేషన్.. ఆ భూమికి బయట.. రోడ్డుకు మరో వైపు ఉందని స్పష్టం చేశారు. అయితే దీనిపై ఇంకా స్పష్టమైన ఆదేశాలు రావాల్సి ఉందని పేర్కొన్నారు.