విశాఖలో రెండో వందేభారత్ ర్యాక్..కానీ ఇప్పటి వరకు ఎలాంటి క్లారిటీ రాలేదు

విశాఖ నుంచి మరో వందేభారత్ రైలు నడవబోతుందని కొద్దిరోజులుగా ప్రచారం జరుగుతోంది. ఈ క్రమంలో ఆగస్టు 20న చెన్నై నుంచి వందేభారత్‌ ర్యాక్‌ను విశాఖకు తీసుకొచ్చిన సంగతి తెలిసిందే. ఈ వందేభారత్‌ను విశాఖ-తిరుపతి మధ్య నడుపుతారని గతంలో ప్రచారం జరిగింది. అయితే విశాఖ-సికింద్రాబాద్‌ మధ్య నడుస్తున్న వందేభారత్‌ ఎక్స్‌ప్రెస్‌ కోసం అదనంగా దీన్ని తెప్పించినట్లు వార్తలొచ్చాయి. ఈ రైలుకు ఒక ర్యాక్‌ మాత్రమే అందుబాటులో ఉంది.. దీంతో విశాఖ నుంచి సికింద్రాబాద్‌కు వెళ్లి.. మళ్లీ అరగంగ వ్యవధిలో అక్కడి నుంచి తిరిగి విశాఖకు బయలుదేరాల్సిన పరిస్థితి.

మార్గ మధ్యలో ఎక్కడ ఇబ్బందులు ఎదురైతే రైలు గంటల తరబడి ఆలస్యమవుతోంది. ఈ పరిస్థితి రాకుండా అదనంగా ఈ ర్యాక్‌ను తెప్పించారని ప్రచారం జరిగింది. అయితే ఇప్పటి వరకు ఒక్కసారి మాత్రమే ఈ బోగీలను ఉపయోగించారు. గత 20రోజులుగా రైలు యార్డులోనే ఉంది.. దీంతో ఈ రైలును నిరుపయోగంగా ఉంది. ఈ రైలును విశాఖ-సికింద్రాబాద్‌ మధ్య నడుస్తున్న వందేభారత్‌కు అదనంగా తెప్పిస్తే ఖాళీగా ఉంచడంపై చర్చ జరుగుతోంది.

మరోవైపు దక్షిణ మధ్య రైల్వే విజయవాడ డివిజన్‌లో మూడో ట్రాక్‌, ఇంటర్‌ లాకింగ్‌ పనులు చేపడుతున్న సంగతి తెలిసిందే. ఇప్పటికే విశాఖ- విజయవాడ మధ్య పలు రైళ్లను రద్దు చేయగా.. గత నెల వ్యవధిలో కొన్ని రైళ్లను 20 రోజులు రద్దు చేశారు. గరీబ్‌రథ్‌ను కూడా వారం రోజులపాటు నడపలేదు. ట్రాక్‌ పనులు ఇంకా కొనసాగుతుండటంతో.. మరో వందేభారత్‌ నడపడం ఇబ్బంది అవుతందనే రైల్వే అధికారులు ఉన్నట్లు తెలుస్తోంది. మూడో ట్రాక్‌ పనులు పూర్తయిన తర్వాత దీన్ని అందుబాటులోకి తెచ్చే అవకాశం ఉందనే వాదన వినిపిస్తోంది.

చెన్నై నుంచి విశాఖ వచ్చిన రైలును ఎక్కడి నుంచి ఎక్కడికి నడుపుతారనే చర్చ జరుగుతోంది. విశాఖ నుంచి తిరుపతికి నడిపే అవకాశం ఉన్నట్లు ప్రచారం జరుగుతోంది. ప్రస్తుతం విశాఖ నుంచి తిరుపతికి ఒక్క తిరుమల ఎక్స్‌ప్రెస్‌ మాత్రమే ఉంది. ఉత్తరాంధ్ర జిల్లాలకు చెందిన జనాలు తిరుపతికి వెళ్లడానికి ఈ రైలును ఆశ్రయిస్తున్నారు. ఈ క్రమంలోనే విశాఖ నుంచి తిరుపతికి నడిపితే మంచి ఆదరణ వస్తుందనే వాదనలు వినిపిస్తున్నాయి. తిరుపతికి వందేభారత్‌ రైలు నడిపితే ఉత్తరాంధ్ర ప్రజలకు ఎంతో ఉపయోగంగా ఉంటుంది అంటున్నారు. ఛార్జీలు ఎక్కువైనా డిమాండ్‌ ఉంటుందనే అభిప్రాయం వ్యక్తమవుతోంది. విశాఖ నుంచి మరో వందేభారత్‌ రైలు నడుస్తుందా.. నడిస్తే ఎప్పటి నుంచి ఉంటుందనేది క్లారిటీ రావాల్సి ఉంది.