లోకేశ్‌ను కూడా అరెస్ట్ చేస్తారా..? టీడీపీలోకి ఎన్టీఆర్ ఎంట్రీ ఇస్తారా..?

ఏపీ మాజీ ముఖ్యమంత్రి, టీడీపీ అధినేత నారా చంద్రబాబు నాయుడు అరెస్ట్ కావడం.. సీఐడీ కోర్టు 14 రోజులపాటు రిమాండ్ విధించడం తెలుగు రాష్ట్రాల్లో హాట్ టాపిక్‌గా మారింది. రాజకీయ నేతల నుంచి సామాన్యుల వరకు చంద్రబాబు జైలుకెళ్లడం గురించి చర్చించుకుంటున్నారు. శనివారం ఉదయం చంద్రబాబును అరెస్ట్ చేయడం.. ఆదివారం ఉదయం ఆయన్ను సీఐడీ కోర్టులో హాజరుపర్చడం.. ఆ తర్వాత ఆయనకు రిమాండ్ విధించడం చూస్తుండగానే జరిగిపోయాయి. చంద్రబాబు నాయుడికి బెయిల్ ఇవ్వాలని కోరుతూ టీడీపీ వర్గాలు న్యాయస్థానంలో పిటిషన్ దాఖలు చేయనున్నాయి.

చంద్రబాబు నాయుడి అరెస్టుతో టీడీపీ శ్రేణులు డీలా పడగా.. వైసీపీ నాయకులు సంబరాలు చేసుకుంటున్నారు. ఇది శాంపిల్ మాత్రమే.. చంద్రబాబు జీవితం మొత్తం జైల్లోనే గడపాల్సి ఉంటుందని వైసీపీ నేతలు జోస్యం చెబుతున్నారు. తీగ లాగితే డొంక కదులుతుందని అంటున్నారు. వైసీపీ నేతలు మాట్లాడుతున్న తీరు చూస్తుంటే.. ఇంకా ఏదో జరగనుందనే భావన కలగక మానదు.

స్కిల్ డెవలప్‌మెంట్ స్కామ్‌లో చంద్రబాబు నాయుడి పేరును చేర్చిన సీఐడీ పోలీసులు.. రిమాండ్ రిపోర్టులో ఆయన తనయుడు నారా లోకేశ్ పేరును సైతం చేర్చారు. 2021లో నమోదు చేసిన ఎఫ్ఐఆర్‌లో చంద్రబాబు పేరు చేర్చనప్పటికీ.. ఆయన్ను అరెస్ట్ చేసిన సీఐడీ పోలీసులు.. ఏదో ఒక కేసులో నారా లోకేశ్‌ను సైతం అరెస్ట్ చేస్తారనే ప్రచారం జరుగుతోంది. అదే జరిగితే టీడీపీ శ్రేణులకు దిశానిర్దేశం చేసే నాయకత్వం లేకుండా పోతుంది.

ఒకవేళ నారా లోకేశ్‌ను కూడా అరెస్ట్ చేస్తే.. టీడీపీ శ్రేణులను ఎవరు ముందుకు నడుపుతారనే ప్రశ్న తలెత్తుతోంది. నారా బ్రాహ్మణి రాజకీయాల్లోకి వస్తారని ప్రచారం జరుగుతుండగా.. మరోవైపు జూనియర్ ఎన్టీఆర్ టీడీపీలోకి ఎంట్రీ ఇవ్వాలని ఫ్యాన్స్ కోరుతున్నారు. చంద్రబాబు అరెస్ట్ నేపథ్యంలో.. ఎన్టీఆర్‌ టీడీపీలోకి రావాలని.. పార్టీని కాపాడాలని ఆయన అభిమానులు కోరుతున్నారు.

ఇటీవల జరిగిన సీనియర్ ఎన్టీఆర్ స్మారక నాణెం విడుదల కార్యక్రమానికి దూరంగా ఉన్న తారక్.. చంద్రబాబు నాయుడు అరెస్ట్ విషయంలోనూ స్పందించలేదు. అలాంటిది ఆయన ఇప్పటికిప్పుడు టీడీపీలో చేరి.. వైసీపీకి వ్యతిరేకంగా పోరాడుతూ.. పార్టీ గెలుపు బాధ్యతను తన భుజానికి ఎత్తుకుంటారని ఆశించడం అత్యాశే అవుతుంది. ఇప్పటి వరకూ జగన్ సర్కారుకు వ్యతిరేకంగా తారక్ మాట్లాడలేదు.

మరో విషయం ఏంటంటే.. ఎన్టీఆర్ జిల్లా జగ్గయ్యపేటలో జూనియర్ ఎన్టీఆర్ పేరిట ఫ్లెక్సీలు వెలిశాయి. నా ఆత్మకు శాంతి కలిగించావ్ జగన్ అంటూ.. సీనియర్ ఎన్టీఆర్ జగన్‌కు థ్యాంక్యూ చెబుతున్నట్టుగా ఏర్పాటు చేసిన ఈ ఫ్లెక్సీలో.. జగన్‌కు హరికృష్ణ, తారక్ బొకే ఇస్తున్నట్లుగా ఫొటోను ఉంచారు. అంతే కాదు సెప్టెంబర్ 10ని సీనియర్ ఎన్టీఆర్ ఆత్మశాంతి దినోత్సవంగా ఇందులో డిక్లర్ చేశారు. ఇదంతా ఎన్టీఆర్‌ను ఇష్టపడే వైసీపీ సానుభూతిపరులు చేశారని అనుకున్నా.. 2009 ఎన్నికల తర్వాత చంద్రబాబు నాయుడు, తారక్ మధ్య సంబంధాలు బాగోలేవనేది మాత్రం నిజం. ఈ నేపథ్యంలో తారక్ టీడీపీ వైపు చూస్తారని అనుకోలేం. ఒకవేళ చంద్రబాబు, లోకేశ్ ఇద్దరూ జైలుకు వెళ్లాల్సిన పరిస్థితి తలెత్తితే.. నారా బ్రాహ్మణి ప్రత్యక్ష రాజకీయాల్లోకి వచ్చే అవకాశాలు మాత్రం ఎక్కువగా ఉన్నాయి. ఇప్పటికే వ్యాపారాలను సమర్థవంతంగా నిర్వహిస్తోన్న ఆమె.. రాజకీయాల్లోనూ రాణించే అవకాశం ఉంది.