బంగాళాఖాతంలో మరో ఆవర్తనం,,,,ఏపీలో ఈ ఐదు జిల్లాల్లో భారీ వర్షాలు

మధ్యప్రదేశ్‌లో ఉపరితల ఆవర్తనం ఏర్పడింది. దీని నుంచి దక్షిణ ఛత్తీసగఢ్‌ వరకు ద్రోణి విస్తరించింది. రుతుపవనద్రోణి తూర్పుభాగం ఈశాన్య బంగాళాఖాతం వరకు కొనసాగుతుంది. వీటి ప్రభావంతో నైరుతి రుతుపవనాలు కోస్తాలో చురుగ్గా మారాయి. అలాగే వాయవ్య, పశ్చిమ మధ్య బంగాళాఖాతంలో 12కి ఉపరితల ఆవర్తనం ఏర్పడే అవకాశం ఉందని అమరావతి వాతావరణ కేంద్రం తెలిపింది. రాష్ట్రవ్యాప్తంగా సోమ, మంగళవారాల్లో భారీ వర్షాలు కురిసే అవకాశం ఉందన్నారు.

రానున్న 24 గంటల్లో ఉత్తర కోస్తాలో అనేకచోట్ల, రాయలసీమ, దక్షిణ కోస్తాల్లో పలుచోట్ల వర్షాలు కురుస్తాయని, ఉత్తరకోస్తాలో అక్కడక్కడా భారీ వర్షాలు కురుస్తాయని వాతావరణ శాఖ తెలిపింది. సోమవారం అల్లూరి సీతారామరాజు, గుంటూరు, ఎన్టీఆర్, పల్నాడు, పార్వతీపురం మన్యం భారీ వర్షాలు కరురుస్తాయంటున్నారు. మిగిలిన జిల్లాల్లో తేలికపాటి నుంచి మోస్తరు వానలకు అవకాశం ఉందంటున్నారు. ఆదివారం విశాఖపట్నం, అనకాపల్లి, అల్లూరి సీతారామరాజు, పార్వతీపురం మన్యం, అనంతపురం, విజయనగరం జిల్లాల్లో మోస్తరు నుంచి భారీ వర్షాలు కురిశాయి.

ఏలూరు జిల్లా భీమడోలులో 48.6 మిల్లీ మీటర్లు, కృష్టా జిల్లా అవనిగడ్డలో 31.8, తూర్పుగోదావరి జిల్లా రాజమండ్రిలో 30, పశ్చిమగోదావరి జిల్లా భీమవరంలో 28.4, బీఆర్ అంబేద్కర్ కోనసీమ జిల్లా అలాపురంలో 23.8, ఏలూరు జిల్లా పోలవరంలో 21.6, పశ్చిమగోదావరి జిల్లాతాడేపల్లిగూడెంలో 19, నర్సాపురంలో 13, తూర్పుగోదావరి జిల్లా ధవళేశ్వరంలో 12, పల్నాడు జిల్లా జంగమేశ్వరపురంలో 11.8, ఎన్టీఆర్ జిల్లా తిరువూరులో 10.6, కృష్టా జిల్లా గుడివాడలో 10.4, అల్లూరి సీతారామరాజు జిల్లా చింతూరులో 10.4, పల్నాడు జిల్లా మాచర్లలో 10.2 మిల్లీ మీటర్ల వర్షపాతం నమోదైంది.

మరోవైపు తెలంగాణకు వాతావరణశాఖ రెయిన్ అలర్ట్ జారీ చేసింది. రాగల ఐదురోజుల పాటు తేలికపాటి నుంచి మోస్తరు వర్షాపాతం నమోదయ్యే అవకాశం ఉందని హైదరాబాద్‌ వాతావరణ కేంద్రం అంచనా వేస్తోంది. ఇవాళ సంగారెడ్డి, మెదక్, వరంగల్, నిజామాబాద్, ములుగు, భూపాలపల్లి , పెద్దపల్లి జిల్లాల్లో అక్కడక్కడా భారీ వర్షాలు పడతాయంటున్నారు ఉరుములు, మెరుపులు వస్తాయని అధికారులు తెలిపారు. ఈ జిల్లాల్లో బుధవారం వరకూ వర్షాలు పడతాయి అంటున్నారు. మరికొన్ని ప్రాంతాల్లో ఉరుములు, మెరుపులతో వానలు పడే సూచనలున్నాయని అంచనా వేశారు. ఈ మేరకు ఆయా జిల్లాలకు ఎల్లో అలెర్ట్‌ జారీ చేసింది. సోమవారం నుంచి బుధవారం వరకు పలుచోట్ల తేలికపాటి నుంచి మోస్తరు వర్షాలు కురిసే సూచనలున్నాయి అంటున్నారు. గురువారం నుంచి శుక్రవారం వరకు జగిత్యాల, కరీంనగర్‌, పెద్దపల్లి, భూపాలపల్లి, ములుగు, ఆదిలాబాద్‌, కుమ్రంభీం ఆసిఫాబాద్‌, మంచిర్యాల, నిర్మల్‌, నిజామాబాద్‌ అక్కడక్కడ భారీ వర్షాలుపడుతాయంటున్నారు.