సినిమా రేంజ్‌లో లారీని ఛేజ్ చేసిన జీఎస్టీ అధికారులు, పోలీసులు.. లోడ్ ఏంటో తెలిస్తే

అనంతపురం జిల్లాలో ఓ లారీ కోసం అధికారులు సినిమా రేంజ్‌లో ఛేజింగ్ సీన్ కనిపించింది. కేరళ నుంచి న్యూఢిల్లీకి లోడ్‌తో వెళుతున్న ఓ లారీ కర్ణాటక జీఎస్టీ అధికారుల కళ్లు గప్పి తప్పించుకుని ఆంధ్రలోకి వచ్చింది. చివరకు ఆంధ్ర ప్రాంతంలో లారీ టైర్‌ బరస్ట్‌ కావడంతో కర్ణాటక పోలీసులు సీజ్ చేశారు. కేరళ నుంచి వస్తున్న లారీని కర్ణాటకలోని హనగల్‌ వద్ద జీఎస్టీ, సేల్స్‌ ట్యాక్స్‌ అధికారులు అడ్డుకునే ప్రయత్నం చేశారు. అయితే లారీ డ్రైవర్‌ వాహనాన్ని ఆపకుండా వెళ్లిపోయాడు. వెంటనే జీఎస్టీ అధికారులు అప్రమత్తం అయ్యారు.. మొలకాల్మూరు పోలీసులకు సమాచారం అందించారు.

జీఎస్టీ అధికారులు 14 కిలోమీటర్ల మేర ఛేజింగ్‌ చేసినా లారీని పోలీసులు, జీఎస్టీ అధికారులు పట్టుకోలేకపోయారు. చివరకు రాయదుర్గం సమీపంలో నిర్మాణంలో ఉన్న బైపాస్‌ దగ్గర చేరుకోగానే టైర్లు బరెస్ట్‌ అయ్యాయి. వెనుకనే వెంబడిస్తూ వచ్చిన కర్ణాటక పోలీసులు, జీఎస్టీ అధికారుల వాహనాలు లారీని చుట్టుముట్టాయి. లారీ క్యాబిన్‌లో పరిమితికి మించి వ్యక్తులు ఉండడంతో అనుమానం వచ్చి వెంటనే రాయదుర్గం అర్బన్ పోలీసులకు సమాచారం ఇచ్చారు. తమకు భద్రత కల్పించాలని కోరడంతో.. వారు ఘటనాస్థలానికి వెళ్లారు.

లారీ ఏపీ పరిధిలోకి రావడంతో స్వాధీనం చేసుకుని తామే కేసు నమోదు చేస్తామని సీఐ చెప్పారు. అయితే కర్ణాటక అధికారులు వీల్లేదన్నారు.. చివరకు విషయాన్ని తెలుసుకున్న జిల్లా డిప్యూటీ కమర్షియల్‌ ట్యాక్స్‌ అధికారి సుదర్శన్‌, డీసీటీఓ రమణ రాయదుర్గం చేరుకుని బళ్లారి జీఎస్టీ డిప్యూటీ కమిషనర్‌ ఇనామ్‌ధీర్‌, అసిస్టెంట్‌ కమిషనర్‌ అభిషేక్‌తో చర్చించారు. లారీలో ఉన్న సరుకుపై ఆరా తీశారు.

వక్కలోడుతో వెళుతున్నట్లుగా డ్రైవర్‌, క్లీనర్ అధికారులకు తెలిపారు. ముందుగా గుర్తించిన కర్ణాటక జీఎస్టీ అధికారులకే కేసు నమోదు బాధ్యతలు అప్పగించేలా అంగీకారానికి వచ్చారు. అయితే రికార్డుల్లో మాత్రం ఇరు రాష్ట్రాల అధికారులు జాయింట్‌ ఆపరేషన్‌ నిర్వహించినట్టు పొందుపరిచారు. లారీలో వక్క కాకుండా ఇంకా ఏమైనా ఉన్నాయా అనే అనుమానాలు వ్యక్తమయ్యాయి. లారీని జీఎస్టీ అధికారులు కర్ణాటకకు తరలించారు.