పిల్లలపై బెంగతో కుంగుబాటు.. భారత్‌కు రానున్న పాక్ ప్రియుడ్ని పెళ్లాడిన అంజు

ఫేస్‌బుక్‌లో పరిచయమైన యువకుడి కోసం పాకిస్థాన్‌కు వెళ్లి.. అతడ్ని పెళ్లాడిన రాజస్థాన్‌కు చెందిన (Rajasthan)కు అంజూ (Anju) గుర్తుందా?. పిల్లల్ని వదిలేసి ప్రియుడి కోసం పాక్ వెళ్లిన ఈ వ్యవహారానికి సంబంధించిన వార్తలు ఇటీవల సోషల్ మీడియాలో తెగ వైరల్ అయ్యాయి. అయితే, ఆమె వచ్చే నెలలో స్వదేశానికి రానుందట. తన పిల్లలపై బెంగపెట్టుకుని.. ఆమె ఆరోగ్యం క్షీణించిందట. ఈ విషయాన్ని ఆమెను పెళ్లాడిన పాక్ యువకుడు నస్రూల్లా చెప్పాడు. అంజూ (ఫాతిమా) మానసిక వేదనతో సతమతం అవుతోందని, తన ఇద్దరు పిల్లలపై బెంగ పెట్టుకుందని అతడు ఓ వార్తాసంస్థతో ఫోన్‌లో మాట్లాడుతూ తెలిపాడు.

ఈ నేపథ్యంలో వచ్చే నెలలో ఆమె భారత్‌కు వెళ్లాలని భావిస్తున్నట్లు నస్రూల్లా చెప్పాడు. ఇటీవలి సంఘటనలతో ఆమె కలత చెందుతోందని తెలిపాడు. అంతేకాదు, తన పిల్లలను కోల్పోతోన్న భావన ఆమెకు కలుగుతోందని వివరించాడు. ఆమె మానసికంగా కంగుబాటుతో ఆమె ఆరోగ్యం క్షీణించడం తనకు ఇష్టం లేదని చెప్పాడు. ఆమె తన పిల్లలను కలవడానికి అక్కడకు వెళ్లడం మంచిదని నస్రూల్లా అభిప్రాయపడ్డాడు. స్వదేశానికి తిరిగి వెళ్లడం తప్ప వేరే మార్గం లేదని యువకుడు పేర్కొన్నాడు. అయితే, తమ దేశంలో డాక్యుమెంటేషన్ ప్రక్రియకు కొంత సమయం పడుతుందని, వచ్చే నెలలో ఫాతిమా భారత్‌కు వెళ్లే అవకాశం ఉందని చెప్పాడు. ఒకవేళ తనకు వీసా వస్తే ఆమెతో కలిసి తానూ భారత్‌కు వెళ్తానని అన్నాడు.

రాజస్థాన్‌లోని భివాండీ జిల్లాకు చెందిన 34 ఏళ్ల అంజూకు ఇదివరకే వివాహమై ఇద్దరు పిల్లలు ఉన్నారు. 15 ఏళ్ల కుమార్తె, ఆరేళ్ల కుమారుడ్ని వదిలేసి.. ఫేస్‌బుక్ ప్రియుడి కోసం ఆమె జులైలో పాకిస్థాన్‌కు వెళ్లిపోయింది. అతడ్ని వివాహం చేసుకుని తన పేరును ఫాతిమాగా మార్చుకుంది. ఆ జంటకు అక్కడ పాక్ రియల్‌ ఎస్టేట్‌ సంస్థ యజమాని మొహసీన్‌ ఖాన్‌ అబ్బాసీ కొంత భూమి, నగదును కానుకగా అందజేశాడు. ఖైబర్‌ పఖ్తుంఖ్వా ప్రావిన్సుల్లో అప్పర్‌ దిర్‌ జిల్లాలోని ఓ గ్రామంలో ఇద్దరూ నివసిస్తున్నారు. తాను కొన్ని పాష్తో పదాలు నేర్చుకున్నానని, పాక్‌లో ఇంత పేరు వస్తుందని ఇక్కడికి రాకముందు తనకు తెలియదని అంజూ చెప్పారు. అంజూ కుటుంబం మాత్రం తమ దృష్టిలో చచ్చిపోయిందని, తిరిగి భారత్‌కు వచ్చే హక్కులేదని ఆగ్రహం వ్యక్త చేస్తోంది. ఒకవేళ ఆమె వచ్చినా కఠిన శిక్ష ఎదుర్కోవాల్సి ఉంటుందని హెచ్చరించింది. ఆమె తప్పు చేసిందని, అలాంటి వాళ్లు శిక్ష అనుభవించాల్సిందేనని అంజు తండ్రి స్పష్టం చేశాడు.ఇక, అంజూ తన భర్త అరవింద్‌కు జైపూర్ వెళ్తున్నానని చెప్పి ఇంటి నుంచి బయలుదేరింది. అయితే, చివరకు ఆమె పాక్ వెళ్లినట్టు మీడియా ద్వారా తెలిసి అతడు విస్తుపోయాడు.