గాల్లో ఎమర్జెన్సీ తలెత్తడంతో దూకేసిన పైలట్.. రూ.665 కోట్ల ఫైటర్ జెట్ మిస్సింగ్

సాధారణంగా సైన్యం వినియోగించే ఫైటర్ జెట్‌లు చాలా ఖరీదైనవి ఉంటాయి. వందల కోట్లు పెట్టి అత్యాధునిక టెక్నాలజీ ఉన్న జెట్‌లను ఏ దేశమైనా సైనికులకు అందజేస్తుంది. అయితే ఓ ఫైటర్‌ జెట్‌లో టెక్నికల్ సమస్య ఏర్పడి.. గాల్లో ఉండగానే ఎమర్జెన్సీ తలెత్తింది. దీంతో అందులో ఉన్న పైలట్.. వెంటనే దూకేశాడు. అయితే ఆ తర్వాత ఆ ఫైటర్ జెట్ ఆచూకీ కనిపించడం లేదు. మిస్ అయిన ఆ ఫైటర్ జెట్ విలువ దాదాపు రూ.665 కోట్లు కావడం గమనార్హం.

అమెరికా సైన్యానికి చెందిన ఓ ఫైటర్ జెట్ గాల్లో ఉండగానే మిస్ అయింది. ఒక ప్రాంతం నుంచి మరో ప్రాంతానికి బయల్దేరిన ఆ ఫైటర్ జెట్‌.. గాల్లో ఉండగా సాంకేతిక లోపాన్ని పైలట్ గుర్తించాడు. దీంతో వెంటనే సంబంధిత అధికారులకు సమాచారం అందించాడు. పరిస్థితి మెరుగుకాక పోగా.. ఎమర్జెన్సీ తలెత్తింది. ఈ క్రమంలోనే అందులో ఉన్న పైలట్.. పారాచూట్ సాయంతో అందులో నుంచి దూకేశాడు. అయితే అప్పుడే అసలు ట్విస్ట్ మొదలైంది. పైలట్ దూకిన తర్వాత ఆ ఫైటర్ జెట్ జాడ కనిపించడం లేదు. దీంతో సైనిక అధికారులు రంగంలోకి దిగారు. ఆచూకీ గల్లంతైన ఫైటర్ జెట్ గురించి ఏదైనా సమాచారం తెలిస్తే చెప్పాలని విజ్ఞప్తి చేస్తున్నారు. అయితే ఈ ఘటనపై తీవ్ర విమర్శలు వెల్లువెత్తుతున్నాయి.

అమెరికాలో ఉన్న సౌత్‌ కరోలినా రాష్ట్రంలోని బ్యూ ఫోర్ట్ ఎయిర్ స్టేషన్ నుంచి అమెరికా సైన్యానికి చెందిన ఫైటర్ జెట్‌ ఎఫ్‌ 35 బయల్దేరింది. అది గాల్లోకి ఎగిరిన కొద్ది సేపటికి అందులో ఎమర్జెన్సీ ఏర్పడటంతో పైలట్ దూకేశాడు. ఆ తర్వాత ఆ ఫైటర్ జెట్ ఆచూకీ కనిపించడం లేదు. ఆదివారం ఈ ఘటనలో కనపడకుండా పోయిన ఎఫ్ 35 ఫైటర్ జెట్ విలువ 80 మిలియన్ డాలర్లు అంటే మన భారత కరెన్సీలో రూ. 665 కోట్లు ఉంటుందని అంచనా వేస్తున్నారు. సైన్యానికి చెందిన ఎఫ్ 35 ఫైటర్ జెట్.. మిస్ అవడంతో మిలటరీ అధికారులు తీవ్ర ఆందోళనలో పడ్డారు. ఫెడరల్ ఏవియేషన్ రెగ్యులేటర్‌తో కలిసి పోర్టు సిటీ అయిన చార్లెస్టన్‌లో ఫైటర్ జెట్ ఆచూకీ కోసం గాలిస్తున్నట్లు సైనిక అధికారులు తెలిపారు. చార్లెస్టన్ నగరంలో ఉన్న రెండు సరస్సుల్లో గాలింపు చర్యలు కొనసాగిస్తున్నారు.

ఈ వ్యవహారంపై స్పందించిన అమెరికా సైన్యం.. జాడ లేకుండా పోయిన ఎఫ్ 35 ఫైటర్ జెట్‌ను కనిపెట్టేందుకు ఏదైనా సమాచారం ఉంటే చెప్పాలని ప్రజలను కోరింది. ఈ విషయంలో సహకరించాలని స్థానికులకు విజ్ఞప్తి చేసింది. ఎఫ్ 35 ఫైటర్ జెట్‌కు సంబంధించిన ఎలాంటి సమాచారమైనా తెలిస్తే వెల్లడించాలని కోరుతూ ఎమర్జెన్సీ కాంటాక్ట్ నంబర్లను అధికారులు విడుదల చేశారు. అయితే ఈ ఘటనపై తీవ్ర విమర్శలు వ్యక్తం అవుతున్నాయి. అంత ఖరీదైన ఎఫ్ 35 ఫైటర్ జెట్‌లో ఉండే ట్రాకింగ్‌ డివైజ్ ఏమైందంటూ ప్రశ్నల వర్షం కురిపిస్తున్నారు. ఇక ఈ ఘటనలో ఎఫ్ 35 ఫైటర్ జెట్‌ నుంచి దూకిన పైలట్ సురక్షితంగా ప్రాణాలతో బయటపడ్డాడు. ఇక ఈ ఎఫ్‌ 35 ఫైటర్ జెట్‌ను లాక్‌హీడ్ మార్టిన్‌ సంస్థ తయారు చేసింది.