ఏపీ టీడీఎల్పీ సమావేశం,,,,అసెంబ్లీకి వెళ్లాలని నిర్ణయం

ఏపీ టీడీఎల్పీ సమావేశం జరిగింది. గురువారం నుంచి అసెంబ్లీ సమావేశాలు జరగనున్నందున హాజరుకావాలా? వద్దా? అనే అంశంపై చర్చ జరిగింది. నేతలు అసెంబ్లీ సమావేశాలకు హాజరుకావాలని టీడీఎల్పీ సమావేశంలో నిర్ణయించారు. ఈ సమావేశంలో టీడీపీ జాతీయ ప్రధాన కార్యదర్శి నారా లోకేష్ జూమ్ కాల్‌లో పాల్గొన్నారు. పోరాటమే అజెండాగా ప్రజల కోసం ఎన్ని అవమానాలైనా భరిద్దామన్నారు లోకేష్. చంద్రబాబు అక్రమ అరెస్టు, ప్రజా సమస్యలపై నిలదీసేందుకు చట్టసభల వేదిక వదులుకోకూడదన్నారు. సభలో పోరాటం చేయాలని.. వీధుల్లోనూ పోరాటం చేద్దామన్నారు. చంద్రబాబు అరెస్టు అక్రమమనే విషయాన్ని ప్రజల్లోకి తీసుకెళ్లాలని.. ప్రజల కోసం ఎన్ని అవమానాలైనా భరిద్దామన్నారు.

ఒకవేళ సభలో మాట్లాడే అవకాశం ఇవ్వకుంటే నిరసన ద్వారా అయినా చంద్రబాబు అరెస్ట్‌పై ఉద్యమించాలని సమావేశంలో నిర్ణయం తీసుకున్నారు. సభలో అవకాశం ఇవ్వకపోతే జగన్‌ అవినీతి బాగోతాన్ని ప్రజాక్షేత్రంలో ఎండగట్టాలని నిర్ణయించారు. ఇంకా తదుపరి అరెస్టులు ఉంటాయనే ప్రచారం జరగడంతో అందుకు తగ్గట్టు అసెంబ్లీ లోపలా.. వెలుపలా పార్టీ కార్యాచరణ రూపొందించుకోవాలని పయ్యావుల కేశవ్‌ సూచించారు. కొందరు మంత్రులు మరీ అతిగా ప్రవర్తిస్తున్నారని ఈ సందర్భంగా టీడీపీ ఎమ్మెల్యేలు అభిప్రాయపడ్డారు.

అసెంబ్లీని వైఎస్సార్‌సీపీ కార్యాలయంగా మార్చారు.. ఏదైనా తీర్మానం ఇస్తే చర్చకు తీసుకోవడం లేదన్నారు టీడీపీ ఎమ్మెల్యే నిమ్మల రామానాయుడు. ప్రతిపక్షానికి పది నిమిషాల సమయం కూడా ఇవ్వడం లేదని.. ప్రతిపక్షం గొంతు నొక్కే విధంగా సభ గతంలో సాగిందన్నారు. వీటిని ఎదుర్కొంటూ టీడీపీ తరఫున పోరాడాలని నిర్ణయం తీసుకున్నామన్నారు. అసెంబ్లీలో చంద్రబాబుపై నమోదు చేసిన అక్రమ కేసులపై పోరాడాలని నిర్ణయం తీసుకున్నామన్నారు. ప్రజలకు వాస్తవాలను తెలియజేయాలని భావిస్తున్నామన్నారు. అలాగే రాష్ట్రంలో జరుగుతున్న నియంత పాలనపై అసెంబ్లీలో గళం వినిపించాలని నిర్ణయించామన్నారు. ప్రజా వ్యతిరేక పాలనపై అసెంబ్లీలో పోరాటం చేస్తామన్నారు.