ఏపీ ప్రభుత్వ ఉద్యోగులకు,,,మరో ఏడాది ఉచిత వసతి పొడగింపు

ఏపీ ప్రభుత్వ ఉద్యోగులకు జగన్ సర్కార్ గుడ్‌న్యూస్ చెప్పింది. అమ‌రావ‌తిలో ఉద్యోగుల‌ ఉచిత వ‌స‌తికి సంబంధించి ప్ర‌భుత్వం కీలక నిర్ణయం తీసుకుంది. వసతిని మరో ఏడాది పొడిగిస్తూ కీల‌క ఆదేశాలు జారీ చేశారు. గతంలో జారీ చేసిన ఉత్తర్వుల ప్రకారం.. ఈ ఏడాది జూన్‌ వరకు ఉచిత వసతి అవకాశం ఉంది. తాజా నిర్ణయం ప్రకారం 2023 జూన్ నుంచి 2024 జూన్ వరకూ ఉచిత వసతి, ట్రాన్సిట్ వసతి కల్పిస్తూ తాజాగా ఆదేశాలు జారీ అయ్యాయి. ఈ నిర్ణయంపై ఉద్యోగ సంఘాల నేతలు ఆనందం వ్యక్తం చేశారు.

ఆంధ్రప్రదేశ్‌ సచివాలయం, హెచ్‌వోడీలు, హైకోర్టు, రాజ్ భవన్‌లో విధులు నిర్వహించే ఉద్యోగులకు విజయవాడ, గుంటూరు వేర్వేరు ప్రాంతాల్లో కేటాయించిన వసతి పొడిగించారు.సచివాలయం, వివిధ శాఖలకు సంబంధించిన హెచ్‌వోడీ కార్యాలయాల్లో పని చేసే ఉద్యోగులకు ఉచిత వసతి సౌకర్యాన్ని పునరుద్దరిస్తూ ప్రభుత్వం ఊరట కల్పించింది. గతంలో ప్రభుత్వం ఉచిత వసతిని రద్దు చేసింది. ఆ తర్వాత ప్రభుత్వం ఆంధ్రప్రదేశ్‌ సెక్రటేరియట్‌ అసోసియేసన్ ఉద్యోగుల రిక్వెస్ట్‌తో పొడిగించింది.

రాష్ట్ర విభజన తర్వాత హైదరాబాద్ సచివాలయంలో ఉద్యోగులు పనిచేశారు. ఆ తర్వాత గత ప్రభుత్వం అమరావతిలో సచివాలయాన్ని నిర్మించడంతో అందరూ ఇక్కడికి రావాల్సి వచ్చింది. ఆ సమయంలో ఉద్యోగులకు వసతి సౌకర్యాలు కల్పిస్తామని ప్రభుత్వం హామీ ఇచ్చిన సంగతి తెలిసిందే.. అప్పుడు అమరావతిలో ఉచితంగా వసతి కల్పించిన సంగతి తెలిసిందే. అంతేకాదు హైదరాబాద్ నుంచి విజయవాడకు స్పెషల్ రైలును కూడా నడుపుతోంది. అలాగే ఉద్యోగుల కోసం వారాంతంలో రెండు సెలవుల్ని మంజూరు చేసింది.