చంద్రబాబు కోసం దీక్ష.. మాట్లాడుతూ కుప్పకూలిన మహిళా నేత
Andhra Pradesh Telugu | Suryaa Desk | Published : Wed, Sep 20, 2023, 09:30 PM
కాకినాడలో తెలుగుదేశం పార్టీ దీక్షా శిబిరంలో విషాద ఘటన చోటు చేసుకుంది. దీక్షా శిబిరంలో ప్రసంగిస్తూ మహిళా నాయకురాలు చిక్కాల సత్యవతి కుప్పకూలి మృతి చెందారు. టీడీపీ కాకినాడ నగర మహిళా అధ్యక్షురాలు సత్యవతి వ్యవహరిస్తున్నారు. ఈ ఘటనతో కాకినాడ టీడీపీ శ్రేణుల్లో విషాదం నెలకొంది. చంద్రబాబు అరెస్టు, నిర్బంధం ఘటనలను ఖండిస్తూ కాకినాడ నగర మాజీ ఎమ్మెల్యే వనమాడి కొండబాబు ఆధ్వర్యంలో బుధవారం (సెప్టెంబర్ 20) రిలే నిరాహార దీక్షలు నిర్వహించారు. ఈ శిబిరంలో కాకినాడ నగర టీడీపీ పార్టీ మహిళా అధ్యక్షురాలు చిక్కాల సత్యవతి పాల్గొన్నారు. సాయంత్రం దీక్షా శిబిరాన్ని ఉద్దేశించి మాట్లాడుతూ.. సత్యవతి ఒక్కసారిగా కుప్పకూలిపోయారు. అపస్మారక స్థితిలో ఉన్న ఆమెను తెలుగుదేశం పార్టీ నాయకులు హుటాహుటిన ఆసుపత్రికి తీసుకెళ్లారు. అప్పటికే ఆమె మృతి చెందినట్లు వైద్యులు ధ్రువీకరించారు. చంద్రబాబు నాయుడు అరెస్టుల నేపథ్యంలో చేపట్టిన రిలే నిరాహార దీక్షలు, నిరసన కార్యక్రమాల్లో సత్యవతి చురుగ్గా పాల్గొన్నారు. సత్యవతి కొన్నాళ్లుగా గుండె సంబంధిత సమస్యతో బాధ పడుతున్నట్లు అనుచరులు తెలిపారు.
|
|