ఏపీ రాష్ట్రంపై అల్పపీడన ప్రభావం,,,భారీ వర్షాలు కురిసే అవకాశం

బంగాళాఖాతంలో అల్పపీడనం పశ్చిమ బెంగాల్, ఒడిశా తీరాలవైపు కేంద్రీకృతమైంది. అలాగే ఈ అల్పపీడనానికి నైరుతి రుతుపవనాలు తోడయ్యాయి. మరో ఉపరితల ద్రోణి ఏర్పడి ఉంది. ఫలితంగా రాష్ట్రంలో గాలులు పెద్దఎత్తున వీస్తున్నాయి. ఈ ప్రభావంతో ఇవాళ కోస్తా, ఉత్తరాంధ్రతో పాటుగా రాయలసీమ ప్రాంతాల్లో మోస్తరు నుంచి భారీ వర్షాలు కురుస్తాయని అంచనా వేస్తున్నారు. బాపట్ల, ఏలూరు, కృష్ణా, పార్వతీపురం మన్యం, ప్రకాశం, పశ్చిమగోదావరి, కర్నూలు, నంద్యాల, కడప జిల్లాల్లో భారీ వర్షాలు పడతాయని అంచనా వేస్తున్నారు. శ్రీకాకుళం, విజయనగరం, అల్లూరి సీతారామరాజు, కాకినాడ, డాక్టర్ బీఆర్ అంబేద్కర్ కోనసీమ, తూర్పుగోదావరి, ఎన్టీఆర్, పల్నాడు, నెల్లూరు, శ్రీ సత్యసాయి, అన్నమయ్య, చిత్తూరు, తిరుపతి జిల్లాల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉందని అంచనా వేశారు. మిగిలిన జిల్లాల్లో తేలికపాటి వానలు పడతాయంటున్నారు.

నంద్యాల జిల్లా రుద్రవరంలో 91.8 మిల్లీ మీటర్లు, నంద్యాల జిల్లా ఆత్మకూరులో 77.4, విజయనగరం జిల్లా బొబ్బిలిలో 74.6, బాపట్ల జిల్లా అద్దంకిలో 53.6, నంద్యాల జిల్లా కోయిలకుట్లలో 52, ఎన్టీఆర్ జిల్లా పాలేరు బ్రిడ్జి దగ్గర 53, పశ్చిమ గోదావరి జిల్లా నర్సాపురంలో 47.3, కడప జిల్లా జమ్మలమడుగులో 42.4, పల్నాడు జిల్లా మాచర్లలో 42.2, చిత్తూరు జిల్లా కుప్పంలో 42.2, పార్వతీపురం మన్యం జిల్లా పాలకొండలో 41.5, ప్రకాశం జిల్లా రాచర్లలో 41.4, కర్నూలు జిల్లా ఓర్వకల్లులో 41, ఏలూరు జిల్లా వేలూరుపాడులో 40.2, నంద్యాల జిల్లా పడిగ్యాలలో 40.6, కడప జిల్లా కొండాపురంలో 36.8, ప్రకాశం జిల్లా దర్శిలో 36.8, డాక్టర్ బీఆర్ అంబేద్కర్ కోనసీమ జిల్లా అమలాపురంలో 33.2, పార్వతీపురం మన్యం జిల్లా బాలాజీపేటలో 33.2, ప్రకాశం జిల్లా బేస్తవారిపేటలో 32.6, నంద్యాల జిల్లా అవుకులో 32.2, పార్వతీపురం మన్యం జిల్లా పాలకొండలో 30.6, నంద్యాల జిల్లా దోర్నిపాడులో 30.4, విజయనగరం జిల్లా చీపురు పల్లిలో 30 మిల్లీ మీటర్ల వర్షపాతం నమోదైంది.

మరోవైపు తెలంగాణలో వర్షాలు కురుస్తున్నాయి. రాష్ట్రంలో శని, ఆదివారాల్లో విస్తారంగా వర్షాలు కురిసే సూచనలున్నట్లు వాతావరణశాఖ పేర్కొంది. శుక్రవారం కుమురం భీం ఆసిఫాబాద్‌ జిల్లా వాంకిడి మండలంలో 4.4 సెం.మీటర్లు, నిర్మల్‌ జిల్లా ఖానాపూర్‌లో 4, మంచిర్యాల జిల్లా భీమినిలో 3.5, ఆదిలాబాద్‌ జిల్లా ఉట్నూరు మండలంలో 2.7 సెం.మీటర్ల వర్షపాతం నమోదైంది. నారాయణపేట జిల్లాల్లోనూ ఓ మోస్తరు వర్షాలు కురిశాయి. తెలుగు రాష్ట్రాల్లో గత రెండు వారాలుగా విచిత్రమైన వాతావరణం కనిపించింది. కొద్దిరోజులు ఎండలు మండిపోగా.. కొన్ని రోజులు మళ్లీ వానలు పడ్డాయి.