కొద్ది వారాల కిందటే భారత్‌కు సమాచారం ఇచ్చా: మరోసారి ట్రూడో తీవ్ర వ్యాఖ్యలు

ఖలీస్థానీ ఉగ్రవాది హర్‌దీప్ సింగ్ నిజ్జర్ హత్య విషయంలో కెనడా ప్రధాని భారత్‌పై చేసిన ఆరోపణలతో ఇరు దేశాల మధ్య దౌత్య సంబంధాలు దారుణంగా దెబ్బతిన్నాయి. భారత్, కెనడాలు పరస్పరం దౌత్యవేత్తలను బహిష్కరించడం.. కెనడియన్లకు కేంద్రం వీసా నిలిపివేయడం వంటి పరిణామాలు చోటుచేసుకున్నాయి. ఈ నేపథ్యంలో సోమవారం తాను చేసిన ఆరోపణలకు సంబంధించి జస్టిన్ ట్రూడో శుక్రవారం మరోసారి ప్రస్తావించారు. బ్రిటిష్ కొలంబియాలో జరిగిన నిజ్జర్ హత్యలో భారత ప్రభుత్వ ఏజెంట్ల పాత్రకు సంబంధించిన విశ్వసనీయ ఆరోపణలను కొద్ది వారాల కిందటే న్యూఢిల్లీతో పంచుకున్నామని ట్రూడో వెల్లడించారు.

‘నేను సోమవారం పార్లమెంట్‌లో చేసిన విశ్వసనీయ ఆరోపణలను భారత్‌తో కెనడా పంచుకుంది. మేము చాలా వారాల కిందటే వారితో మాట్లాడాం.. భారత్‌తో నిర్మాణాత్మకంగా పని చేసేందుకు మేం సిద్ధంగా ఉన్నాం. వారు మాకు సహకరిస్తారని మేం ఆశిస్తున్నాం.. తద్వారా చాలా తీవ్రమైన ఈ విషయంపై ముందుకు వెళ్లొచ్చు’ అని అన్నారు. కాగా, నిజ్జర్ హత్యలో భారత ప్రభుత్వ ఏజెంట్ల పాత్రపై ఫైవ్ ఐస్ కూటమిలోని ఓ దేశం నుంచి సమాచారం అందించినట్టు తెలుస్తోంది. కానీ, కెనడా నిఘా వర్గాలు పసిగట్టాయా? లేక వేరే వర్గాల నుంచి సమాచారం వచ్చిందా? అనేది మాత్రం ట్రూడో స్పష్టత ఇవ్వలేదు. అంతేకాదు, దీనిని ఆయన కార్యాలయం లేదా అధికారిక మీడియా ధ్రువీకరించడం లేదా ఖండించలేదు.

మరోవైపు,ఈ విషయంలో అమెరికా స్వరం మారుతోన్నట్టు కనిపిస్తోంది. అమెరికా జాతీయ భద్రతా సలహాదారు జాక్‌ సలీవాన్‌ వ్యాఖ్యలే ఇందుకు నిదర్శనం. ఆయన మీడియాతో రెండు రోజుల కిందట మాట్లాడుతూ భారత్‌కు ప్రత్యేక మినహాయింపులు ఏమీ లేవని వ్యాఖ్యానించారు. ‘దౌత్యవేత్తలతో ప్రైవేటుగా ఏం మాట్లాడుకున్నామో వెల్లడించను. కానీ, ఈ విషయంలో భారత్‌లోని అత్యున్నత స్థాయి దౌత్యవేత్తలతో మేము టచ్‌లో ఉన్నాం.. ఇక ముందు కూడా ఉంటాం. ఇది అమెరికాకు ఆందోళనకరం.. మేము తీవ్రంగా పరిగణించే విషయం. నిరంతరం దీనిపై సంప్రదింపులు జరుపుతాం.. ఈ విషయంలో భారత్‌కు ప్రత్యేకమైన మినహాయింపు లేదు’’ అని పేర్కొన్నారు.

ఇదే సమయంలో అమెరికా విదేశాంగ మంత్రి ఆంటోనీ బ్లింకేన్ కూడా ఇదే రకమైన అభిప్రాయం వ్యక్తం చేశారు. ఖలీస్థానీ హత్యపై అమెరికా జవాబుదారీతనం కోరుకుంటోందని అన్నారు. కెనడా ప్రధాని ట్రూడో ఆరోపణలపై మేము తీవ్ర ఆందోళన చెందుతున్నామని వ్యాఖ్యానించారు. ‘ఈ అంశమై మేము కెనడా అత్యున్నత అధికారులతో చాలా సన్నిహితంగా సంప్రదింపులు జరుపుతున్నాము.. కేవలం సంప్రదింపులు మాత్రమే కాకుండా సమన్వయం చేస్తున్నాం.. ఈ దర్యాప్తులో కెనడాతో కలిసి భారత్ పనిచేయడం చాలా ముఖ్యం.. మేము జవాబుదారీతనం చూడాలనుకుంటున్నాం’ అని బ్లింకేన్ వ్యాఖ్యానించారు.