సీఎం పదవి సూటవ్వదని బాలయ్యే నాతో చెప్పారు: వైసీపీ నేత వెంకట్రావు

మాజీ ఎమ్మెల్యే, వైఎస్సార్‌సీపీ నేత చెంగల వెంకట్రావు ఆసక్తికర వ్యాఖ్యలు చేశారు. చంద్రబాబు కొడుకు నారా లోకేష్ కోసం జూనియర్ ఎన్టీఆర్‌ను దూరం పెట్టారని ఆరోపించారు. ఎప్పటికైనా జూనియర్ ఎన్టీఆర్ వచ్చి నారా కుటుంబానికి బుద్ధి చెబుతారని చెంగల వెంకట్రావు జోస్యం చెప్పారు. గతంలో తాను నందమూరి బాలయ్యతో మాట్లాడిన అంశాలను వెంకట్రావు ప్రస్తావించారు. 'నేను బాలయ్యతో మాట్లాడాను.. ఫ్లైట్ లో పక్కపక్కన కూర్చుంటే.. నందమూరి అభిమానిగా నా మనసులో మాట చెప్పాను. నందమూరి ఇంటివారిగా మీరు ముఖ్యమంత్రి అవ్వాలని నా కోరిక' అని బాలయ్యను అడిగినట్లు వెంకట్రావు చెప్పుకొచ్చారు. అయితే అప్పటికి ఆయన ఎమ్మెల్యే కూడా కాదని చెప్పారు. బాలయ్య అది మన మెంటాలిటీకి సూటవ్వదు లెండి అంటూ సమాధానం ఇచ్చినట్లు చెప్పారు.

ఆ తర్వాత ఓసారి జూనియర్ ఎన్టీఆర్ తన ఆఫీసుకు వచ్చిన సందర్భంలో కూడా ఇదే అంశాన్ని మరోసారి ప్రస్తావించానన్నారు వెంకట్రావు. 'నా వీపు మీద మచ్చ చూడు.. నా చేతిలో జాతకం చూడు.. నాకు సీఎం యోగం ఉంది" అని చెప్పుకొచ్చారు. ఎప్పటికైనా జూనియరే నిలబడతారని.. కచ్చితంగా రాజకీయాల్లోకి వస్తారన్నారు చెంగల వెంకట్రావు. చెంగల వెంకట్రావు గతంలో నిర్మాతగా ఉన్నారు.. చాలా హిట్ సినిమాలను తీశారు. బాలయ్యతో చేసిన సమర సింహారెడ్డి మూవీ సూపర్ హిట్ అయ్యింది. అప్పటి నుంచి నిర్మాత చెంగలపై బాలకృష్ణకు ప్రత్యేక అభిమానం. ఆయన సిఫారుతోనే తెలగుదేశం పార్టీ ఎమ్మెల్యే టిక్కెట్ దక్కించుకున్నారు. 1999, 2004 అసెంబ్లీ ఎన్నికల్లో పాయకరావుపేట నుంచి ఎమ్మెల్యేగా గెలిచారు. 2009లో మళ్లీ పాయకరావుపేట నుంచి పోటీచేసి ఓడిపోయారు. ఆ తర్వాత వైఎస్సార్‌సీపీలో చేరిన ఆయన.. 2014లో పోటీ చేసి ఓడిపోయారు. అంతేకాదు చెంగల వెంకట్రావు గతంలో ఎన్టీఆర్‌తో నర్సింహుడు మూవీ తీశారు.