సుప్రీం కోర్టులో చంద్రబాబు క్వాష్ పిటిషన్‌పై,,,,విచారణ చేపట్టేందుకు అంగీకరించిన సీజేఐ

స్కిల్‌ డెవలప్‌మెంట్ కేసులో మాజీ ముఖ్యమంత్రి చంద్రబాబు దాఖలు చేసిన స్పెషల్‌ లీవ్‌ పిటిషన్‌ (ఎస్‌ఎల్‌పీ) బుధవారం సుప్రీంకోర్టులో విచారణకు రానుంది. చంద్రబాబు తరఫు న్యాయవాదులు దాఖలు చేసిన మెన్షన్‌ మెమోపై నిర్ణయం తీసుకున్న సీజేఐ.. బుధవారం విచారణ చేపట్టేందుకు అంగీకరించారు. ఈ పిటిషన్‌ ఏ బెంచ్‌ ముందు విచారణకు వస్తుందో సాయంత్రానికి వెల్లడయ్యే అవకాశం ఉంది. అవినీతి నిరోధక చట్టంలోని సెక్షన్‌ 17ఎ కింద గవర్నర్‌ నుంచి ముందస్తు అనుమతి తీసుకోకుండా స్కిల్‌ డెవలప్‌మెంట్‌ కేసులో తనపై నమోదు చేసిన కేసును కొట్టేయాలని కోరుతూ చంద్రబాబు సుప్రీం కోర్టును ఆశ్రయించారు.

మరోవైపు చంద్రబాబు బెయిల్‌, కస్టడీ పిటిషన్లపై విచారణకూడా వాయిదా పడింది. రెండు పిటిషన్లపై విచారణను బుధవారానికి వాయిదా వేస్తున్నట్లు ఏసీబీ కోర్టు ఇంఛార్జ్ జడ్జి వెల్లడించారు. బెయిల్‌ పిటిషన్‌పై ఇవాళ వాదనలు వినాలని చంద్రబాబు తరఫు న్యాయవాదులు కోరగా.. ఇవాళే వాదనలు విని ఉత్తర్వులు ఇవ్వడం కష్టమన్నారు న్యాయమూర్తి. బుధవారం నుంచి తాను సెలవుపై వెళ్లనున్నట్లు తెలిపారు. బుధవారం రెగ్యులర్‌ కోర్టులో వాదనలు వినిపించాలని జడ్జి సూచించారు. విజయవాడ ఏసీబీ కోర్టు జడ్జి ఈరోజు సెలవులో ఉండటంతో ఇంఛార్జ్‌గా మెట్రోపాలిటన్‌ సెషన్స్‌ జడ్జి వ్యవహరించిన సంగతి తెలిసిందే. మరోవైపు ఈ నెల 28 నుంచి వచ్చే నెల 2 వరకు కోర్టులకు వరుస సెలవులు ఉన్నాయి. ఒకవేళ బుధవారం పిటిషన్లపై విచారణ వాయిదా పడితే మళ్లీ వచ్చే మంగళవారం (అక్టోబర్) 3న విచారణ జరగనుంది. అప్పటి వరకు చంద్రబాబు విచారణ వాయిదా పడినట్లే.. అప్పటి వరకు చంద్రబాబు జైల్లో ఉండాల్సిందే. అంతేకాదు ఆయన రిమాండ్‌ను కూడా సీబీఐ కోర్టు వచ్చే నెల 5 వరకు పొడిగించిన సంగత తెలిసిందే.