పాక్ ఆక్రమిత కాశ్మీర్లో అమెరికా రాయబారి పర్యటన.. తీవ్రంగా ఖండించిన భారత్
national | Suryaa Desk | Published : Tue, Sep 26, 2023, 10:05 PM
పాకిస్థాన్లో అమెరికా రాయబారిగా ఉన్న డొనాల్డ్ బ్లోమ్ ఇటీవల పాక్ ఆక్రమిత కాశ్మీర్లో ఆరు రోజుల పాటు పర్యటించారు. ఇప్పుడు ఈ పర్యటనే భారత్, అమెరికా, పాక్ మధ్య ప్రస్తుతం తీవ్ర చర్చనీయాంశంగా మారింది. గిల్గిట్ బాల్టిస్థాన్లో అమెరికా రాయబార బృందం పర్యటించడంపై భారత్ తీవ్ర అసంతృప్తిని వెల్లడించింది. అయితే పీఓకేలో పర్యటించడమే కాకుండా దాన్ని ఆజాద్ జమ్ము అండ్ కాశ్మీర్ అని డొనాల్డ్ బ్లోమ్ వ్యాఖ్యానించడం ప్రస్తుతం కొత్త వివాదానికి కారణమైంది. ఇప్పటికే పాక్ ఆక్రమిత కాశ్మీర్ భారత్లో అంతర్భాగమేనని భారత ప్రభుత్వం మొదటి నుంచి వ్యాఖ్యానిస్తోంది. ఈ ఘటనపై భారత్లో అమెరికా రాయబారిగా ఉన్న ఎరిక్ గార్సెట్టి స్పందించారు.
పాక్ ఆక్రమిత కాశ్మీర్ పర్యటించిన తర్వాత డొనాల్డ్ బ్లోమ్ తన అధికారిక ట్విటర్ ఖాతా నుంచి ఒక పోస్ట్ పెట్టారు. అయితే అందులో పీఓకేను ‘ఆజాద్ జమ్మూ అండ్ కాశ్మీర్’కి సంక్షిప్తంగా ఏజేకే అని పదే పదే ప్రస్తావించడం ప్రస్తుత వివాదానికి కారణం అయింది. పాకిస్తాన్ సాంస్కృతిక, చారిత్రక గొప్పతనానికి ప్రతీక అయిన క్వైద్-ఎ-ఆజం మెమోరియల్ డాక్ బంగ్లాను సందర్శించినట్లు తెలిపారు. దీన్ని 1944 లో మహ్మద్ ఆలీ జిన్నా సందర్శించారని పేర్కొన్నారు. ఇంకా ఏజేకేలో తన తొలి పర్యటన సందర్భంగా క్వైద్-ఎ-ఆజం మెమోరియల్ డాక్ బంగ్లాను సందర్శించడం తనకు గౌరవంగా భావిస్తున్నట్లు ఆ ట్వీట్లో డొనాల్డ్ బ్లోమ్ పేర్కొన్నారు.
ఇక పాకిస్థాన్లోని అమెరికా రాయబారి డొనాల్డ్ బ్లోమ్.. పాక్ ఆక్రమిత కాశ్మీర్లో పర్యటించడంపై భారత్ తీవ్ర అభ్యంతరాన్ని వ్యక్తం చేసింది. ఈ ఘటనపై భారత్లో ఉన్న అమెరికా రాయబారి.. ఎరిక్ గార్సెట్టి స్పందించారు. పాక్ ఆక్రమిత కాశ్మీర్ అంశాన్ని కేవలం భారత్, పాక్లు ద్వైపాక్షిక విధానాల ద్వారానే పరిష్కరించుకోవాలని పేర్కొన్నారు. ఈ విషయంలో అమెరికానే కాకుండా ఇతర దేశాలు కలుగజేసుకోకూడదని గార్సెట్టి తెలిపారు.
ఇక భారత్, కెనడా మధ్య ప్రస్తుతం ఖలిస్థానీ ఉగ్రవాది హర్దీప్ సింగ్ నిజ్జర్ హత్య విషయంలో తలెత్తిన వివాదంపై కూడా ఎరిక్ గార్సెట్టి స్పందించారు. కెనడియన్ పార్లమెంట్లో నాజీ యుద్ధంలో పాల్గొన్న వ్యక్తికి స్టాండింగ్ ఒవేషన్ ఇవ్వడంపై.. ప్రతీ ఒక్కరు తప్పును గుర్తించారని భావిస్తునట్లు తెలిపారు. అయితే ఖలిస్తాన్ ఉగ్రవాది హర్దీప్ సింగ్ నిజ్జర్ హత్యపై అమెరికా సమాచారాన్ని పంచుకోవడంపై వ్యాఖ్యానించేందుకు గార్సెట్టి నిరాకరించారు.
|
|