విశాఖ తీరానికి వచ్చిన చెక్క పెట్టె,,,బ్రిటీష్ కాలంనాటిదిగా గుర్తింపు

విశాఖపట్నంలో వైఎంసీఏ బీచ్‌ తీరానికి ఓ భారీ చెక్క పెట్టె అలల మధ్య కొట్టుకుని వచ్చింది. శుక్రవారం రాత్రి కొందరు పర్యాటకులు, మత్స్యకారులు ఈ పెట్టెను గమనించారు. పోలీసులకు స్థానికులు సమాచారం అందించగా.. పురాతమైన చెక్క పెట్టె కావడంతో ప్రొక్లెనర్‌ సహాయంతో ఒడ్డుకు చేర్చారు. చూసేందుకు భారీగా ఉన్న ఈ పెట్టెను బ్రిటీష్ కాలం నాటిదిగా అంచనా వేస్తున్నారు. పురాతన పెట్టె ఇలా ఒడ్డుకు వచ్చిందని ఆర్కియాలజీ విభాగానికి సమాచారం ఇవ్వగా వారు వచ్చారు.

అందరి సమక్షంలో పెట్టెను జేసీబీల సాయంతో పగులగొట్టారు.. ఆ పెట్టెలో ఏమీ లేదని తేల్చారు. కేవలం చెక్కల్ని ఓ దిమ్మెగా తయారు చేసినట్లు గుర్తించారు. అత్యవసర సమయాల్లో బోట్ల కోసం వేసే లంగరు బాక్స్‌గా గుర్తించారు. జేసీబీల సాయంతో పెట్టెను ఓపెన్ చేశారు.. చెక్క లేయర్స్ తప్ప ఏమీ లేదని తేల్చారు. బీచ్‌లో ఉన్న సందర్శకులు ఆ భారీ పెట్టెను చూసేందుకు ఎగబడ్డారు. వారిని పోలీసులు కట్టడి చేయడానికి ఇబ్బందిపడాల్సి వచ్చింది. ఇప్పుడు ఆ పెట్టెలో ఏముందనేది అందరిలో ఉత్కంఠ రేపగా.. చివరికి ఏమీ లేదని తేలింది.

మరోవైపు ఆర్కే బీచ్ లో బ్రిటిష్ కాలం నాటి బంకర్లు బయటపడ్డాయి.. రెండో ప్రపంచ యుద్ధ కాలంలో శత్రువులపై దాడి కోసం నిర్మించిన ఈ బంకర్‌లు చాలా వరకు విశాఖ తీరంలో ఉన్నాయి. అయితే, కాలక్రమంలో సముద్రపు అలల తాకిడికి కొన్ని ఇసుకలో కూరుకుపోయాయి. జాలరి పేట వద్ద మాత్రం బంకర్ శిథిల స్థితిలో కనిపిస్తోంది. తాజాగా వాతావరణ మార్పులతో పాండురంగ స్వామి ఆలయం సమీపాన ఓ బంకర్ బయటపడింది. రెండో ప్రపంచ యుద్ధంలో సముద్రం వైపు నుంచి వచ్చే శత్రువులపై దాడి చేసేందుకు సైనికులు ఈ బంకర్‌లను నిర్మించుకుని అక్కడి నుంచి దాడులకు దిగినట్టు చరిత్రకారులు చెబుతుంటారు. కేవలం రెండో ప్రపంచ యుద్ధ సమయంలోనే కాదు రాతి యుగంలో కూడా విశాఖలో నాగరికత ఉన్నట్టు చరిత్రకారులు పేర్కొంటున్నారు. ఇప్పుడు ఈ పెట్టె కూడా ఆకాశం నాటిదా అనుకుంటున్నారు.