అందరిముందే మహిళా ఎమ్మెల్యేపై చేతులు వేసి..బీజేపీ ఎంపీ వికృత చేష్టలు

ఆయన ఒక బాధ్యతాయుతమైన ఎంపీ స్థానంలో ఉన్నారు. ఒక బహిరంగ సమావేశంలో ఆ ఎంపీ చేసిన వికృత చేష్టలు ప్రస్తుతం తీవ్ర చర్చనీయాంశంగా మారాయి. పక్క సీట్‌లో ఉన్న మహిళా ఎమ్మెల్యే పట్ల తీవ్ర అసభ్యంగా ప్రవర్తించాడు. దీనికి సంబంధించిన దృశ్యాలను అక్కడే ఉన్న ఓ వ్యక్తి వీడియో తీసి సోషల్ మీడియాలో పెట్టడంతో వైరల్ అవుతోంది. దీంతో సదరు బీజేపీ ఎంపీపై నెటిజన్లు తీవ్ర స్థాయిలో విరుచుకుపడుతున్నారు. మహిళా ఎమ్మెల్యే అన్న గౌరవం లేకుండా ప్రవర్తించిన ఎంపీ పట్ల తీవ్ర విమర్శలు గుప్పిస్తున్నారు. ఈ ఘటన ఉత్తర్‌‌ప్రదేశ్‌లో చోటు చేసుకుంది.

ఉత్తరప్రదేశ్‌లోని అలీగఢ్‌లోని శ్రీరామ్ బాంక్వెట్ హాల్‌లో సెప్టెంబర్ 25 వ తేదీన పండిట్ దీన్‌దయాళ్ ఉపాధ్యాయ్ జయంతి సందర్భంగా ఓ కార్యక్రమాన్ని నిర్వహించగా... అందులో ఈ సంఘటన జరిగింది. ఈ కార్యక్రమాన్ని కోల్ నియోజక వర్గ ఎమ్మెల్యే అనిల్ పరాషర్ ఏర్పాటు చేశారు. ఈ కార్యక్రమానికి ఉత్తర్‌ప్రదేశ్‌ మంత్రివర్గంలోని పలువురు మంత్రులు, ఎమ్మెల్యేలు, ఎంపీలు, స్థానిక మేయర్ సహా చాలా మంది హాజరయ్యారు. ఈ సందర్భంగా అందరూ కూర్చొని మాట్లాడుతూ ఉండగా.. అలీగఢ్ ఎంపీ సతీశ్ గౌతమ్, మహిళా ఎమ్మెల్యే ముక్తా రాజా పక్కన కూర్చున్నారు. ఈ క్రమంలోనే ఎంపీ సతీశ్ గౌతమ్ ఆ ముక్తా రాజా పట్ల అనుచితంగా ప్రవర్తించారు.

మహిళా ఎమ్మెల్యే భుజాలపై రెండు చేతులు వేసి గట్టిగా నొక్కినట్లు ఆ వీడియోలో కనిపిస్తోంది. ఎంపీ సతీశ్ గౌతమ్ చేష్టలకు ఎమ్మెల్యే ముక్తా రాజా షాక్ అయ్యారు. వెంటనే తేరుకుని తీవ్ర అసౌకర్యానికి గురైన ఎమ్మెల్యే తనను తాను ఎంపీ చేతుల నుంచి విడిపించుకున్నారు. అనంతరం అక్కడి నుంచి పక్కకు వెళ్లి వేరే సీట్‌లో కూర్చున్నారు. ఆ సమావేశంలో అంత మంది నేతలు ఉన్నా ఎంపీ సతీశ్ గౌతమ్ ఈ విధంగా ప్రవర్తించడం తీవ్ర వివాదాస్పదం అయ్యింది. అయితే ఎంపీ సతీశ్ గౌతమ్ చేసిన పనిని అక్కడే ఉన్న కొంతమంది తమ ఫోన్లలో వీడియోలు తీసి సోషల్ మీడియాలో ఉంచారు. దీంతో ఆ వీడియో ప్రస్తుతం వైరల్‌గా మారింది. దీంతో ఎంపీ సతీశ్ గౌతమ్‌ను నెటిజన్లు దారుణంగా ట్రోల్ చేస్తున్నారు.

ఇక ఈ వీడియోను ట్విటర్‌లో ఉంచిన ఉత్తర్‌ప్రదేశ్ కాంగ్రెస్ పార్టీ.. సదరు ఎంపీపై తీవ్ర విమర్శలు గుప్పించింది. బీజేపీ ఎంపీ చేసిన పనికి సదరు మహిళా ఎమ్మెల్యే తీవ్ర అసౌకర్యానికి గురవుతున్నారని పేర్కొంది. బీజేపీ నేతలు ఒక ఎమ్మెల్యే పట్లనే ఈ విధంగా ప్రవర్తిస్తే ఇక సామాన్య కార్యకర్తలు, జనం సంగతి ఏంటని ప్రశ్నించింది. అలాంటిది ఆలోచించుకోవడానికే తీవ్ర జుగుప్సాకరంగా ఉంటుందని మండిపడింది. ఒక బహిరంగ కార్యక్రమంలో ఎమ్మెల్యేకే ఇలా వేధింపులు తప్పకపోతే సామాన్య మహిళలు, బాలికలు సురక్షితంగా ఉంటారా అని ప్రశ్నించింది. ఇలాంటి ఘటనలు సమాజానికే అవమానమని పేర్కొంది.