టీడీపీ నేత బండారు సత్యనారాయణ అరెస్టు.. పరవాడలో ఉద్రిక్తత

తెలుగుదేశం పార్టీ సీనియర్‌ నేత, మాజీ మంత్రి బండారు సత్యనారాయణ మూర్తిని పోలీసులు అరెస్టు చేశారు. అనకాపల్లి జిల్లా పరవాడ మండలం వెన్నెలపాలెంలో బండారు సత్యనారాయణ నివాసంలో ఆయణ్ని అదుపులోకి తీసుకున్నారు. పోలీసులు ఆయనకు 41ఏ, 41బీ నోటీసులు ఇచ్చి అరెస్టు చేశారు. మంత్రి ఆర్కే రోజాను ఉద్దేశించి బండారు సత్యనారాయణ చేసిన వ్యాఖ్యలు దుమారం రేపుతున్న సంగతి తెలిసిందే. మంత్రి హోదాలో ఉన్న మహిళనే ఈ స్థాయిలో దూషిస్తే, సాధారణ మహిళల పరిస్థితి ఏంటంటూ దర్శకుడు రాంగోపాల్ వర్మ ట్విట్టర్‌లో పోస్టు చేశారు. ఆ నేతపై చర్యలు తీసుకోవాలంటూ ఏపీ మహిళా కమిషన్ చైర్‌పర్సన్ వాసిరెడ్డి పద్మను ట్యాగ్ చేశారు. బండారు చేసిన వ్యాఖ్యలకు సంబంధించిన వీడియోను జత చేశారు. తీవ్రంగా స్పందించిన వాసిరెడ్డి పద్మ.. బండారు సత్యనారాయణను వెంటనే అరెస్టు చేసి, కఠిన చర్యలు తీసుకోవాలంటూ ఏపీ డీజీపీ రాజేంద్రనాథ్ రెడ్డిని కోరారు.

బండారు సత్యనారాయణను పోలీసులు ఏ క్షణంలోనైనా అరెస్టు చేస్తారనే వార్తల నేపథ్యంలో పరవాడలో గత రెండు రోజులుగా నాటకీయ పరిణామాలు చోటు చేసుకుంటున్నాయి. ఆదివారం రాత్రి వెన్నెలపాలెంలో పోలీసులు భారీగా మోహరించారు. అటు టీడీపీ శ్రేణులు కూడా ఆయన ఇంటి వద్దకు చేరుకున్నాయి. దీంతో ఇరు వర్గాల మధ్య ఉద్రిక్తత పరిస్థితి ఏర్పడింది. మరోవైపు.. బండారు సత్యనారాయణమూర్తి భార్య మాధవీలత డీఎస్పీ కె.వి సత్యనారాయణ, పరవాడ సీఐ ఈశ్వర్ రావును కలిసి ఫిర్యాదు చేశారు. పోలీసులు తన భర్త, తన కుటుంబాన్ని నిర్బంధించి ఇబ్బందులు పెడుతున్నారని ఫిర్యాదులో పేర్కొన్నారు. ఆదివారం రాత్రి నుంచి బయటకు రాకుండా అడ్డుకున్నారని తెలిపారు.