జీపీఎస్‌ను నమ్ముకొని.. ప్రాణాలు పోగొట్టుకొన్న యువ వైద్యులు

ఆధునిక సాంకేతికతను నమ్ముకుని.. సొంతంగా ఆలోచించడం మానేస్తే.. అది ప్రాణాల మీదకు వస్తుందనడానికి కేరళలో జరిగిన ఘటనే ఉదాహరణ. రాత్రివేళ బోరున వర్షం కురుస్తున్న సమయంలో జీపీఎస్‌ను నమ్ముకుని కారు నడిపి ఇద్దరు యువ వైద్యులు ప్రాణాలు పోగొట్టుకున్నారు. చిమ్మచీకట్లో జీపీఎస్‌ వాహనాన్ని నదిలోకి నడిపించింది. శనివారం అర్ధరాత్రి కేరళలోని ఎర్నాకుళం జిల్లాలో చోటుచేసుకొంది. కొల్లాంకు చెందిన డాక్టర్‌ అద్వైత్‌ (28), త్రిశూర్‌కు చెందిన డాక్టర్‌ అజ్మల్‌ అసిఫ్ (28) కొడుంగల్లూరులోని క్రాఫ్ట్ ఆస్పత్రిలో పనిచేస్తున్నారు.

ఆస్పత్రిలో విధులు ముగించుకొని శనివారం రాత్రి ఇళ్లకు బయల్దేరారు. వీరితోపాటు డాక్టర్‌ తబ్సిర్‌, ఎంబీబీఎస్‌ విద్యార్థిని తమన్నా, నర్స్‌ జిస్మాన్‌ కూడా హోండా సివిక్‌ కారులో ఎక్కారు. డాక్టర్‌ అద్వైత్‌ వాహనం నడుపుతున్నాడు. ఆదివారమే అద్వైత్ పుట్టిన రోజు కావడంతో కోచిలో షాపింగ్‌ చేసి తిరుగు ప్రయాణమయ్యారు. ఆ సమయంలో భారీ వర్షం కురుస్తుండటంతో రహదారి సరిగా కనిపించడంలేదు. దీంతో డాక్టర్ అద్వైత్‌ జీపీఎస్‌‌ను ఆన్ చేసి వాహనం నడిపినట్టు అతడి పక్కన కూర్చొన్న ఎంబీబీఎస్‌ విద్యార్థిని తమన్నా తెలిపింది.

ఈ క్రమంలో జీపీఎస్‌ రీరూటై కావడంతో దానిని నమ్ముకుంటూ ముందుకెళ్లారు. గోతురూత్ సమీపంలో నీరు నిలిచి ఉన్న ప్రాంతాన్ని రోడ్డుగా పొరబడ్డాడు. నేరుగా కారు నీటిలోకి వెళ్లగా... అది నది అని గుర్తించేలోపే అందులో మునిగిపోయింది. ఈ ఘటన అర్ధరాత్రి 12.30 సమయంలో చోటు చేసుకొంది. స్థానికులు స్పందించి ముగ్గురిని రక్షించారు. అద్వైత్‌, అజ్మల్‌ ఈ ఘటనలో ప్రాణాలు కోల్పోయారు. జీపీఎస్‌ సాధారణంగా తక్కువ ట్రాఫిక్‌ ఉన్న వైపు మార్గాన్ని సూచిస్తుంటుందని.. ఆ మార్గాలు అంత సరక్షితమైనవి కాదని నిపుణులు చెబుతున్నారు.

ప్రాణాలతో బయటపడిన డాక్టర్ గజిక్ తబ్సీర్ మాట్లాడుతూ.. జీపీఎస్‌ రీరూట్ తర్వాతే ప్రమాదం జరిగిందని వెల్లడించారు. ‘మేము జీపీఎస్ ఉపయోగించాం.. కానీ, నేను వాహనం నడపలేదు.. అందువల్ల అప్లికేషన్‌లో సాంకేతిక లోపం లేదా మానవ తప్పిదమా అని నేను నిర్ధారించలేను’ అని అన్నారు. ప్రమాదం నుంచి బయటపడిన ముగ్గురూ ప్రస్తుతం కోచి ఆస్పత్రిలో చికిత్స పొందుతున్నారు. డాక్టర్ అద్వైత్ మృతదేహాన్ని కలామ్‌సెర్రీ మెడికల్ కాలేజీ‌కి.. డాక్టర్ అజ్మల్ మృతదేహాన్ని త్రిశూరు మెడికల్ కాలేజీ ఆస్పత్రికి పోస్ట్‌మార్టం కోసం తరలించారు.