వందే భారత్ స్లీపర్ రైళ్లు వచ్చేస్తున్నాయ్.. ఆకట్టుకుంటోన్న కోచ్‌ల డిజైన్లు

దేశంలోని ప్రధాన నగరాల మధ్య వేగవంతమైన ప్రయాణం కోసం కేంద్రం వందే భారత్ రైళ్లను అందుబాటులోకి తెచ్చిన సంగతి తెలిసిందే. ఇప్పటి వరకూ వందే భారత్ రైళ్లలో కూర్చొని ప్రయాణించే అవకాశం మాత్రమే ఉంది. చైర్ కార్, ఎగ్జి్క్యూటివ్ చైర్ కార్ క్లాసులు మాత్రమే ఉన్నాయి. కానీ త్వరలోనే స్లీపర్ వందే భారత్ రైళ్లు అందుబాటులోకి రానున్నాయి. వచ్చే ఏడాది ఫిబ్రవరి నుంచి వందే భారత్ స్లీపర్ రైళ్లను అందుబాటులోకి తీసుకొస్తామని రైల్వే శాఖ మంత్రి అశ్వినీ వైష్ణవ్ తెలిపారు. వందే భారత్ స్లీపర్ రైళ్ల ప్రాథమిక డిజైన్‌కు ఆమోదం తెలిపామని.. మాన్యుఫాక్చరింగ్ కూడా మొదలైందని రైల్వే శాఖ మంత్రి తెలిపారు. ప్రొటోటైప్‌కు దాదాపు ఆమో తెలిపామన్న అశ్విని వైష్ణవ్.. డిసెంబర్లో ట్రాక్ టెస్ట్ సైతం నిర్వహిస్తామన్నారు. ట్రాక్ టెస్ట్ విజయవంతమైన తర్వాత ఈ రైళ్లను ప్రయాణికులకు అందుబాటులోకి తీసుకొస్తారు.

వందే భారత్ స్లీపర్ రైళ్లను చెన్నైలోని ఇంటీగ్రల్ కోచ్ ఫ్యాక్టరీ, బెంగళూరులోని భారత్ ఎర్త్ మూవర్స్ లిమిటెడ్ ఫ్యాక్టరీ మాన్యుఫాక్చర్ చేస్తున్నాయి. ప్రస్తుతమున్న వందే భారత్ రైళ్లతో పోలిస్తే.. స్లీపర్ రైళ్లలో స్ట్రక్చరల్ డిజైన్‌లో చాలా మార్పులు ఉండనున్నాయి. ఒక్కో వందే భారత్ స్లీపర్ రైలులో 22 లేదా 24 బోగీలు ఉంటాయి. ప్రస్తుతం చెన్నైలో తయారవుతోన్న వందే భారత్ స్లీపర్ రైళ్లో 857 బెర్త్‌లు ఉన్నాయి. ఇందులో 823 బెర్త్‌లు ప్రయాణికుల కోసం ఉద్దేశించినవి కాగా.. 34 బెర్తులను సిబ్బందికి కేటాయిస్తారు. అప్పర్ బెర్త్‌లకు ఎక్కేందుకు ఏర్పాటు చేసే మెట్లను సైతం అందంగా డిజైన్ చేయనున్నారు. సాధారణ రైళ్లలో ఒక బోగీలో నాలుగు టాయిలెట్లు ఉంటాయి. కానీ వందే భారత్ స్లీపర్ రైళ్లలో మూడు టాయిలెట్లు మాత్రమే ఉంటాయి. నాలుగో టాయిలెట్ బదులు మినీ ప్యాంట్రీని ఏర్పాటు చేస్తారు. ప్రస్తుతం కూర్చునే సౌలభ్యంతో 33 వందే భారత్ రైళ్లు దేశవ్యాప్తంగా ప్రయాణికులకు అందుబాటులో ఉండగా.. వీటిని 75కి పెంచనున్నారు. వీల్ చైర్లలో వెళ్లేవారికి, సీనియర్ సిటిజన్లకు సౌకర్యవంతంగా ఉండేందుకు రైల్వే శాఖ ట్రెయిన్లలో ర్యాంపు‌లను ఏర్పాటు చేయనుంది. కొత్త డిజైన్ చేసిన ర్యాంప్‌లకు సంబంధించిన ఫొటోలను ఇటీవలే రిలీజ్ చేసింది.