వినాయకుడి అన్నదానంలో 32 రకాల వంటకాలు,,,మెనూలో 8 రకాలు స్వీట్లు, 5 రకాలు హాట్లు

మొన్నటి వరకు వినాయక నవరాత్రులు ఘనంగా జరిగాయి. గల్లీ గల్లీకి కొలువుదీరిన గణేషుల సందడి అంతా ఇంతా కాదు. తొమ్మిది రోజుల పాటు.. ప్రత్యేక పూజలతో పాటు వివిధ కార్యక్రమాలు కూడా నిర్వహించి.. స్థానికులను కూడా వేడుకల్లో భాగస్వామ్యం చేశారు. అయితే.. ఈ కార్యక్రమాల్లో భాగంగా.. చాలా గణేష్ మండపాల వద్ద అన్నదానాలు కూడా నిర్వహించారు. కొన్ని మండపాల్లో అయితే.. నిత్యాన్నదానం కూడా చేశారు. అయితే.. పశ్చిమ గోదావరి జిల్లాలోని ఓ వినాయకుని దగ్గర చేసిన అన్నదానం ఇప్పుడు టాక్ ఆఫ్‌ది సోషల్ మీడియాగా మారింది.

సాధారణంగా గోదావరి జిల్లాలంటేనే మర్యాదలకు పెట్టింది పేరు. అందులోనూ కొత్త అల్లుడు, కొత్త కోడలు ఇంటికి వచ్చిందంటే చాలు.. వందల రకాల నోరూరించే వంటకాలు వడ్డించి తమ మర్యాదలు చాపలా పరుస్తారు. ఇలాంటి ఘటనలు ఎన్నో చూశాం. అయితే.. ఈసారి వినాయక మండపం దగ్గర పెట్టిన అన్నదానంలో కూడా గోదావరి జిల్లాల ప్రత్యేకత ఉట్టిపడేలా జాగ్రత్తపడ్డారు. మామూలుగా అయితే.. వినాయకుల దగ్గర అన్నదానం అంటే.. అన్నం, రెండు కూరలు, సాంబార్‌ ఉంటుంది. ప్రసాదంగా పులిహోర, ఓ స్వీట్ కూడా పెడతారు. ఇంకా అంటే.. పపడం కూడా పెడతారు. కానీ.. ఇక్కడ మాత్రం.. ఏకంగా 32 రకాల వంటకాలను వడ్డించి ఘనంగా అన్నదానం నిర్వహించారు పశ్చిమ గోదావరి జిల్లా ఆకివీడు మండలం గుమ్ములూరులో.

మునుపెన్నడూ లేని విధంగా.. ఏకంగా 32 రకాల వంటకాలతో అన్నదానం చేయటం కాస్త ఆలస్యంగా బయటకొచ్చినా.. ఇది ఇప్పుడు వైరల్‌గా మారింది. కేవలం స్వీట్లతోనే విస్తరాకు నిండిపోయిందంటే.. చూసుకోండి. అవి చూస్తేనే కడుపు నిండిపోయేలా వెరైటీలు వండ్డించారు. బూరెలు, చెక్కర పొంగలి, జాంగ్రీ, బజ్జీ, సమోసా, పులావ్, పులిహోర, అప్పడం ఇలా.. 8 రకాల స్వీట్లు, 5 రకాల హాట్స్, కూరలు, పచ్చళ్లు, పండ్లు, ఐస్ క్రీమ్‌తో కలిపి మొత్తం 32 రకాల పదార్థాలను వడ్డించారు.

32 వెరైటీలతో అన్నదానం చేయటమే ఓ ఆశ్చర్యం కలిగించే విషయం అయితే.. ఈ ఐటమ్స్‌ తినలేకపోతే వాటిని ఇంటికి తీసుకుని వెళ్లేందుకు చివర్లో అందరికీ కవర్లను కూడా అందించటం ఈ కార్యక్రమం మొత్తానికే హైలెట్. అయితే.. అన్నదానాన్ని ఏకంగా నాలుగు వేల మందికి సమర్పించటం మరో గొప్ప విషయం. ఈ నాలుగు వేల మందిలో ఏ ఒక్కరికీ ఏ ఐటెం కూడా తక్కువ కాకుండా చూసుకున్నారు నిర్వాహకులు. కాగా.. ఇందుకు సంబంధించిన వీడియోలు ఉప్పుడు సోషల్ మీడియాలో తెగ చక్కర్లు కొడుతున్నాయి. ఈ అన్నదానం మీద తెగ చర్చ జరుగుతోంది.